သျှမ်းပြည် မူဆယ်ခရိုင်၊ ကွတ်ခိုင်မြို့နယ် အခြေစိုက် စစ်ကောင်စီတပ်သည် ဒေသခံ နှစ်ဦးကို ဖမ်းဆီးပြီး တစ်ဦးကို သေနတ်ဖြင့် ပစ်ခဲ့ကြောင်း စုံစမ်း သိရသည်။
ဇူလိုင်လ ၂၉ ရက်နေ့ ညပိုင်းအချိန်တွင် ကွတ်ခိုင်မြို့နယ် မန်နောင်ကျေးရွာ ဘုန်းကြီးကျောင်း အနောက်ဘက် တောအုပ်မှ တစ်ဆင့် စစ်ကောင်စီ စစ်ကြောင်းတစ်ခုသည် ဘုန်းကြီးကျောင်းဝန်းထဲ အရပ်သား ၂ ဦးကို ဖမ်းခေါ်လာပြီး တစ်ဦးကို သေနတ်ဖြင့် ပစ်ခဲ့ကြောင်း ဒေသခံများက သျှမ်းသံတော်ဆင့်ကို ပြောသည်။
“ညမှောင်ရီ စပျိုးအချိန်ဆိုတော့ ဘယ်သူဘယ်ဝါမှန်း သဲသဲကွဲကွဲတော့ မသိရဘူး၊ စစ်ဆေးမေးမြန်းတဲ့ ပုံစံတော့ တွေ့ရတယ်၊ ကိုရင်တွေ ဦးဇင်းတွေ အကုန်လုံးကို ကျောင်းဝင်းထဲပဲနေဖို့ အော်ပြီး အမိန့်ပေးတယ်၊ ပြီးတော့ တစ်ဦးကို သေနတ်နဲ့ ပစ်လိုက်တယ်၊ သေသလား ရှင်သလားတော့ မသိရဘူး၊ ခဏအကြာတော့ အဲ့စစ်ကြောင်း ကလည်း ပြန်ထွက်သွားတယ်” ဟု ဒေသခံများက သျှမ်းသံတော်ဆင့်ကို ပြောသည်။
စစ်ကောင်စီ စစ်ကြောင်း ပြန်လည်ထွက်သွားချိန်တွင် အရပ်သား နှစ်ဦးကိုလည်း ၎င်းတို့နှင့် အတူ ပြန်လည် ဖမ်းဆီးခေါ်ဆောင်သွားပြီး သွေးကွက်ကို ခြေထောက်ဖြင့် မြေအနည်းငယ်ဖြင့် ဖုံးခဲ့ကြောင်း ဒေသခံများထံမှ သိရသည်။
အဆိုပါ ဖမ်းဆီးခံရသည့် အရပ်သား ၂ ဦးသည် မည်သည့်ကျေးရွာမှ ဖြစ်ကြောင်းကို သျှမ်းသံတော်ဆင့်မှ ဆက်လက် စုံစမ်းနေဆဲဖြစ်သည်။
ထို့အပြင် ပြီးခဲ့သည့် ဇူလိုင် ၂၅ ရက်တွင်လည်း တီးမဒေသခံ အရပ်သား ကချင်လူငယ် (၂) ဦးကို စစ်ကောင်စီ တပ်ဖွဲ့မှ ဖမ်းဆီးခေါ်ဆောင်သွားပြီး ယနေ့အထိ အဆက်အသွယ် မရကြောင်းလည်း ဒေသခံများထံမှ သိရသည်။
“အကြောင်းရင်းမသိ ဖမ်းဆီးသွားတာပဲ၊ အခုထိလည်း ဘယ်နေရာကို ဖမ်းဆီးသွားလည်း ဆိုတာတွေကို မိသားစု ဝင်တွေက မသိရသေးဘူး၊ စစ်ကောင်စီဘက်က လက်နက်ကြီးတွေကို နေ့စဥ်ရက်ဆက်ပစ်တာ၊ ကျေးရွာတွေ ထဲကိုလည်း ဝင်ပြီးတော့ လူတွေကို ဖမ်းပြီး စစ်ဆေးတာက နေ့တိုင်းရှိတယ်” ဟု ဒေသခံများက ပြောသည်။
ဇူလိုင်လအတွင်း စစ်ကောင်စီတပ်ဖွဲ့၏ လက်နက်ကြီးများ ရမ်းသမ်းပစ်ခတ်မှုကြောင့် နမ့်ဖတ်ကာမှ ဒေသခံ အမျိုးသမီး (၁) ဦး ၊ လူငယ် (၁) ဦး သေဆုံးကာ ၊ နမ့်အွမ်ကျေးရွာအုပ်စု ဆိုင်းခေါင်(ဝ်) မှ အရပ်သား အမျိုးသား (၁) ဦးလည်း သေဆုံးရပြီး အလောင်းကို စစ်ကောင်စီ တပ်သားများ လုယူသွားခဲ့သည်။
ဇူလိုင်လ ပထမပတ်အတွင်းမှ စတင်ကာ အာဏာသိမ်း စစ်ကောင်စီ တပ်ဖွဲ့သည် သျှမ်းပြည်အတွင်း အခြေစိုက် လှုပ်ရှားသည့် တိုင်းရင်းသား လက်နက်ကိုင် တပ်ဖွဲ့များ နှင့် ထိတွေ့တိုက်ပွဲ ဖြစ်ပွားမှု ခပ်စိပ်စိပ် ဖြစ်လာသည်။
Leave a Comments