သျှမ်းပြည် မူဆယ်မြို့နယ် စယ်လန့်ကျေးရွာအနီး စစ်ကောင်စီ နှင့် တအာင်း (ပလောင်) အမျိုးသားလွတ်မြောက် ရေး တပ်မတော် (TNLA) တို့ အကြား စစ်အင်အားဖြည့်တင်းမှု အပြိုင်အဆိုင် ပြုလုပ်နေပြီး စစ်ရေးတင်းမာနေဆဲ ဖြစ်ကြောင်း သတင်း သိရသည်။
ပြီးခဲ့သည့် ဇူလိုင် ၂၉ ရက်မှစပြီး မူဆယ်မြို့နယ် စယ်လန့်ကျေးရွာအနီး၌ တိုက်ပွဲပြန်လည် ဖြစ်ပွားပြီးနောက် စစ်ကောင်စီတပ်သားများ နှင့် TNLA တပ်သားများသည် ကျေးရွာအတွင်း ဝင်ရောက်နေထိုင်ခဲ့ပြီး လက်ရှိအချိန်ထိ ထွက်ခွာသွားခြင်း မရှိသေးသောကြောင့် တိုက်ပွဲ ဆက်လက်ဖြစ်ပွားမည်ကို စိုးရိမ်နေကြောင်း စယ်လန့်ဒေသခံ အမျိုးသမီးတစ်ဦးက ပြောသည်။
“အခုထိ ကားလမ်းမဘေး နဲ့ သင်္ချိုင်းအနားမှာ ရှိသေးတယ်။ ရွာထဲမှာတော့ ရှိနေတာ မတွေ့ရတော့ဘူး။ ကျမတို့လည်း အိမ်ထဲကနေ အပြင်ကို မထွက်ရဲဘူး။ တံခါးလည်း မဖွင့်ရဲဘူး။ သူတို့ ဝင်လာမှာကို အရမ်းကြောက်တယ်။ တိုက်ပွဲဆက်ဖြစ်မှာလည်း ကြောက်တယ် “ ဟု ၎င်း အမျိုးသမီးတစ်ဦးက ပြောသည်။
အဆိုပါ စယ်လန့်ကျေးရွာအနီး လက်နက်ကိုင်တပ်ဖွဲ့များ နေထိုင်လျက်ရှိသောကြောင့် ဒေသခံများသည် ဝါတွင်းကာလတွင် ဘုန်းကြီးကျောင်း အလှူဒါန သွားပြုလုပ်ရန် စိုးရိမ်ကြောက်လန့်နေကြကြောင်း သိရသည်။
“အခု အချိန်ထိ ကြောက်နေရတုန်းဆိုတော့ ဘုန်းကြီးကျောင်းတက်ပြီး အလှူလုပ်ဖို့ကလည်း သူများကို စောင့်ကြည့်ရသေးတယ်။ ဒီနေ့ ညနေဆိုရင် ဘုန်းကြီးကျောင်းတက်ပြီး အလှူသွားလုပ်ရမယ့် ရက်လေ။ တချို့လည်း မသွားရဲဘူး။ စားဖို့သောက်ဖို့လည်း ဝယ်စုထားရတယ် “ ဟု စယ်လန့် အမျိုးသမီးတစ်ဦးက ထပ်လောင်းပြောသည်။
တိုက်ပွဲသည် ပြီးခဲ့သည့် ဇူလိုင် ၂၃ ရက်မှစ၍ ရက်ဆက် ဖြစ်ပွားခဲ့သောကြောင့် ဒေသခံများသည် တရုတ်နိုင်ငံ အတွင်းသို့ အပါအဝင် မူဆယ်မြို့ နှင့် ဆွေမျိုးမိတ်ဆွေရှိရာသို့ ထွက်ပြေးခိုလှုံနေကြပြီး တစ်ဖက်မှာ တိုက်ပွဲပြင်းထန်မှုကြောင့် တိုက်ပွဲအတွင်း ပိတ်မိနေသူများလည်း ရှိနေကြောင်း သိရသည်။
အလားတူ ဇူလိုင် ၂၅ ရက်တွင် စစ်ကောင်စီ တပ်ဖွဲ့မှ နမ့်အွမ်ကျေးရွာအုပ်စု ဆိုင်းခေါင် (ဝ်) ရွာအနီးကို ဗုံးကြဲတိုက်ခိုက်မှုကြောင့် နေအိမ်တချို့ ထိခိုက်ပျက်စီးရသည့်အပြင် အသက် ၄၀ နှစ်အရွယ် အမျိုးသားတစ်ဦး လက်နက်ကြီးထိမှန် သေဆုံးသွားခဲ့ရသည်။
Leave a Comments