Thursday, May 30, 2024

SSPP နှင့် စစ်ကောင်စီ အပြိုင် စစ်အင်အားဖြည့်၊ မိုင်းကိုင်မြို့ထိ တိုက်ပွဲဖြစ်ပွားလာနိုင်

Must read

သျှမ်းပြည် လဲချားမြို့နယ်အတွင်း စစ်ကောင်စီ နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် ( SSPP/SSA) တို့ အပြိုင်အဆိုင် စစ်အင်အားဖြည့်တင်းမှုကြောင့် မိုင်းကိုင်မြို့ထိပါ တိုက်ပွဲ ဖြစ်ပွားလာနိုင်သဖြင့် ညမထွက်ရအမိန့် ထုတ်ပြန်လိုက်ကြောင်း စုံစမ်းသိရသည်။

.

ပြီးခဲ့သည့် သြဂုတ် ၇ ရက် လဲချားမြို့နယ်အတွင်း စစ်ကောင်စီ နှင့် SSPP တို့ တိုက်ပွဲဖြစ်ပွားပြီးနောက်ပိုင်း စစ်ကောင်စီဖက်မှ ပြည်သူ့စစ် တပ်သားခေါ်ယူပြီး စစ်အင်အား ဖြည့်တင်းနေပြီး၊ SSPP ဘက်ကလည်း စစ်အင်အား ဖြည့်တင်းနေကြောင်း မိုင်းကိုင်မြို့ ဒေသခံတစ်ဦးက ပြောသည်။

မိုင်းကိုင်မြို့တွင်း တစ်နေရာ

“အခုလည်း နှစ်ဘက်တပ်ဖွဲ့ စစ်ရေးတင်းမာနေတုန်းပဲ။ လဲချားမြို့နယ်ထဲကို စစ်အင်အား ဖြည့်နေတုန်းပါ။ သီပေါဖက်မှာလည်း စစ်ကောင်စီတွေ အင်အားဖြည့်ဖို့ စီစဉ်နေတယ်လို့ ကြားတယ်။ အဲ့ကြောင့် သူတို့ စစ်ရေးအရ ညမထွက်ရ အမိန့်ထုတ်တာ။ မိုင်းကိုင် နဲ့ လဲချားမြို့ကတော့ တမြို့လုံးပဲ ညမထွက်ဖို့ တားမြစ်ထားတယ် “ ဟု ၎င်းဒေသခံ တစ်ဦးက ပြောသည်။

အဆိုပါ ထုတ်ပြန်သည့် ညမထွက်ရ အမိန့်ထဲတွင် ည ၆ နာရီမှ မနက် ၆ နာရီအထိ ညမထွက်ဖို့ တားမြစ်ထားကြောင်း သိရသည်။

ယင်းကဲ့သို့ နှစ်ဖက်တပ်ဖွဲ့ အပြိုင်အဆိုင် ညမထွက်ရ အမိန့်ထုတ်ပြန်ခြင်းကြောင့် တစ်နေ့လုပ်တစ်နေ့စား ပြည်သူများအတွက် အခက်ခဲ ဖြစ်နေကြောင်း မိုင်းကိုင်ဒေသခံ တစ်ဦးက ထပ်လောင်းပြောသည်။

“သူတို့ ရွာထဲကိုဝင်လာကတည်းက ကုန်သွယ်ရေး၊ အရောင်းအဝယ်တွေ ဘယ်လိုမှ အဆင်မပြေဘူး။ အဲ့ကစပြီး ကျနော်တို့လည်း ကိုယ့်ကိုယ်လုံခြုံမှုမရှိတော့သလို ခံစားရတယ်။ အသွားအလာ စိတ်မချရဘူး။ အဲ့ခုက ပိုဆိုးတာပေါ့ ဒီလိုထပ်လုပ်လိုက်တော့ တစ်ရက်လုပ်မှ တစ်ရက်စားရတဲ့ အခြေခံ အလုပ်သမားတွေ၊ နေ့စားအလုပ်သမားတွေအတွက် ခက်ခဲတာပေါ့ “ ၎င်း ဒေသခံတစ်ဦးက ပြောသည်။

အလားတူ တိုက်ပွဲဖြစ်ပွားခဲ့သည့် လဲချားမြို့နယ်အတွင်း ပြည်သူများကလည်း ညမထွက်ရ အမိန့်ထုတ်ပြန် ထားခြင်းကြောင့် အချိန်မတော် အရေးကြီး ကိစ္စများသွားလာရပါက ပစ်ခတ်ခံရမည်ကို စိုးရိမ်နေကြောင်း၊ လုံခြုံရေးအတွက် စိတ်ပူနေရကြောင်း လဲချားဒေသခံ အမျိုးသား တစ်ဦးက ပြောသည်။

“ကျနော်တို့က အရမ်းစိတ်ပူရတယ်။ ပြည်သူတွေအတွက် လုံခြုံရေးဆိုတာ မရှိဘူး။ အချိန်အခါ မတော် အလုပ်လေး ရှိလို့သွားရင် သူတို့အမြင်မတော်လို့ ပစ်ရင်ပစ်လိမ့်မယ်။ ဟိုဖက်က ပစ်တာလား၊ ဒီဖက်က ပစ်တာလား ဘယ်တပ်ဖွဲ့မှန်း ကိုယ်ကလည်း မသိဘူး။ စိတ်ပူရတဲ့ အပိုင်းတွေ အများကြီးရှိတာပေါ့ “ ဟု ၎င်း အမျိုးသားက ပြောသည်။

လဲချားမြို့ နှင့် မိုင်းကိုင်မြို့ အကွာအဝေးသည် ကားဖြင့်သွားလာရပါက တစ်နာရီသာ ကြာမြင့်ကြောင်း သိရသည်။

ထို့အပြင် လဲချားမြို့နယ်အတွင်း စစ်ကောင်စီမှ စစ်အင်အား တိုးချဲ့ရန်အတွက် ပြည်သူ့စစ်တပ်ဖွဲ့ တစ်ဖွဲ့လျှင် တပ်သား ၁၀၀ ပါဝင်ပေးရန် တောင်းယူခဲ့ပြီး စစ်ရေးအတူ လှုပ်ရှားနေလျက်ရှိ ကြောင်းလည်း သိရသည်။

Leave a Comments

- Advertisement -spot_img

Latest article