သျှမ်းပြည် လွိုင်လင်ခရိုင်၊ လဲချားမြို့နယ်အတွင်း၌ မန်ပန်ပြည်သူ့စစ် အရာရှိ၏ ယာဥ်တန်းသည် မိုင်းဆွဲ တိုက်ခံရပြီး အရာရှိ တစ်ဦး အပါအဝင် ဒဏ်ရာရ၊ တပ်သား နှစ်ဦး သေဆုံးသွားကြောင်း သိရသည်။
ယမန်နေ့ (ဇူလိုင်လ ၃၀ ) ရက် ညနေပိုင်း ၄ နာရီဝန်းကျင်တွင် လဲချားမြို့နယ် အရှေ့ဘက်ရှိ တင်းလီကျေးရွာသစ် ရွာဝင်လမ်း အနီး စလိုင်းခုမ် လမ်းကြောင်း၌ မိုင်းဆွဲတိုက်ခိုက်ခံရခြင်းဖြစ်ကြောင်း ဒေသခံများက သျှမ်းသံတော်ဆင့်ကို ပြောသည်။
“မန်ပန်ပြည်သူ့စစ် အရာရှိ စဝ်တ ဦးဆောင်တဲ့ ယာဥ်တန်းလို့ သိရတယ်၊ မန်ပန် ဘက်ကနေ နမ့်ဟူး (ၼမ့်ႁူးြၽႃးထမ်ႈ) ဘက်ကို ဦးတည်သွားနေတုန်းမှာ မိုင်းဆွဲတိုက်ခိုက်ခံရတာ၊ ဘယ်အဖွဲ့က ထောင်ထားတဲ့ မိုင်းတော့ မသိရဘူး” ဟု ဒေသခံများက သျှမ်းသံတော်ဆင့်ကို ပြောသည်။
မိုင်းဆွဲတိုက်ခိုက်ခံရမှုကြောင့် စဝ်တ နှင့် အတူ လိုက်ပါလာသည့် စိုင်းဖွေးဆိုသည့် အရာရှိ၏ ကား ထိမှန်ပြီး ၊ထိခိုက်ဒဏ်ရာရသည့် အပြင် ၎င်း၏ ကားအတွင်းလိုက်ပါလာသည့် တပ်သားနှစ်ဦးလည်း သေဆုံးသွားရကြောင်း သိရသည်။
မန်ပန်ပြည်သူ့စစ်တပ်ဖွဲ့သည် လဲချားမြို့နယ် မန်ပန်ကျေးရွာ နှင့် နမ့်ဟူးဖလားထမ် (ၼမ့်ႁူးၽြုးထမ်ႈ) တို့ဘက်တွင် လှုပ်ရှားနေလျက်ရှိကြောင်းလည်း သိရသည်။
“ဒီဘက်မှာတော့ လက်နက်ကိုင် အဖွဲ့က စုံပါတယ်။ ဘယ်သူ့က ဘယ်သူ့ကို လုပ်ကြံမှန်း သူတို့အချင်းချင်းတော့ သိကြမှာပေါ့၊ ဒါပေမဲ့ အခုလို အများသုံး လမ်းမပေါ်မှာ မိုင်းထောင်ထားတာမျိုးတော့ မလုပ်သင့်ပါဘူး“ ဟု ဒေသခံများက သျှမ်းသံတော်ဆင့်ကို ဆက်ပြောသည်။
လဲချားမြို့နယ်အတွင်း အာဏာသိမ်း စစ်ကောင်စီ တပ်ဖွဲ့အပြင် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည် တပ်မတော် (RCSS/SSA) ၊ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA နှင့် ပြည်သူ့စစ်တပ်ဖွဲ့များကလည်း သွားလာလှုပ်ရှားနေလျက်ရှိကြောင်း သိရသည်။
