သျှမ်းပြည် တောင်ကြီးမြို့နယ် ပုံးအင်းဒေသတွင် နေထိုင်သည့် ပြည်သူများထံ ပအိုဝ်းပြည်သူ့စစ် (PNO) တပ်က ရှေ့တန်းရောက် တပ်သားများအတွက် ရိက္ခာထောက်ပံ့ကြေးဟုဆိုပြီး ငွေကြေးလာရောက် ကောက်ယူနေကြောင်း စုံစမ်းသိရသည်။
.
ပြီးခဲ့သည့် သြဂုတ်လ ၁ ရက်မှစပြီး ပုံးအင်းဒေသအတွင်း နေထိုင်သည့် ပြည်သူများထံ ရှေ့တန်းရောက်တပ်သားများ ထောက်ပံ့ကြေးဟုဆိုပြီး PNOမှ တအိမ်လျှင် ကျပ်ငွေ ၄၀၀၀ နှင့် ဆန် ၂ ပြည်ထည့်ပေးခဲ့ရကြောင်း ပုံးအင်း ဒေသခံ တောင်သူအမျိုးသမီး တစ်ဦးက သျှမ်းသံတော်ဆင့်ကို ပြောသည်။
လက်ရှိမှာ ကုန်စျေးနှုန်းများလည်း မြင့်တက်လာနေချိန် လယ်ယာလုပ်ငန်းလည်း ကောင်းမွန်စွာ မလုပ်နိုင်ချိန်မှာ PNO တပ်ဖွဲ့က ခေါင်းစဥ်အမျိုးမျိုးဖြင့် ငွေကြေးလာရောက်ကောက်ယူမှုအပေါ် အဆင်မပြေဖြစ်နေကြောင်း၊ အခက်အခဲများရှိနေကြောင်း ပုံးအင်း တောင်သူက ဆိုသည်။
“ဆန်တွေ ဝယ်စားရတဲ့ သူတွေအတွက်တော့ အခက်ခဲရှိတာပေါ့။ အခုထည့်ဖို့ပြောလာတော့ ညည်းနေကြတယ်။ လယ်မလုပ်နိုင်တော့ တချို့က ထိုင်းရောက်နေတဲ့ သား၊ သမီးကိုပဲ အားကိုးရတယ်။ သား၊ သမီးတွေ ပို့လာပေးတဲ့ ပိုက်ဆံနဲ့ ဆန်တွေ ဝယ်စုထားရတယ်။ တချို့လည်း ဆန်ကို ဘူးနဲ့ ဝယ်ဝယ်စားနေတဲ့သူလည်း ရှိတယ်။ သူတို့လည်း မတတ်နိုင်ဘူး ထည့်ပေးရတာပဲ “ ဟု ၎င်း အမျိုးသမီးတစ်ဦးက ပြောသည်။
အဆိုပါ ရိက္ခာထောက်ပံ့ရေးအတွက် သြဂုတ် ၉ ရက်၌ နောက်ဆုံးထားပြီး ရွာအလိုက် ရွာသူကြီးများမှ တစ်ဆင့် ကျေးရွာအုပ်စုမှ ရွာသူကြီးထံသို့ ပို့ပေးရန် ညွှန်ကြားခဲ့ကြောင်း သိရသည်။
ယခင်က ပုံးအင်းဒေသတွင် ရိက္ခာထောက်ပံ့ရေးအတွက် PNO တပ်ဖွဲ့ထံ ပေးဆောင်ရခြင်း မရှိသလောက် နည်းပါးခဲ့သော်လည်း စစ်တပ် အာဏာသိမ်းပြီးနောက်ပိုင်းမှသာ ပြည်သူ့စစ် PNO သည် ရိက္ခာထောက်ပံ့ပေးဖို့ မကြာခဏ ညွှန်ကြားလာနေကြောင်း သိရသည်။
“ အရင်ကတော့ ဒီလိုထည့်ရတယ်ဆိုတာ မရှိဘူး။ အခုနောက်ပိုင်းမှ ဆန်ထည့်ဖို့၊ ပိုက်ဆံထည့်ဖို့ ပြောလာတာ။ အရင်နှစ် နဲ့ ဒီနှစ်နဲ့ဆို ၂ ကြိမ်ရှိပြီ သူတို့ကို ထည့်ပေးရတာ “ ဟု ပုံးအင်းဒေသခံ အမျိုးသမီးတစ်ဦးက ထပ်လောင်းပြောသည်။
ထို့အပြင် ပြီးခဲ့သည့် ၂၀၂၂ မေလ ၂၃ ရက်တွင် ဆီဆိုင်မြို့နယ်အတွင်းရှိ ကျေးရွာနေ ပြည်သူများကို PNO မှ အစည်းအဝေး ခေါ်ပြီး တစ်အိမ်ကို ကျပ်ငွေ ၃ သောင်း နှင့် ဆန်တစ်ပြည် ထည့်ပေးရန် နှင့် ကျေးရွာတစ်ခုလျှင် အမျိုးသား လူငယ် အယောက် ၂၀ ပေးရန် စေခိုင်းညွှန်ကြားမှုများ ပြုလုပ်ခဲ့ဖူးကြောင်း သိရသည်။
