ယခုလဆန်း နှစ်ပတ်အတွင်း တရုတ်ယွမ်ငွေ ၁၀၀ ယွမ်ကို ကျပ်ငွေ ၅ သောင်းဝန်းကျင်အထိ မြင့်တက် လာနေကြောင်း စုံစမ်းသိရသည်။

.

ပြီးခဲ့သည့် ဇူလိုင် ၃၁ ရက်မှစပြီး ကျပ်ငွေ ၂ သောင်းတန် ငွေစက္ကူကို ထုတ်ဝေပြီးနောက်ပိုင်း ငွေကြေးဖောင်းပွမှု ဖြစ်ပေါ်ကာ တရုတ်နယ်စပ်ဒေသ မူဆယ်မြို့တွင် တရုတ်ယွမ်ငွေ ဈေးနှုန်းမြင့်တက်လာပြီး ကျပ်ငွေ တန်ဖိုးသည် နေ့စဉ်နီးပါး ဆက်တိုက် ကျဆင်းလာနေသည်။

ယနေ့ (သြဂုတ် ၁၁ ) ရက် တရုတ်နယ်စပ်ဒေသ မူဆယ်မြို့တွင် တရုတ်ယွမ်ငွေ လဲလှယ်ဈေးနှုန်း ၁၀၀ ယွမ်ကို ကျပ်ငွေ ၄၇,၀၀၀ ကျော်၊ (၅) သောင်းဝန်းကျင် အထိ ဈေးနှုန်းမြင့်တက်လာနေကြောင်း မူဆယ်မြို့ကုန်သည် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ယွမ်ဈေးကတော့ တစ်နေ့ပြီး တစ်နေ့ တက်လာနေတာပဲ။ ဒီနေ့ ၁၀၀ ယွမ်ကို ကျပ် ၄၇,၀၀၀ အထိ ထပ်တက်လာတယ်။ ၅ သောင်းအထိတော့ မရောက်သေးဘူး။ နောက်နေ့ ဒီထက် တက်လာနိုင်မလားတော့ မပြောတတ်ဘူး “ ဟု ၎င်းအမျိုးသမီးတစ်ဦးက ပြောသည်။

ယင်းကဲ့သို့ တရုတ်ယွမ်ငွေ ဈေးနှုန်းမြင့်တက်လာခြင်းနှင့်အတူ တရုတ်ပြည်တွင်းထုတ် ကုန်ပစ္စည်းများလည်း ဈေးနှုန်း မြင့်တက်လာနေပြီး တစ်ဖက်တွင် ငွေကြေးဖောင်းပွမှု ကယက်ထမှုကြောင့် ကုန်ဈေးနှုန်းသည်လည်း မြင့်တက်နေလျက်ရှိကြောင်း သိရသည်။

လက်ရှိမှာ စားသုံးဆီ (၅၀ လီတာ) တစ်ဗူးကို ကျပ်ငွေ ၂ သောင်းကျော်အထိ ရှိပြီး ဆန် (၁၀၀ ကီလို) တစ်အိတ်ကို ကျပ် ၉ သောင်းအထိ မြင့်တက်လာသဖြင့် ဝယ်ယူစားသုံးရန်အတွက် အခက်ခဲ ရှိလာနေကြောင်း မူဆယ်မြို့ဒေသခံ အိမ်ရှင်မတစ်ဦးက ပြောသည်။

“ အခုက ကျပ်ငွေ ၂ သောင်းတန်ထုတ်ပြီး ဈေးကွက်ထဲမှာ အဲ့ငွေက အများကြီး မရောက်သေးတာပါ။ ကျနော်တို့ ပြည်သူတွေတော့ အဲ့ငွေ စက္ကူကို လက်ထဲမှာ မကိုင်ရဲဘူး။ ဒီ ကျပ်ငွေ ၂ သောင်းတန် ပိုထွက်လာလေလေ ကျနော်တို့ပြည်သူတွေ ပိုဒုက္ခရောက်မှာ။ အစစအရာရာ ဝယ်စားဖို့အတွက် ခက်လာမယ် “ ဟု ၎င်း အိမ်ရှင်မတစ်ဦးက ပြောသည်။

အလားတူ ထိုင်း – မြန်မာ နယ်စပ်ဒေသ တာချီလိတ်မြို့တွင်လည်း ကျပ်ငွေ ၂ သောင်းတန် ထုတ်ဝေပြီး ငွေကြေးဖောင်းပွမှုကြောင့် ယနေ့ ထိုင်းဘတ်ငွေလဲလှယ်ဈေးနှုန်း ၁၀၂၅ ဘတ်ကို ကျပ် ၁ သိန်း အထိ ရှိနေကြောင်း သိရသည်။