သျှမ်းပြည် ကွတ်ခိုင်မြို့နယ်အတွင်း ရေခဲချောင်း လှည့်ရောင်းချနေသူ အမျိုးသားတစ်ဦး သေနတ်ပစ်ခတ်ခံထားရသည့် ဒဏ်ရာများ နှင့် သေဆုံးနေလျက်ရှိကြောင်း စုံစမ်းသိရသည်။

.

ယမန်နေ့ သြဂုတ် ၁၀ ရက် နေ့လယ်ပိုင်း ၁၂ နာရီဝန်းကျင်အချိန်တွင် ကွတ်ခိုင်မြို့နယ် မော်ဟန်ရွာအနီးရှိ လမ်းဘေး၌ ဆိုင်ကယ်ဖြင့် ရေခဲချောင်းလှည့်ရောင်းချသူ အမျိုးသားတစ်ဦးသည် ဒဏ်ရာဒဏ်ချက်များ နှင့် သေဆုံးနေလျက်ရှိကြောင်း ၎င်းကို သွားရောက်ကူညီခဲ့သည် ဗြဟ္မစိုရ်နှလုံးသား လူမှုကူညီရေးအသင်းမှ သိရသည်။

“ ဒဏ်ရာတွေက လည်ပင်းဖောက်ဝင် ဒဏ်ရာတစ်ခု၊ မျက်စိမှာလည်း ဒဏ်ရာတစ်ခု၊ ရင်ဘတ်မှာလည်း နည်းနည်းတွေ့တယ်။ သေနတ် နဲ့ ထိထားတာ။ ကျနော်တို့ကို လမ်းဘေးမှာ လူတစ်ယောက်လဲနေတယ်လို့ အကြောင်းကြားလာတာ “ ဟု ၎င်း လူမှုကူညီရေးအသင်းမှ တာဝန်ခံတစ်ဦးက ပြောသည်။

အဆိုပါ ဒဏ်ရာဒဏ်ချက်ဖြင့် သေဆုံးနေသူ အမျိုးသားတစ်ဦးသည် အသက် ၄၁ နှစ်အရွယ် ကိုသိန်းရွှေ ဖြစ်ပြီး လက်ရှိမှာ အလောင်းကို မီးသင်္ဂြိုဟ်ပေးခဲ့ကြောင်း သိရသည်။

ထို့အပြင် စစ်တပ်က အာဏာသိမ်းပြီးနောက်ပိုင်း ကွတ်ခိုင်မြို့နယ်တွင် တစ်နေ့ကို ၂ ကြိမ်ခန့် ဓားခုတ်မှု၊ လုယက်မှု၊ ဓားပြတိုက်မှု စသည့် ဒုစရိုက်များ ဖြစ်ပွားနေလျက်ရှိကြောင်း လူမှုကူညီရေး အသင်းများထံမှ သိရသည်။

“ မကြာခဏတောင် မဟုတ်တော့ဘူး။ တစ်နေ့ကို တစ်ခါ၊ နှစ်ခါ လောက်ဖြစ်တယ်။ အခုနောက်ပိုင်းမှ ဒီလိုတွေ ဖြစ်တာပေါ့။ အရင်ကတော့ ဒီလိုမျိုး မဖြစ်ဘူး။ ဒီလိုတွေ ဖြစ်တော့လည်း အပြင်ထွက်တဲ့အခါ ကြောက်ရတယ်။ လူတွေအကုန်လုံးက အခုချိန်မှာ ကြောက်ရတယ်လေ၊ ကျနော်လည်း အဲ့လိုကြောက်ရတဲ့ ခံစားချက်လေးရှိတာပေါ့ဗျာ “ ဟု ကွတ်ခိုင်မြို့ ဒေသခံတစ်ဦးက ပြောသည်။

စစ်တပ်က အာဏာသိမ်းပြီးနောက်ပိုင်း ကွတ်ခိုင်မြို့အပြင် လားရှိုး၊ မူဆယ်၊ တာချီလိတ် စသည့် မြို့ပြကြီးတွင် သူခိုး၊ ဓားပြ၊ လုယက်မှုများ မကြာခဏ ဖြစ်ပေါ်နေသောကြောင့် ဒေသခံများသည် အပြင်သို့ သွားလာတိုင်း စိုးရိမ်စိတ်ဖြင့် သွားလာနေရပြီး လုံခြုံရေးမရှိကြောင်း သိရသည်။