မြန်မာ-ထိုင်းနယ်စပ် သျှမ်းပြည် တာချီလိတ်မြို့တွင် ကျပ်သန်း ၁,၃၀၀ ကျော် တန်ဖိုးရှိ Happy Water မူးယစ်ဆေးဝါးများကို သိမ်းဆီးရမိကြောင်း စုံစမ်းသိရသည်။
သြဂုတ် ၄ရက် ညနေ ၄နာရီတွင် တာချီလိတ်မြို့ ဆန်ဆိုင်း (ခ)ရပ်ကွက် ဟံသာဝတီလမ်းဘက်မှ မြို့ရှောင်လမ်းဘက်သို့ မောင်းနှင်လာသည့် Toyota Crown ကားကို ရှာဖွေစစ်ဆေးရာ Happy Water မူးယစ်ဆေးဝါး ၁၂ ဒသမ ၆၃ ကီလို ကာလတန်ဖိုး ကျပ်သန်း ၁,၃၀၀ ကျော် (ကျပ် ၁ ဒသမ ၃၈ ဘီလီယံကျော်) ကို သိမ်းဆည်းရမိပြီး သယ်ဆောင်လာသူ အမျိုးသား ၂ဦးကို ဖမ်းဆီးရမိခဲ့ကြောင်း သိရသည်။
ထို့ပြင် စစ်ဆေးချက်အရ ညနေ ၆နာရီခွဲဝန်းကျင်တွင် တာချီလိတ်မြို့ မကာဟိုခမ်းရပ်ကွက် မိုတယ် တခုတွင် တည်းခိုနေသည့် ဝယ်လက်အမျိုးသမီးတစ်ဦးကို ဆက်လက်ဖမ်းဆီးရမိကြောင်း CCDAC Myanmar ထုတ်ပြန်ချက် အရသိရသည်။
အဆိုပါ ဖမ်းဆီးရမိသည့် Happy Water မူးယစ်ဆေးဝါးသည် လက်ရှိမှာ ထိုင်း-မြန်မာနယ်စပ် တာချီလိတ်မြို့ တရုတ်-မြန်မာနယ်စပ် မူဆယ်မြို့၊ လောက်ကိုင်မြို့ရှိ လူငယ်များသည် ဘား၊ ကလပ်များနှင့် KTV များတွင် လွယ်ကူစွာ ဝယ်ယူနိုင်သည့် မူးယစ်ဆေးဝါးဖြစ်သည်။
“ ကျနော် သိရသလောက်တော့ ဘားတိုင်း၊ KTV တိုင်းမှာ ဒီ Happy Water က ရှိတယ်။ အချို့ ဘီယာဆိုင်တွေမှာ တောင်ရှိတယ်။ ကျနော်ကိုယ်တွေ့ပါ။ ဘီယာဆိုင်မှာ ရှယ်ဆိုပြီး ရောင်းနေကြတာ။ ကျနော်တို့ ဒီနယ်စပ်မှာ အဲ့ဆေး မသုံးတဲ့သူ ရှားပါးသလောက်ပဲ။ လူငယ်တွေ တော်တော်များများသုံးတယ်။ ဒီဆေးကြောင့် အသက်သေတဲ့အထိရှိတယ်” တာချီလိတ်မြို့တွင်နေထိုင်သည့် လူငယ်တစ်ဦးက သျှမ်းသံတော်ဆင့်ကို ပြောသည်။
KTV၊ CLUB၊ BAR နှင့် စားသောက်ဆိုင်များတွင် လူငယ်များအားအန္တရာယ်ဖြစ်စေသည့် စိတ်ပြောင်းဆေးဝါးများ ဖြန့်ဖြူးရောင်းချနေမှုများကို ထိရောက်စွာတားဆီးနိုင်ရေးအတွက် စီမံချက်ချအကောင်အထည်ဖော်ဆောင်ရွက်လျက် ရှိနေသည် ဟု CCDAC Myanmar ဆိုထားသည်။
သို့သော် စစ်အာဏာသိမ်းပြီးနောက် မြန်မာနိုင်ငံ၏ နယ်စပ်မျဥ်းတလျောက်တွင် မူးယစ်ဆေးဝါးသည် လျော့ကျသွားခြင်း မရှိဘဲ ပိုပြီးများလာကာ လူငယ်များကြား မူးယစ်ဆေးအသစ်များ ထွက်ရှိလာပြီး သုံးစွဲနေကြသည်။