သျှမ်ပြည် မိုးဗြဲမြို့ စစ်ရှောင်များသည် တောတောင်အတွင်း ထွက်ပြေးတိမ်းရှောင်နေစဉ် စားနပ်ရိက္ခာပြတ်လပ်မှုများ၊ နေထိုင်မှု အခက်အခဲများ ကြုံရခြင်းကြောင့် မြို့ပေါ်သို့ ပြန်ပြောင်းရွှေ့နေထိုင် ကြရကြောင်း စုံစမ်းသိရသည်။
.
တောတောင်အတွင်း ထွက်ပြေးတိမ်းရှောင်နေရစဉ် အချိန်ကာလ၌ စစ်ရှောင်များသည် အလှူရှင်ထံမှ ထောက်ပံ့သည့် စားနပ်ရိက္ခာများကိုသာ အားကိုးနေရပြီး တိုက်ပွဲပြင်းထန်စွာ ဖြစ်ပွားသည့် လများတွင် နယ်မြေဒေသအတွင်း လမ်းပန်းဆက်သွယ်ရေး ခက်ခဲမှုကြောင့် ထောက်ပံ့မှုများ ရောက်ရှိမလာကာ စားနပ်ရိက္ခာပြတ်လပ်မှုများ ကြုံခဲ့ရခြင်း ဖြစ်သည်။
“တောတောင်တွေထဲမှာ နေရတုန်းက စားစရာ၊ နေစရာတွေ ခက်တာပါတယ်။ နောက်ပြီး ကိုယ့်အိမ်လောက် မမှီဘူးပေါ့။ ဖယ်ခုံမှာ အကုန်လုံး လာစုတဲ့အခါကျတော့ တော်တော်များတယ်။ တချို့က သူများအိမ်မှာနေရသလို အိမ်ငှားနေရတဲ့သူ၊ ဆွေမျိုးနား ကပ်နေရတဲ့သူလည်းရှိတယ်။ ဒီမှာက စခန်းတစ်ခုနဲ့ ဆောက်ပေးတာမရှိဘူး။ ကြာတော့အဆင်မပြေတော့ ငြီးငွေ့လာကြတယ် “ ဟု စစ်ရှောင်ကော်မတီ တစ်ဦးက ပြောသည်။
လက်ရှိမှာ မိုးဗြဲမြို့ပေါ်အတွင်း နေရပ်ပြန်သွားသည့် စစ်ရှောင်များသည် လူဦးရေ ၂၀၀ ကျော် ရှိပြီး တိုက်ပွဲများ ထပ်မံဖြစ်ပွားပါက နေရပ်ပြန်သွားသည့် ပြည်သူများသည် ပြန်လည်ထွက်ပြေးတိမ်းရှောင်ကြရမှာဖြစ်ပြီး ယနေ့အချိန်ထိ မိုးဗြဲမြို့ပေါ်၌ အခြေတစိုက် နေထိုင်ခြင်း မရသေးကြောင်း သိရသည်။
အလားတူ မိုးဗြဲမြို့နေရပ်ပြန်သွားသည့် စစ်ရှောင် နှင့် နီးစပ်သူတစ်ဦးက “ ပြန်သွားတာတော့ ရှိတယ်။ ရပ်ကွက်တိုင်းမှာတော့ ပြန်နေလို့မရဘူး။ လမ်းဘေးတွေမှာပဲ ပြန်နေကြတယ်။ အကုန်လုံးတော့ မပြန်လာနိုင်သေးဘူး။ ဒီလိုနေရဲတဲ့သူတွေ၊ လမ်းဘေးမှာ နေတဲ့သူတွေ စည်ကား ရပ်ကွက် ၊ ပေါ်ဦး ရပ်ကွက်မှာပဲရှိတယ်။ ကျန်တဲ့ရပ်ကွက်တွေက စစ်ကောင်စီ တပ်စွဲထားတယ် “ ၎င်းကဆိုသည်။
ထို့အပြင် ပြီးခဲ့သည့် သြဂုတ် ၆ ရက်တွင် လွိုင်ကော် – မိုးဗြဲ ကားလမ်းမကြီးပေါ်ရှိ ကျေးရွာတွင် တိုက်ပွဲပြန်လည် ဖြစ်ပြီးနောက်ပိုင်း လမ်းမကြီး အသုံးပြုရန် တားမြစ်ထားလိုက်သဖြင့် စစ်ရှောင်များအတွက် ရိက္ခာသယ်ယူ၍ မရကာ တခြားလမ်းကို အသုံးပြုပြီး သယ်ယူရသောကြောင့် အခက်ခဲရှိနေကြောင်း စစ်ရှောင်ကော်မတီများထံမှ သိရသည်။
