သျှမ်းပြည် တောင်ကြီးခရိုင်အတွင်းရှိ မြို့နယ်များမှ စစ်ကောင်စီ လက်အောက်ခံ ဝန်ထမ်းများ အားလုံး စစ်တပ်အရန်အင်အား အဖြစ် တပ်ရင်းအသွင် ဖွဲ့စည်းကြရန် ညွှန်ကြားစာ ထုတ်ပြန်လာကြောင်း သတင်းရရှိသည်။

.

ယခု သြဂုတ် ၉ ရက်စွဲဖြင့် ဌာနဆိုင်ရာ အသီးသီးမှ ဝန်ထမ်းများအားလုံးကို စစ်တပ်၏ အရန် အင်အား အဖြစ် စုဆောင်းပြီး တပ်ရင်းအသွင် ဖွဲ့စည်းရန် ညွှန်ကြားထားသည့်စာကို သျှမ်းပြည် စစ်ကောင်စီ လုံခြုံရေး နှင့် နယ်စပ်ရေးရာ ဝန်ကြီး ဗိုလ်မှူးကြီး စိန်ဝင်း မှ လက်မှတ်ရေးထိုးထားသည်။

ထို ထုတ်ပြန်ချက် ထွက်ပေါ်လာခြင်း နှင့် ပတ်သက်ပြီး ဌာနဆိုင်ရာ အသီးသီးမှ ဝန်ထမ်းများ အကြား စစ်သင်တန်းတက်ရမည်ကို စိုးရိမ်နေရကြောင်း ကလောမြို့နယ်တွင် နေထိုင်သည့် စည်ပင် ဝန်ထမ်း မိသားစု နှင့် နီးစပ်သူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“စာက လျှို့ဝှက်ဆိုပြီး ဌာနဆိုင်ရာ အသီးသီးကို ညွှန်ကြားလာတာပဲ၊ ဒါပေမဲ့ လိုင်းပေါ်မှာလည်း အဲ့စာတွေ ပေါက်သွားတယ်၊ အမျိုးသားတွေမှ မဟုတ်ဘူး၊ အမျိုးသမီးတွေလည်း စစ်သင်တန်း တက်ပြီးတာနဲ့ အရန် တပ်ဖွဲ့အဖြစ် အဆင်သင့် ဖြစ်အောင် လုပ်ရမယ်၊ တာဝန်ကျတဲ့ နေရာကို သွားပြီး တာဝန်ထမ်းဆောင် ရမယ်ဆိုပြီး ညွှန်ကြားလာတယ်လို့ သိရတယ်” ဟု ကလောမြို့မှ စည်ပင်ဝန်ထမ်း မိသားစုဝင် နှင့် နီးစပ် သူက သျှမ်းသံတော်ဆင့်ကို ပြောသည်။

အဆိုပါ စစ်ကောင်စီ ထုတ်ပြန်ချက်တွင် အရှေ့ပိုင်းတိုင်း စစ်ဌာနချုပ် နယ်မြေအတွင်းရှိ ဌာနဆိုင်ရာ အသီးသီးမှာ ဝန်ထမ်းများအားလုံးကို ပြည်သူ့စစ် တပ်ရင်းအသွင် ဖွဲ့စည်းခြင်း၊ အင်အား အခြေအနေပေါ် မူတည်၍ တာဝန်ခွဲ ဝေပေးခြင်း နှင့် အရေးကြုံလာပါက အရန်အင်အားများဖြင့် ဖွဲ့စည်းတာဝန် ပေးအပ်မည့် စီမံချက်များ ရေးဆွဲတင်ပြရမည် ဖြစ်ကြောင်း ရေးသားထားသည်။

လက်ရှိတွင် တောင်ကြီးမြို့ မြို့နယ်အထွေထွေ အုပ်ချုပ်ရေးမှူးရုံးမှ ဝန်ထမ်းများ တချို့သည် ဖောင်ကြီး ဗဟိုဝန်ထမ်း တက္ကသိုလ်သင်တန်းတွင် လက်နက်ငယ် သင်တန်း တက်ရောက်သင်ယူနေရကြောင်းလည်း တောင်ကြီးမြို့ခံ အသက် (၅၀) ဝန်းကျင် အစိုးရ ဝန်ထမ်း တစ်ဦးက သျှမ်းသံတော်ဆင့်ကို ပြောသည်။

“ထွေအုပ်ရုံးက ဝန်ထမ်းတချို့ကို ဖောင်‌ကြီး သင်တန်းမှာ လက်နက်ငယ် ပစ်ခတ်သင်တန်းနဲ့ စစ်ရေး သင်တန်းတွေကို အဓိက ပေးနေတာ။ ဝန်ထမ်းတွေကို စစ်တိုက်ခိုင်းမယ့် သဘောပဲ။ ဒီညွှန်ကြားချက် ကြောင့် တချို့ ဝန်ထမ်းတွေတော့ ပြေးမယ်ထင်တယ်” ဟု တောင်ကြီးမြို့ခံ အစိုးရဝန်ထမ်း တစ်ဦးက သျှမ်းသံတော်ဆင့်ကို ပြောသည်။

တောင်ကြီးမြို့ အခြေစိုက် အရှေ့ပိုင်းတိုင်း စစ်ဌာနချုပ် လက်အောက်ခံ တပ်ရင်းတပ်ဖွဲ့များ နှင့် ပြည်သူ့စစ်တပ်ဖွဲ့များသည် ကရင်နီပြည်နယ်မှ စစ်ဆင်ရေးတွင် ဝင်ပါနေရပြီး ပြည်သူ့ကာကွယ်ရေး ပူးပေါင်းတပ်များ၏ ခုခံတော်လှန်မှုကြောင့် ထိခိုက် သေဆုံးမှုလည်း များနေကြောင်း သိရသည်။

ယင်းကဲ့သို့ ထိခိုက်သေဆုံးမှု များပြားသည့်အတွက် စစ်ကောင်စီတပ်ဖွဲ့သည် ပျူစောထီးများကို လက်နက်ပေးအပ်ပြီး ရှေ့တန်းထွက်ခိုင်းခြင်း ပြုလုပ်သည့်အပြင် ယခုတစ်ကြိမ်၌ ဌာနဆိုင်ရာ အသီးသီးမှ ဝန်ထမ်းများကို အရန်ဝန်ထမ်းများအဖြစ် ဖွဲ့စည်းကြရန် လုပ်ဆောင်ခြင်း ဖြစ်နိုင်ကြောင်းလည်း ဒေသခံများက ပြောဆိုသုံးသပ်နေကြသည်။