သျှမ်းပြည် မူဆယ်မြို့နယ်အတွင်း စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေး တပ်ဖွဲ့ (TNLA) နှင့် ထိတွေ့တိုက်ပွဲတွင် စစ်ကောင်စီ ဘက်မှ အသေအပျောက်များနေကြောင်း သတင်းရရှိသည်။

.

သြဂုတ်လ (၂) ရက်တွင် မူဆယ်မြို့နယ် စယ်လန့်ကျေးရွာအုပ်စုမှ နှစ်ဖက်တပ် တိုက်ပွဲကြား၌ စစ်ကောင်စီ တပ်ဖွဲ့ဝင် နှင့် ပြည်သူ့စစ်တပ်ဖွဲ့ဝင် များ၏ ရုပ်အလောင်း ၁၀ လောင်းအပြင် လက်နက် ခဲယမ်း အများအပြား သိမ်းဆည်းနိုင်ခဲ့ ကြောင်း TNLA တပ်ဖွဲ့က ထုတ်ပြန်လာသည်။

“သိမ်းဆည်းရမိခဲ့တဲ့ လက်နက်ခဲယမ်းတွေမှာ RPG ၁ လက်၊ RPG-7 ဗုံးသီး ၂၀ လုံး၊ MA-1 ၁ လက်၊ AK-81 ၁ လက်၊ ၆၀ မမ ထောင့် ၁ ခု၊ ၈၁ မမ ထောင့် ၁ ခု၊ ၈၁ မမ ဗုံးသီး ၄၀ လုံး၊ စက်လတ် ၁ လက်၊ ကျည်ဆံ ၅၀၀၀ တောင့်၊ ဆက်သွယ်ရေးစက်ကြီး ၁ လုံးနဲ့ အခြားစစ်အသုံးအဆောင်ပစ္စည်း အမြောက်အများ ပါဝင်ကြောင်း” TNLA တပ်ဖွဲ့က ထုတ်ပြန်ထားသည်။

အာဏာသိမ်းစစ်ကောင်စီ၏ တပ်မ (၉၉) လက်အောက်ခံ ခမရ ၄၂၀၊ အမှတ် (၂) စစ်ဆင်ရေး ကွပ်ကဲမှု ဌာနချုပ် လက်အောက်ခံ ခလရ – ၂၆၁၊ ၄၂၁ နှင့် နမ့်ခမ်းမြို့မ ပြည်သူ့စစ်တို့၏ ပူးပေါင်းအင်အား ၂၀၀ ကျော်တို့သည် TNLA တပ်မဟာ (၁) လက်အောက်ခံ တပ်နှင့် တနေကုန်နီးပါး တိုက်ပွဲဖြစ်ပွားခဲ့ကြောင်း လည်း အဆိုပါ ထုတ်ပြန်ချက် အရ သိရသည်။

ထို့အပြင် အဆိုပါ တိုက်ပွဲအတွင်းမှာ စစ်ကောင်စီ နှင့် ပြည်သူ့စစ် ပူးပေါင်းတပ်သားတချို့က စယ်လန့် ကျေးရွာ အုပ်စုထဲသို့ ၁၀ ယောက်ကျော် ထွက်ပြေးလာခဲ့ကြောင်းလည်း ဒေသခံများထံမှ သိရသည်။

“ပြေးလာတဲ့ တချို့က အရပ်ဝတ်နဲ့ ဆိုတော့ ပြည်သူ့စစ်တွေ ဖြစ်လောက်တယ်၊ စစ်ဝတ်စုံနဲ့ ပြေးလာ တာလည်း ရှိတယ်၊ စုစုပေါင်း ၁၀ ယောက်ထက်မနည်း ရွာထဲကို ဖြတ်ပြေးသွားတာ၊ သေနတ် ကိုယ်စီ နဲ့ပဲ၊ သူတို့ကိုလည်း TNLA က ပြန်ဖမ်းမိသွားတယ်လို့လည်း ကြားမိတယ်” ဟု ဒေသခံများက သျှမ်းသံတော်ဆင့်ကို ပြောသည်။

ဇူလိုင်လ (၂၃) ရက်နေ့မှ သြဂုတ်လ (၂) ရက်နေ့အထိ TNLA တပ်ဖွဲ့ နှင့် စစ်ကောင်စီ တပ်ဖွဲ့အကြား တိုက်ပွဲ စုစုပေါင်း (၉) ကြိမ် ဖြစ်ပွားခဲ့ပြီး ထိုတိုက်ပွဲအတွင်းတွင် စစ်ကောင်စီ နှင့် ပူးပေါင်းသည့် ပြည်သူ့စစ်တပ်ဖွဲ့ဝင်များ (၂၅) ဦး သေဆုံးကာ (၂၇) ဦး ဒဏ်ရာရရှိ၊ (၁)ဦးကို TNLA မှ အရှင်ဖမ်းဆီးရ မိခဲ့ကြောင်းလည်း TNLA တပ်ဖွဲ့မှ ထုတ်ပြန်ထားသည်။

အာဏာသိမ်း စစ်ကောင်စီတပ် နှင့် TNLA တပ်ဖွဲ့တို့သည် မူဆယ်မြို့နယ်အတွင်း နေ့စဥ်နီးပါး တိုက်ပွဲဖြစ်ပွားသည် သာမက ကွတ်ခိုင်မြို့နယ်၊ လားရှိုးမြို့နယ်၊ ကျောက်မဲမြို့နယ် စသည့် မြို့နယ်များမှာလည်း နှစ်ဖက် ထိတွေ့ တိုက်ပွဲတွေ ရှိနေခြင်းဖြစ်သည်။