သျှမ်းပြည် တောင်ကြီးမြို့တွင် (၈) လေးလုံး အရေးတော်ပုံ (၃၅) နှစ်မြောက် အထိမ်းအမှတ်နေ့ ပြည်သူလူထု ဆန္ဒမပြဖို့အတွက် စစ်ကောင်စီ ကန့်သတ်စာ ထုတ်လိုက်ခြင်းဖြစ်ကြောင်း ဒေသခံများ၏ ပြောဆိုချက်အရ စုံစမ်းသိရသည်။
.
ပြီးခဲ့သည့် သြဂုတ် ၁ ရက်မှစပြီး စစ်ကောင်စီ လက်အောက်ခံ မြို့နယ်အထွေထွေအုပ်ချုပ်ရေး ဦးစီးဌာနမှ တောင်ကြီးမြို့နယ်တွင် လုံခြုံရေး နှင့် တရားဉပဒေ စိုးမိုးရေးကို ထိခိုက်ပျက်ပြားစေရန် ပြုမှုဆောင်ရွက်နေကြောင်း တွေ့ရှိသဖြင့် ရာဇဝတ် ကျင့်ထုံးဉပဒေပုဒ်မ ၁၄၄ အရ အမိန့်ထုတ်ပြန် ကြေညာခဲ့သည်။
ထို့အပြင် တောင်ကြီးမြို့နယ်တွင် စုဝေးခြင်း၊ ဟောပြောခြင်း အပါအဝင် စီတန်းလှည့်လည်ခြင်း၊ လှုံ့ဆော်ဆန္ဒပြခြင်း၊ ဖျက်ဆီးခြင်း မပြုလုပ်ရန် တားမြစ်လိုက်ပြီး လူ ၅ ဦးထက်ပို၍ စုဝေးခြင်း မပြုရန်နှင့် ညမထွက်ရ အမိန့်များ ကြေညာခဲ့သည်။
စစ်ကောင်စီ ကန့်သတ်ချက်စာစောင်ထုတ်ဝေခြင်းနှင့် ပတ်သက်ပြီး ယမန်နေ့ (သြဂုတ် ၈) ရက်တွင် ကျရောက်သည့် (၈) လေးလုံး အရေးတော်ပုံ (၃၅) နှစ်မြောက်နေ့အတွက် ပြည်သူလူထုများ ဆန္ဒမပြဖို့အတွက် တားမြစ် ကန့်သတ်ချက် စာစောင်သာ ဖြစ်ကြောင်း တောင်ကြီးမြို့ ဒေသခံတစ်ဦးက ပြောသည်။
“ တချို့ ပြောတာ ဟိုတလောတုန်းက လူသတ်မှု ဖြစ်လို့ ဘာညာနဲ့ အဲ့ကြောင့် ကန့်သတ်ချက်တွေ ထုတ်ပြန်တယ်လို့ ပြောတယ်။ အလကားပါကွာ။ တကယ်တော့ မနေ့ (၈) လေးလုံးနေ့ အထိမ်းအမှတ်ကြောင့် ပြည်သူလူထုတွေ ဆန္ဒမပြကြဖို့အတွက် ထုတ်ထားတာပါ “ ဟု ၎င်းဒေသခံတစ်ဦးက ပြောသည်။
အလားတူ ကန့်သတ်ချက်များ ထုတ်ပြန်သည့်နောက်ပိုင်း စစ်ကောင်စီသည် တောင်ကြီးမြို့ပေါ်၌ ညတွင်း ကင်းလှည့်လည် စောင့်ဆိုင်းနေလျက်ရှိကြောင်း သိရသည်။
စစ်ကောင်စီမှ ထုတ်ပြန်ထားသည့် ညမထွက်ရ အမိန့်တွင် ည ၁၂ နာရီအချိန်မှ နံနက် ၄ နာရီ အချိန်ထိ ညမထွက်ရကြောင်း ထုတ်ပြန်သည့်စာစောင်ထဲတွင် ရေးသားဖော်ပြထားသည်။
ထို့အပြင် ဇွန်လ ၃၀ ရက်တွင်လည်း တောင်ကြီးမြို့ ကံကြီးရပ်ကွက်ထဲရှိ နေအိမ်တစ်လုံးထဲကို အမည်မသိ အမျိုးသားတစ်ဦးက ဓားပြဝင်တိုက်ခဲ့ပြီး အိမ်ရှင် မိသားစု ၃ ဦးကိုပါ ဓားဖြင့်ခုတ်ခဲ့၍ ဆေးရုံတင်ပို့ဆောင်လိုက် ရသည့် အခြေအနေအထိ ဖြစ်ခဲ့သည်။
