သျှမ်းပြည် ကွတ်ခိုင်မြို့နယ်၊ နမ့်ဖတ်ကာကျေးရွာအုပ်စု အခြေစိုက် စစ်ကောင်စီ တပ်ဖွဲ့၏ လက်နက်ကြီးဖြင့် ရမ်းသမ်းပတ်ခတ်မှုကြောင့် အရပ်သား တစ်ဦးသေ တစ်ဦးဒဏ်ရာ ရသွားကြောင်း စုံစမ်းသိရသည်။
ဇူလိုင်လ ၂၉ ရက် ည ၉ နာရီခွဲဝန်းကျင်တွင် နမ့်ဖတ်ကာ အခြေစိုက် စစ်ကောင်စီတပ် အမှတ် ခလရ ၁၂၃ တပ်ကုန်းမှ လက်နက်ကြီးများဖြင့် ရမ်းသမ်းပစ်ခတ်မှုကြောင့် နမ့်ဖတ်ကာကျေးရွာ အုပ်စုမှ ၊ လွယ်ကုန်းကျေးရွာတွင် လက်နက်ကြီးများ ကျရောက်ပေါက်ကွဲခဲ့ကြောင်း ဒေသခံများက သျှမ်းသံတော်ဆင့်ကို ပြောသည်။
“လက်နက်ကြီး ပစ်တာကတော့ မွန်းလွဲပိုင်းကတည်းက ညအထိ နားလိုက်ပစ်လိုက် နဲ့ တစ်နေကုန်ပဲ၊ ည ၉ နာရီလောက်မှာ ရွာထဲကို လက်နက်ကြီးတွေ စကျကွဲတယ်၊ အိမ်တစ်လုံးပေါက်ကို လက်နက်ကြီး ကျပြီး အဲ့မိသားစုဝင်တွေ ထိသွားတယ်။ တစ်ဦးသေ၊ နှစ်ဦးက ဒဏ်ရာရသွားတယ်” ဟု ဒေသခံများက သျှမ်းသံတော်ဆင့်ကို ပြောသည်။
စစ်ကောင်စီ၏ လက်နက်ကြီးများသည် လူနေအိမ်ပေါ် ကျရောက်ပေါက်ကွဲသည့်အပြင် ရွာလမ်း နှင့် ဒေသခံများ၏ ယာခင်းအတွင်း ကျရောက်ပေါက်ကွဲမှုလည်း ရှိနေကြောင်း သိရသည်။
လက်နက်ကြီးကြောင့် ထိခိုက်ဒဏ်ရာရသူများကို ဒေသအတွင်း လူမှုကူညီရေးအသင်းတစ်ခုမှ လာရောက်သယ်ဆောင်ပေးပြီး ကွတ်ခိုင်မြို့ရှိ ပြည်သူ့ဆေးရုံသို့ ပို့ဆောင်ပေးခဲ့ကြောင်းလည်း ဒေသခံများက ဆက်ပြောသည်။
“လက်နက်ကြီး ထိတဲ့သူ ရှိတယ်ဆိုပြီးတော့ အိမ်နီးချင်းတွေကနေ လူမှုကူညီရေးအသင်းကို ဖုန်းဆက် ပြောတာပါ၊ သူတို့လာခေါ်တဲ့အချိန်ကတော့ ည (၁၀) နာရီကျော် လက်နက်ကြီးအသံတွေလည်း ကြားနေ ရဆဲပဲ” ဟု ဒေသခံများက သျှမ်းသံတော်ဆင့်ကို ပြောသည်။
နမ့်ဖတ်ကာ အခြေစိုက် ခလရ (၁၂၃) ပစ်လိုက်သည့် လက်နက်ကြီးကြောင့် သေဆုံးသူသည် အသက် (၆၀) အရွယ် ဒေါ်အေးအိုင် ဖြစ်ပြီး၊ ထိခိုက်ဒဏ်ရာရသူများက ဒေါ်အေးဝမ်း အသက် (၄၀) နှင့် မပပဝင်း အသက် (၁၅) နှစ်တို့ ဖြစ်ကြကြောင်းလည်း သိရသည်။
ယခုရက်ပိုင်းအတွင်းတွင် မူဆယ်ခရိုင်အတွင်း အခြေစိုက်လှုပ်ရှားသည့် စစ်ကောင်စီ တပ်ဖွဲ့များမှ လက်နက်ကြီး/ လက်နက်ငယ်များ ရမ်းသမ်းပစ်ခတ်မှု နေ့စဥ်ရက်ဆက် ရှိလာခဲ့ကြောင်း ဒေသခံများထံမှ သတင်းသိရသည်။
ပြီးခဲ့သည့် ဇူလိုင်လ ၂၅ ရက်တွင် စစ်ကောင်စီတပ်ဖွဲ့၏ နမ့်အွန်ကျေးရွာအုပ်စု ဆိုင်ခေါင်(ဝ်) ရွာအနီးကို ဗုံးကြဲတိုက်ခိုက်မှုကြောင့် ဆိုင်ခေါင်(ဝ်) ရွာ ဒေသခံ နေအိမ်တချို့ ထိခိုက်ပျက်စီးရသည့် အပြင် အသက် (၄၀) အရွယ် အမျိုးသားတစ်ဦးလည်း လက်နက်ကြီး ထိမှန် သေဆုံးခဲ့သည်။
ဇူလိုင်လ ပထမ ပတ်အတွင်းမှ စတင်ကာ အာဏာသိမ်း စစ်ကောင်စီ တပ်ဖွဲ့သည် သျှမ်းပြည်အတွင်း အခြေစိုက် လှုပ်ရှားသည့် တိုင်းရင်းသား လက်နက်ကိုင် တပ်ဖွဲ့များ နှင့် ထိတွေ့တိုက်ပွဲ ဖြစ်ပွားမှု ခပ်စိပ်စိပ် ဖြစ်လာသည်။
