သျှမ်းပြည် မူဆယ်မြို့နယ် ၊ စယ်လန့်ကျေးရွာအတွင်း၌ အာဏာသိမ်း စစ်ကောင်စီ တပ်ဖွဲ့ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ ထိတွေ့တိုက်ပွဲ ထပ်မံ ဖြစ်ပွားနေကြောင်း သိရသည်။

ယနေ့ (ဇူလိုင် ၂၉) ရက် မွန်းလွဲပိုင်း ၁ နာရီခွဲဝန်းကျင် မှ စတင်ကာ စယ်လန့်ကျေးရွာအုပ်စုရှိ နမ့်မွမ်းတောင်ကြော ၊ လွယ်တေးမိန်း (လွႆတေးမိူင်း) အနီးတွင် လက်နက်ကြီး လက်နက်ငယ် အသံများ ထွက်ပေါ်လာကြောင်း ဒေသခံများက သျှမ်းသံတော်ဆင့်ကို ပြောသည်။

“ဒီပစ်ခတ်မှု မဖြစ်ခင်မှာ TNLA စစ်ကြောင်း တစ်ခုက ဟွေနမ့်ဆွမ် (ဒေသအခေါ် – ႁူၺ်ႈၼမ့်သွမ်ႇ) ဘက်တက် သွားတာ တွေ့ရတယ်၊ ခဏအကြာမှာတော့ ပစ်ခတ်သံတွေ ထွက်ပေါ်လာတော့တာပဲ၊ လက်နက်ကြီး လက်နက် ငယ်တွေ ပစ်ကြတာ၊ အခုချိန်ထိ ၁၀ မိနစ်ကျော်ကြာနေပြီ” ဟု ဒေသခံများက သျှမ်းသံတော်ဆင့်ကို ပြောသည်။

ယခု သတင်းရေးနေသည့် အချိန်ထိ လွယ်တေးမိန်းဘက်မှ လက်နက်ကြီး လက်နက်ငယ်သံများ ကြားနေရခြင်း ဖြစ်ကြောင်း ဒေသအတွင်းမှ စိတ်ချရသည့် သတင်းရင်းမြစ်များက သျှမ်းသံတော်ဆင့်ကို ပြောသည်။

ယင်းကဲ့သို့ ပစ်ခတ်မှု ဖြစ်ပွားသည့်အတွက် စယ်လန့်ကျေးရွာအတွင်းမှာ အိမ်နှင့် ဈေးဆိုင်များသည် ပိတ်ထား ရကြောင်း နှင့် ဈေးဆိုင်များ ကောင်းကောင်းမွန်မွန် မဖွင့်ရသည်မှာ တစ်ပတ်နီးပါး ရှိလာပြီ ဖြစ်ကြောင်းလည်း ဒေသခံများက သျှမ်းသံတော်ဆင့်ကို ဆက်ပြောသည်။

“နေ့တိုင်းလိုလို ပစ်ခတ်သံတွေက ကြားနေရတော့ ဆိုင်တွေလည်း ကောင်းကောင်း မဖွင့်ရတာ ၅ ရက်ရှိပြီ၊ ကျနော်တို့ အိမ်က ဒီအိမ်ဈေးဆိုင်လေးဖွင့်ပြီး စားဝတ်နေရေး ဖြေရှင်းရတာ၊ အခုလို တိုက်ပွဲ ရက်ကြာလာပြီး၊ ဆိုင်က ဖွင့်မရဘူးဆိုရင် ခက်ကုန်တော့မှာ၊ တချို့ကုန်တွေက ဒိတ် (Date) ကုန်တာတို့ ဘာတို့ဖြစ်ရင်လည်း ရှုံးမှာ” ဟု ဈေးဆိုင်ပိုင်ရှင် တစ်ဦးက သျှမ်းသံဝောာ်ဆင့်ကို ပြောသည်။

ပြီးခဲ့သည့် ဇူလိုင်လ ၂၃ ရက်နေ့မှ စတင်ကာ စစ်ကောင်စီတပ်ဖွဲ့သည် တအာင်း (ပလောင်) အမျိုးသား လွတ်မြောက်ရေး တပ်မတော် TNLA နှင့် ထိတွေ့တိုက်ပွဲ ပြင်းထန်လာခဲ့ပြီး လေကြောင်းဖြင့်ပါ တိုက်ခိုက်မှု အပြင် လက်နက်ကြီး/ငယ်ဖြင့်လည်း တစ်ဖက်သတ် ရမ်းသမ်းမှု ပြုလုပ်လာခဲ့သည်။

ပြီးခဲ့သည့် ဇူလိုင်လ ၂၅ ရက်တွင် စစ်ကောင်စီတပ်ဖွဲ့၏ နမ့်အွန်ကျေးရွာအုပ်စု ဆိုင်ခေါင်(ဝ်) ရွာအနီးကို ဗုံးကြဲတိုက်ခိုက်မှုကြောင့် ဆိုင်ခေါင်(ဝ်) ရွာ ဒေသခံ နေအိမ်တချို့ ထိခိုက်ပျက်စီးရသည့် အပြင် အသက် (၄၀) အရွယ် အမျိုးသားတစ်ဦးလည်း လက်နက်ကြီး ထိမှန် သေဆုံးခဲ့သည်။

ဇူလိုင်လ ပထမ ပတ်အတွင်းမှ စတင်ကာ အာဏာသိမ်း စစ်ကောင်စီ တပ်ဖွဲ့သည် သျှမ်းပြည်အတွင်း အခြေစိုက် လှုပ်ရှားသည့် တိုင်းရင်းသား လက်နက်ကိုင် တပ်ဖွဲ့များ နှင့် ထိတွေ့တိုက်ပွဲ ဖြစ်ပွားမှု ခပ်စိပ်စိပ် ဖြစ်လာသည်။