သျှမ်းပြည် တောင်ကြီးခရိုင်၊ ရွာငံမြို့နယ် ဒေသခံ အမျိုးသား (၄) ဦးကို ဓနုပြည်သူ့ လွတ်မြောက်ရေး တပ်ဦး (DPLA) နှင့် ပတ်သက်သည်ဟုဆိုပြီး စစ်ကောင်စီမှ လာရောက်ဖမ်းဆီးသွားကြောင်း စုံစမ်း သိရသည်။
.
ဇူလိုင်လ (၃၁) ရက်နေ့ ညပိုင်းအချိန်တွင် ရွာငံမြို့နယ်မှ လွှစင်ကျေးရွာ နှင့် ပဲရင်းတောင်ကျေးရွာမှ အမျိုးသား (၄) ဦးကို DPLA နှင့် ပတ်သက်မိသည် ဆိုသည့် စွပ်စွဲချက်ဖြင့် စစ်ကောင်စီ တပ်ဖွဲ့ နေအိမ်အသီးသီးတွင် လာရောက် ဖမ်းဆီးသွားကြောင်း ဒေသခံများက သျှမ်းသံတော်ဆင့်ကို ပြောသည်။
“စစ်သားတွေက ကားတစ်စီး နဲ့ ဆိုင်ကယ် ၅/၆ စီးနဲ့ လာကြတယ်၊ ပျူစောထီးတွေလည်း ပါလာတယ်၊ အားလုံးက သေနတ်ကိုယ်စီ နဲ့ လာကြတာ၊ လွှစင်ရွာက ၂ ဦး ဖမ်းသွားတယ်၊ တစ်ဦးက သူ့အဖေကို မတွေ့လို့ သားဖြစ်သူကို ဖမ်းသွားတာ၊ သူတို့ အိမ်တွေကိုလည်း မီးရှို့ဖျက်ဆီးသွားတယ်” ဟု ဒေသခံများက သျှမ်းသံတော်ဆင့်ကို ပြောသည်။
လွှစင်ကျေးရွာမှ ဖမ်းဆီးခံရသူများသည် အသက် (၃၀) ဝန်းကျင် ကိုမြင့်ဦး နှင့် ကိုဝင်းသိန်း တို့ဖြစ်ကြပြီး ကိုဝင်းသိန်းသည် ဖခင်ဖြစ်သူ ဦးဘဝေ အစား ဖမ်းဆီးခံရခြင်း ဖြစ်ကြောင်း သိရသည်။
ထို့အပြင် ဦးဘဝေ၏ အိမ်တွင်း ပစ္စည်းများကိုလည်း ရိုက်နှက်ဖျက်ဆီးသည့် အပြင် အိမ်ကိုပါ မီးရှို့ဖျက်ဆီးသွားခဲ့သည်။
အလားတူပင် လွှစင်ကျေးရွာတွင်း စစ်ကြောင်း ဝင်ရောက်ဖမ်းဆီးပြီးသည့်နောက်တွင် ပဲရင်းတောင်ကျေးရွာမှ ဒေသခံများကိုလည်း ဝင်ရောက်ဖမ်းဆီး၊ နေအိမ်ကို မီးရှို့မှု ရှိခဲ့ကြောင်းလည်း ဒေသခံများက ဆက်ပြောသည်။
“ပဲရင်းတောင်က ဖမ်းဆီးခံရတာ ၂ ဦးလို့ပဲ သိရပေမဲ့ အဲ့ထက်ပိုနိုင်တယ်၊ သူတို့ကို DPLA နဲ့ ပတ်သက်တယ် ဆိုပြီး တော့ လာဖမ်းကြတာ၊ အိမ်မှာလည်း စစ်ဆေးမေးမြန်းမှုတွေ လုပ်သွားသေးတယ်။ ဒါပေမဲ့ သူတို့က ရပ်ရွာထဲမှာ အေးအေး ဆေးဆေးနေကြသူတွေပါ၊ တော်လှန်ရေး နဲ့ ပတ်သက်ပြီး ဘာမှ မလုပ်ပါဘူး” ဟု အသက် ၃၀ ကျော် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပဲရင်းတောင်မှ ဖျက်ဆီးရသည့် နေအိမ်သည် ဦးတင်ဦး ဆိုသူ၏ နေအိမ်ဖြစ်ပြီး ၎င်းကိုလည်း အာဏာသိမ်း စစ်ကောင်စီ တပ်ဖွဲ့မှ ဖမ်းဆီးခေါ်ဆောင်သွားပြီး မိသားစုဝင်များကို အိမ်ပြင် ထွက်ခိုင်းကာ အိမ်ကို မီးရှို့ခဲ့ ကြောင်း ဒေသခံများထံမှ သိရသည်။
ယင်းကဲ့သို့ ဒေသခံများကို ဖမ်းဆီးပြီး နေအိမ်ကို မီးရှို့ဖျက်ဆီးခြင်းသည် ပြီးခဲ့သည့် ဇူလိုင်လ (၂၉) ရက်နေ့တွင် ဖွဲ့စည်းကြောင်း ထုတ်ပြန်လိုက်သည့် ဓနုပြည်သူ့လွတ်မြောက်ရေးတပ်ဦး (DPLA) နှင့် ပတ်သက်သည်ဟု စစ်ကောင်စီများက ပြောဆိုနေကြသည်။
ပဲရင်းတောင်ရွာကျေးရွာသည် ၂၀၂၂ ခုနှစ်၊ ဧပြီလတွင် လေကြောင်းတိုက်ခိုက်မှု ခံခဲ့ရပြီး ဒေသခံ ရွာသား ၉ ဦးကိုလည်း စစ်ကောင်စီမှ PDF ဟု စွပ်စွဲပြီး အစုအပြုံလိုက် သတ်ဖြတ်ခဲ့သည့် ကျေးရွာလည်း ဖြစ်သည်။
Leave a Comments