သျှမ်းပြည် ကျောက်မဲမြို့ရှိ မြို့တော်ခန်းမ အနီး ရပ်ကွက်အုပ်ချုပ်ရေးမှူးရုံး ဗုံးပေါက်ကွဲမှု ဖြစ်ပွားပြီး စည်ပင်အရာရှိအပါအဝင် သေဆုံးသူ (၂) ဦး၊ ရပ်ကွက်အုပ်ချုပ်ရေးမှူး ထိခိုက်ဒဏ်ရာ ရရှိကြောင်း စုံစမ်းသိရှိရသည်။
.
ယနေ့ (သြဂုတ် ၆) ရက် နေ့လည် ၁၂ နာရီဝန်းကျင်တွင် ကျောက်မဲမြို့ ရပ်ကွက် (၁) အုပ်ချုပ်ရေးမှူးရုံး၌ ရပ်ကွက် အုပ်ချုပ်ရေးမှူး အပါအဝင် သက်ဆိုင်ရာဌာနများ စည်းဝေးပြုလုပ်နေစဥ် ပေါက်ကွဲမှု ဖြစ်ပွားကြောင်း ကျောက်မဲဒေသခံ အမျိုးသမီးတစ်ဦးက သျှမ်းသံတော်ဆင့်ကိုပြောသည်။
“စည်ပင် အရာရှိ တစ်ယောက် နဲ့ EPC ဝန်ထမ်းတစ်ယောက် ဆုံးသွားတယ်လို့ သိရတယ်။ ရပ်ကွက်အုပ်ချုပ်ရေးမှူး ကတော့ သူ့လက်မှာ ဗုံးကျည် ထိမှန်သွားတယ်။ ခုလောလောဆယ် သိရသလောက်ကတော့ ၂ ယောက် သေဆုံးသွားတယ်။ ပုံမှန်က သူတို့ စည်းဝေးလုပ်ရင် ရပ်ကွက်အုပ်ချုပ်ရေးရုံးမှာ မလုပ်ဘူး။ ဗုံးကို လာပစ်သွားတယ်လို့တော့ ပြောကြတယ်။ သေနတ်လည်း ပစ်သွားတယ်” ဟု ကျောက်မဲဒေသခံ အမျိုးသမီးက ဆိုသည်။
လက်ရှိမှာ သက်ဆိုင်ရာ အာဏာပိုင်များ စစ်ဆေးမှု ပြုလုပ်နေပြီး ထိခိုက်ဒဏ်ရာ ရသူ နှင့် သေဆုံးသူများကို ကျောက်မဲဆေးရုံသို့ ပို့ဆောင်ထားကြောင်း သိရသည်။
“ဆေးရုံမှာတော့ ကားတွေ၊ လူတွေ ပြည့်နေတယ်။ အလောင်းကော ထိခိုက်ဒဏ်ရာ ရတဲ့သူတွေ အကုန်လုံး။ သတင်း အတိအကျတော့ မသိရသေးဘူး။ ခုက သတင်းအမှားတွေလည်း ဖြန့်နေကြတယ်။ လောလောဆယ်တော့ ကျမတို့ အတည်ပြုပြောနိုင်တာက သေဆုံးသူ ၂ ယောက် နဲ့ ထိခိုက်ဒဏ်ရာရတဲ့သူ ၁ ဦးပဲ ရှိသေးတယ်” ဟု အဆိုပါ အမျိုးသမီးက ဆက်ပြောသည်။
ရပ်ကွက်အုပ်ချုပ်ရေးမှူးရုံးတွင်း ဗုံးလာရောက် ပစ်သူကို မည်သူမည်ဝါ မသိရှိသေးပေ။ သျှမ်းသံတော်ဆင့်မှ ဆက်လက် ဆုံးစမ်းနေဆဲဖြစ်သည်။
ကျောက်မဲမြို့နယ်သည် စစ်ကောင်စီ အပါအဝင် တိုင်းရင်းသား လက်နက်ကိုင်များဖြစ်ကြသော ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ၊ တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) တို့ လှုပ်ရှားရာ နယ်မြေဖြစ်သည်။
ပြီးခဲ့သည့် ၂၀၂၂ ခုနှစ် ဧပြီလတွင်လည်း ကျောက်မဲမြို့ရှိ မြို့နယ်စည်ပင်သာယာရေးရုံးအနီး ဗုံးပေါက်ကွဲမှုဖြစ်ပွားခဲ့သည်။
အလားတူ ၂၀၂၂ ခုနှစ် အောက်တိုဘာ ၅ ရက်ညတွင်လည်း ကျောက်မဲမြို့ ခရိုင်ရုံးအတွင်း ဗုံးပေါက်ကွဲမှုဖြစ်ပွားပြီး အဆောက်အဦးပျက်စီးခဲ့ကြောင်း သိရသည်။
Leave a Comments