သျှမ်းပြည် လွိုင်လင်ခရိုင်၊ လဲချားမြို့နယ်အတွင်း စစ်ကောင်စီမှ စစ်အင်အား ဆက်လက်ဖြည့်တင်းနေပြီး ၊ရဟတ်ယာဥ်ဖြင့် လာရောက် ပျံဝဲနေကြောင်း သတင်းရရှိသည်။
.
ရှမ်းပြည်တိုးတက်ရေးပါတီ ၊ ရှမ်းပြည် တပ်မတော် (SSPP/SSA) နှင့် စစ်ကောင်စီတို့ ပြီးခဲ့သည့် သြဂုတ် ၆ ရက် နံနက်ပိုင်းမှ ညနေပိုင်းထိ စစ်ရေး ပြင်းထန်ခဲ့ရာ ယခုရက်ပိုင်း စစ်ရေး ငြိမ်သက်နေရာမှ စစ်ကောင်စီဘက်မှ စစ်အင်အား ဖြည့်တင်းနေပြီး ရဟတ်ယာဥ်ဖြင့် လဲချားမြို့ပေါ် ဆက်လက် ပျံဝဲနေကြောင်း လဲချားမြို့ခံ အသက် ၃၀ ကျော် အမျိုးသားတဦး က သျှမ်းသံတော်ဆင့်ကို ပြောသည်။
“စစ်လေယာဥ် နဲ့ လဲချားမြို့ပေါ်ကို နှစ်ပတ် လာပတ်သွားတယ်၊ အနေအထားကတော့ ခပ်မြင့်မြင့်ကနေ ပျံသွားတာ။ အဲ့လို လေယာဥ် မြင်ရတော့ တော်တော်ကို လန့်သွားတယ်။ အခုတော့ အသံတွေ ငြိမ်သွားပြီ” ၎င်းအမျိုးသား တဦး က ဆိုသည်။
စစ်ကောင်စီတပ်ဖွဲ့သည် လေယာဥ်ဖြင့် ပျံဝဲမှု ပြုသည့် အပြင် မြေပြင်စစ်အင်အားဖြည့်တင်းမှုများလည်း လုပ်နေပြီး လမ်းများကိုပါ ပိတ်ပင်တားမြစ် ထားကြောင်းလည်း သိရသည်။
စစ်ရေးတင်းမာခဲ့သည့် သြဂုတ် ၆ ရက်မှစပြီး လက်ရှိအချိန်ထိ လဲချားမြို့ တောင်ဘက်ရှိ မန်ပုံကျေးရွာမှ နမ့်စန်ဘက်သွားသည့် လမ်းကြောင်း နှင့် မက်လန်းကျေးရွာမှ လမ်းတို့ကို စစ်ကောင်စီက ပိတ်ထားပြီး ဒေသခံများကို စစ်ရှောင်ခွင့် ပိတ်ထားသည်။
“စစ်သား (စစ်ကောင်စီတပ်) တွေက ရွာထဲမှာ နေရာယူထားပြီးတော့ ရွာသားတွေ စစ်ရှောင်သွားဖို့ ခွင့်မပြုဘူး၊ စစ်ကောင်စီလုပ်တဲ့ ပုံက ရွာသားတွေကို ကာဗာယူထားတဲ့ သဘောဖြစ်နေတယ်။ အချိန်မရွေး တိုက်ပွဲက ဖြစ်နိုင်တော့ ရွာသားတွေက စစ်ရှောင်သွားချင်တာပေါ့၊ ဒါပေမဲ့ စစ်သားတွေက သွားခွင့်မပြုဘူး” ဟု အသက် ၅၀ ဝန်းကျင် ဒေသခံ အမျိုးသားတဦးက သျှမ်းသံတော်ဆင့်ကို ပြောသည်။
ယင်းတိုက်ပွဲအခြေအနေများ နှင့် ပတ်သက်ပြီး SSPP/SSA ၏ ပြောရေးဆိုခွင့်ကို ဆက်သွယ်မေးမြန်းရာ မြေပြင်တိုက်ပွဲငြိမ်နေသော်လည်း စစ်ရေးတင်းမာမှု ရှိနေသေးသည့်အကြောင်း သျှမ်းသံတော်ဆင့်ကို ပြောသည်။
“နေပြည်တော်ကနေ မြေပြင် အခြေအနေကို ထိန်းသိမ်းဖို့ သူတို့တိုင်းမှူးတွေ၊ တာဝန်ရှိသူတွေဆီကို ညွှန်ကြားလာတယ်လို့ သတင်းကြားမိပါတယ်။ ကျနော်တို့ကို ချိတ်ဆက်ကမ်းလှမ်းတာတော့ မရှိပါဘူး။ အခုထိလည်း သူတို့ဘက်က စစ်အင်အားဖြည့်နေတုန်းမို့ စစ်ရေးတင်းမာနေတုန်းပါ” ဟု SSPP/SSA ၏ ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်က သျှမ်းသံတော်ဆင့်ကို ပြောသည်။
လဲချားမြို့နယ်မှ SSPP/SSA နှင့် စစ်ကောင်စီတို့ ဖြစ်ပွားခဲ့သည့် တိုက်ပွဲကြား စစ်ကောင်စီဘက်မှ တပ်သား ၁၀ ဦး ကျော် သေဆုံးသည့်အပြင် အရှင်ဖမ်းမိသူ ၂ ဦး၊ သေနတ် ၂ လက် နှင့် ကား တစ်စီးကို လည်း ဖမ်းဆီးရမိကြောင်း SSPP/SSA ယမန်နေ့ (သြဂုတ် ၇) ရက်တွင် ထုတ်ပြန်ထားသည်။
Leave a Comments