သျှမ်း – ကရင်နီ (ကယား) တကြောတိုက်ပွဲကြောင့် အရပ်သား သေဆုံးမှုနှုန်းမြင့်တက်လာနေကြောင်း စုံစမ်းသိရသည်။
.
စစ်တပ် အာဏာသိမ်းပြီးနောက်ပိုင်း သျှမ်းပြည် နယ်စပ်ဒေသ နှင့် ကရင်နီ (ကယား) ပြည်တွင် စစ်ရေး၊ နိုင်ငံရေး၊ လူ့အခွင့်အရေး ချိုးဖောက်ခံရခြင်း နှင့် ပတ်သက်၍ အရပ်သား (၃၇၅) ဦး သေဆုံးခဲ့ရပြီး စစ်ရှောင် (၁၄၁) ဦး သေဆုံးကာ လေကြောင်းတိုက်ခိုက်မှု (၅၇၂) ကြိမ် ရှိခဲ့ကြောင်း တိုးတက်သောကရင်နီ ပြည်သူ့အင်အားစု (PKPF)က သြဂုတ် ၁ ရက်တွင် ထုတ်ပြန်ထားသည်။
ပြီးခဲ့သည့် ၂၀၂၃ ဧပြီလမှစ၍ အရပ်သား သေဆုံးမှု လူဦးရေ စုစုပေါင်း (၃၁၈) ဦး ရှိခဲ့ပြီး ဇူလိုင်လအတွင်း အရပ်သား သေဆုံးမှုသည် လူဦးရေ စုစုပေါင်း (၃၇၅) ဦးထိ မြင့်တက်လာသောကြောင့် (၃) လသာကာလအတွင်း အရပ်သား သေဆုံးမှု ၅၇ ဦး ရှိလာခဲ့ကြောင်း သိရသည်။
ထို (၃) လသာ ကာလအတွင်း အရပ်သားသေဆုံးမှု အများဆုံးသည် (ဇွန်လ) ဖြစ်၍ အရပ်သားသေဆုံးသူ စုစုပေါင်း ၃၉ ဦး ရှိခဲ့သည်။
အဆိုပါ အရပ်သားသေဆုံးမှု နှင့် ပတ်သက်ပြီး တိုက်ပွဲဖြစ်ပွားရာ နယ်မြေဒေသအတွင်း စစ်ကောင်စီသည် အရပ်သားများကို ဖမ်းဆီးခေါ်ဆောင်ပြီး သတ်ဖြတ်ခြင်း၊ လေကြောင်းတိုက်ခိုက်မှုကြောင့် သေဆုံးရခြင်း၊ မိုင်းနင်းမိခြင်းကြောင့် သေဆုံးခြင်းနှင့် လက်နက်ကြီး၊ လက်နက်ငယ် ပစ်ခတ်မှုကြောင့် သေဆုံးရခြင်း ဖြစ်ကြောင်း တိုးတက်သော ကရင်နီ ပြည်သူ့အင်အားစု (PKPF) မှ တာဝန်ခံတစ်ဦးက သျှမ်းသံတော်ဆင့်ကို ပြောသည်။
“အများဆုံးကတော့ စစ်ကောင်စီဖမ်းဆီး သတ်ဖြတ်ခံရသူတဲ့တွေ အများဆုံးပဲ ၂၃၉ ယောက်လောက်ရှိတယ်။ နောက်ပြီး စစ်ကောင်စီ လက်နက်ကြီး ရမ်းသမ်းပစ်ခတ်လို့ လက်နက်ကြီး ကျည်ထိမှန်ပြီး သေဆုံးတဲ့ပြည်သူက ၇၈ ယောက်ရှိတယ်။ ကျန်တာတော့ မိုင်းနင်းမိလို့ သေဆုံးတဲ့သူတွေ၊ လေကြောင်းတိုက်ခံရလို့ သေဆုံးရတာတွေပေါ့ “ ဟု ၎င်းတာဝန်ခံ တစ်ဦးက ပြောသည်။
ထုတ်ပြန်ချက်ထဲ၌ လက်လှမ်းမှီသလောက်သာ ပြုစုထားခြင်း ဖြစ်သောကြောင့် မြေပြင်အခြေအနေ နှင့် အနည်းငယ် ကွဲလွဲနေနိုင်သလို ပြုစုထားတာထက် သေဆုံးမှု များနေနိုင်ကြောင်းလည်း ၎င်းကဆိုသည်။
အလားတူ သျှမ်း – ကရင်နီ (ကယား) ပြည်နယ်စပ်ဒေသ မိုးဗြဲမြို့တွင် စစ်တပ်အာဏာသိမ်းပြီးချိန်မှစပြီး ဇွန်လ ၁၇ ရက်အထိ စစ်ကောင်စီ နှင့် ပြည်သူ့ကာကွယ်ရေး PDF ပူးပေါင်းတပ်ဖွဲ့တို့အကြား တိုက်ပွဲ စုစုပေါင်း ၆၁ ကြိမ် ဖြစ်ပွားပြီး အရပ်သား ၆၆ ဦး သေဆုံးခဲ့ရသည်။
လက်ရှိအချိန်ထိ သျှမ်း – ကရင်နီ (ကယား) ပြည် နယ်စပ်ဒေသ ဖယ်ခုံ၊ မိုးဗြဲ ဒေသတွင် စစ်ကောင်စီနှင့် ပြည်သူ့ကာကွယ်ရေး PDF ပူးပေါင်းတပ်ဖွဲ့တို့အကြား တိုက်ပွဲဆက်လက်ဖြစ်ပွားနေလျက်ရှိသောကြောင့် လူဦးရေ ၁ သိန်းဝန်းကျင်ရှိ စစ်ဘေးရှောင်များ ထွက်ပြေးတိမ်းရှောင်နေရဆဲဖြစ်ကြောင်း သိရသည်။
“ ကျမ လိပ်ခေါင်း ဖြစ်နေတာ ဆေးမသောက်ရတာ ၂ လရှိပြီ။ အလှူရှင်ကမရှိ၊ ဝင်ငွေကလည်းမရှိတော့ ဆေးဝယ်မသောက်ရဘူး။ အခုတလော ရောဂါက ပြန်ဖြစ်လာတယ်။ ရောဂါပြန်ဖြစ်လာတော့လည်း နာနာနဲ့ ခံရတာပေါ့ “ ဟု ဖယ်ခုံမြို့နယ် စစ်ဘေးရှောင်တစ်ဦးက ပြောသည်။
ယင်းကဲ့သို့ ဆေးဝါးလုံလောက်မှု မရှိသောကြောင့် တောတောင်အတွင်း ထွက်ပြေးတိမ်းရှောင်နေရသည့် စစ်ရှောင်များသည် အချိန်မှီဆေးဝါး မကုသခြင်းဖြင့် သေဆုံးခဲ့ရပြီး အာဏာသိမ်းပြီး ၃ နှစ် ကာလအတွင်း နေ့စဉ်စစ်ရှောင်သေဆုံးမှု စာရင်းထဲ၌ ၁၄၁ ဦးအထိ ရှိလာခဲ့သည်။
စစ်တပ်အာဏာသိမ်းပြီးနောက်ပိုင်း သျှမ်း – ကရင်နီ (ကယား) ပြည် နယ်စပ်ဒေသ ဖယ်ခုံ၊ မိုးဗြဲ နှင့် ပင်လောင်းမြို့နယ်ဒေသများတွင် စစ်တပ်က နယ်မြေပြန်လည် ထိန်းချုပ်ချင်ရာမှ စစ်ကြောင်းထိုးခြင်း၊ လေကြောင်းတိုက်ခိုက်ခြင်းနှင့် လက်နက်ကြီးများဖြင့် ပစ်ခတ်ခြင်း ပြုလုပ်နေသောကြောင့် တိုက်ပွဲသည် နေ့စဉ်ရက်ဆက်လိုပင် ဖြစ်ပွားနေကြောင်း ပြည်သူ့ကာကွယ်ရေးတပ်ဖွဲ့များထံမှ သိရသည်။
