သျှမ်းပြည် နမ့်ခမ်းမြို့နယ် ဖာဒန်ကျေးရွာအုပ်စု မန်ကန် ကျေးရွာတွင် မြေပြိုကျမှု ဖြစ်ပွားခဲ့ပြီး ကလေးငယ် ၁ ဦးသေဆုံးရပြီး ၊၂ ဦး ထိခိုက်ဒဏ်ရာများ ရသွားကြောင်း သိရသည်။
.
ယမန်နေ့ (သြဂုတ် ၉) ရက် တွင် မိုးသည်းထန်စွာ ရွာသွန်းမှုကြောင့် တောင်ကျရေ စီးကြောင်းများ နှင့် မြေပြိုကျမှုလည်း ဖြစ်ပေါ်လာပြီး နမ့်ခမ်းမြို့နယ် ဖာဒန်အုပ်စု မန်ကန်ရွာမှ အသက် ၂ နှစ်အရွယ် ကလေးငယ် ၁ ဦး သေဆုံးရပြီး ၂ ဦး ဒဏ်ရာရကြောင်းလည်း ဒေသအတွင်း လူမှုကူညီရေးအသင်းက သျှမ်းသံတော်ဆင့်ကို ပြောသည်။
“ပျက်စီးမှုကတော့ တော်တော်များများ ဖြစ်ပါတယ်။ အခုလမ်းတွေမှာ ရေကြီးနေတုန်းမို့ အခင်းဖြစ်တဲ့ နေရာကို ကျနော်တို့ မသွားနိုင်သေးဘူး၊ သတင်းအချက်အလက် သိရသလောက်တော့ ကလေးငယ် ၁ ဦး မြေပိပြီး သေသွားရတယ်၊ နောက်ထပ် နှစ်ဦးက ဒဏ်ရာ ရသွားတယ်တဲ့၊ အိမ်တွေလည်း ပျက်စီးတယ်လို့ သိရတယ်” ဟု အမည်မဖော်လိုသူ ဒေသအတွင်း လူမှုကူညီရေးအသင်းဝင် တစ်ဦးက သျှမ်းသံတော်ဆင့်ကို ပြောသည်။
ယမန်နေ့ (သြဂုတ်လ ၉) ရက်နေ့တွင် နမ့်ခမ်းမြို့နယ်မှ ကျေးရွာ (၁၄) ရွာတို့တွင် မြေပြိုမှု ရေကြီး ရေလျှံမှု ကြုံတွေ့နေရပြီး လူသေဆုံးမှု ရှိသည့်အပြင် နေအိမ် အဆောက်အအုံများ ပျက်စီးမှု ရှိနေကြောင်းလည်း သိရသည်။
မြေပြိုမှု နှင့် ရေကြီးရေလျှံမှု ဖြစ်ပွားခဲ့သည့် နမ့်ခမ်းမြို့နယ်မှ ကျေးရွာများသည် မန်ကန်ရွာ၊ မန်လုံရွာ၊ နမ့်ဟွမ်ရွာ၊ ကောင်းခေရွာ၊ ပန်လောရွာ၊ ပန်ခါးရွာ၊ လွယ်မွန်းရွာ၊ ဆိုင်တောင်ရွာ၊ ဆာလူရွာ၊ မန်အောင်ရွာ၊ ဖာလင်ရွာ၊ ကြူဆိုင်းရွာ၊ ပန်ဟန်ကြီးရွာ နှင့် မန်စပ်ရွာ စသည့်ဖြင့် ကျေးရွာ (၁၄) ရွာ ရှိနေကြောင်းလည်း PSLF/TNLA ၏ သတင်း နှင့် ပြန်ကြားရေးဌာနက ထုတ်ပြန်ထားသည်။
မြေပြိုမှုကြောင့် နေအိမ် (၂၆) လုံး၊ ဘုန်းကြီးကျောင်း (၂) ကျောင်း၊ သီလရှင်ကျောင်း (၁) ကျောင်း ပျက်စီးသွားခဲ့ရပြီး ကျေးရွာ (၆) ရွာအတွင်းရှိ လမ်းများ ပြိုကျပျက်စီးသွားခဲ့ကာ ပန်ခါးရွာ နှင့် ပန်လော့ရွာသို့ ဆက်သွယ်ထားသည့် တံတား (၂) စင်းလည်း ကျိုးကျပျက်စီးသွားသဖြင့် လမ်းပိတ်နေသည်ဟု PSLF/TNLA သတင်း နှင့် ပြန်ကြားရေးဌာနက ယနေ့ ဩဂုတ်လ (၁၀) ရက်နေ့တွင် သတင်း ထုတ်ပြန်ထားသည်။
လက်ရှိတွင် ရေများအနည်းငယ် ပြန်ကျသွားသော်လည်း လမ်းဘေးရှိ လယ်ကွက်များတွင် ရေပြည့်နေလျက်ရှိပြီး ရွှံ့နွှံများက လမ်းပေါ်ကျန်ရှိနေသေးသည့်အတွက် ကားလမ်းလည်း ကျပ်တည်းနေဆဲဖြစ်ကြောင်း ဒေသအတွင်း ကားမောင်းသူ တစ်ဦးက သျှမ်းသံတော်ဆင့်ကို ပြောသည်။
“မနေ့ကထက် စာရင်တော့ ရေတွေ ပြန်ကျသွားပါပြီ၊ ဒါပေမဲ့ ကားကတော့ ကျပ်နေတုန်းပေါ့ ၊လမ်းဘေး ကလယ်ကွက်ထဲမှာတော့ ရေတွေ ပြည့်နေတုန်းပဲ၊ စိုက်ထားတဲ့ စပါးပင်တွေတော့ ရှုံးပြီ။ ရေတက်နေတဲ့ဘက်မှာ လမ်းဘေးနှစ်ဖက် နှစ်ချက်ကို သက်ဆိုင်ရာက အမှတ်တွေ လာလုပ်ပေးနေတာ တွေ့ရတယ်” ဟု ဒေသခံ ကားမောင်းသမား တစ်ဦးက သျှမ်းသံတော်ဆင့် ကိုပြောသည်။
လက်ရှိ မိုးရာသီ ကာလအတွင်း မိုးသည်းထန်စွာ ရွာသွန်းမှု များပြားသဖြင့် လမ်းသွားလမ်းလာများ နှင့် တောင်စောင်း တစ်လျှောက်နေထိုင်သူများ အနေဖြင့် သဘာဝဘေးအန္တရာယ် ကြိုတင်ကာကွယ်မှု ၊ ရေကြီးရေလျှံ နှင့် မြေပြိုကျမှုတို့ကို ကြိုတင် လုပ်ဆောင်ထားသင့်ကြောင်းလည်း ဒေသအတွင်း လူမှုကူညီရေးအသင်းက သတိပေး ပြောဆိုထားသည်။
