သျှမ်းပြည် လွိုင်လင်ခရိုင် ပင်လုံမြို့တွင် နာနတ်သီးရောင်းသူ အမျိုးသား တစ်ဦး နာနတ်သီး သွားပို့စဥ် သတ်ခံရကြောင်း စုံစမ်းသိရှိရသည်။

ပြီးခဲ့သည့် ဇူလိုင် (၂၄) ရက်တွင် အသက် (၃၀) အရွယ် အမျိုးသားသည် နာနတ်သီး သွားပို့စဥ် သတ်ဖြတ်ခံရပြီး ဇူလိုင် (၂၅) ရက်တွင်ရုပ်အလောင်းကို ပြန်လည်တွေ့ရှိခဲ့ကြောင်း သိရှိရသည်။

“သူ နာနတ်သီးသွားပို့စဥ်မှာ ဖြစ်သွားတာထင်တယ်။ သေဆုံးသူ ရုပ်အလောင်းကို ကြည့်ရတာ သူ့ရင်ဘတ်တွေ နောက်ကြောတွေမှာ ဓားဒဏ်ရာ နဲ့ သေဆုံးထားတာ တွေ့ရတယ်။ နှာဖူးမှာလည်း ရိုက်နှိက်ထားတဲ့ ဒဏ်ရာ တွေလည်းရှိတယ်” ဟု ပင်လုံဒေသခံ တစ်ဦး ကပြောသည်။

အဆိုပါ သေဆုံးသွားသူ စီးသွားသည့် ကား နှင့် ဖုန်းများလည်း ပျောက်ဆုံးနေကြောင်းလည်း သိရသည်။

အလားတူ ပင်လုံမြို့ရှိ ရပ်ကွက်ရှိ လောင်းကစားရုံ နှင့် စျေးရောင်းပွဲတော် ရှိထားသည့်အတွက် ဒေသခံ ဆိုင်ကယ် မကြာခဏ ပျောက်ဆုံးမှုလည်း ရှိနေကြောင်း သိရသည်။

“စျေးရောင်းပွဲတော် နဲ့ လောင်းကစားဝိုင်းရှိ လာရင် ဆိုင်ကယ် ခနခနပျောက်တယ်။ ဒီလအတွင်း စျေးထဲမှာ (၃) စီးလောက်ပျောက်သွားပြီ။ ကျနော်တို့အိမ်ဘက်မှာ ၂ စီး နဲ့ စျေးအနောက်ဘက်မှာ ၁ စီး ပျောက်သွားပြီ။ တစ်စီးက သူ့ဆိုင်ကယ်ပေါ်မှာ ကြက်သွန်နီတွေ ခရမ်းချဥ်သီးတွေ တင်ထားတာကို သူခိုးက တင်ထားတဲ့ ပစ္စည်းကို ချပေးပြီးတော့ ဆိုင်ကယ် ခိုးယူသွားတယ်” ဟု ပင်လုံ ဒေသခံ တစ်ဦး ကပြောသည်။

စစ်ကောင်စီက အာဏာသိမ်းပြီးနောက်ပိုင်း သျှမ်းပြည်အတွင်း စျေးရောင်းပွဲတော် အများအပြားရှိလာြခင်း၊ လောင်းကစားဝိုင်း ရှိလာခြင်း၊ မူးယစ်ဆေးဝါး ရောင်းဝယ်ဖောက်ကားမှု များပြားလာသည့်အတွက် ဒုစရိုက်လည်း များပြားလာခဲ့သည်။

စစ်တပ်မှ အာဏာသိမ်းပြီး ၂ နှစ်ကျော်ကာလတွင် ပင်လုံမြို့အတွင်း နေထိုင်သည့် ပါညို ဆိုသူကို ပြီးခဲ့သည့် ၂၀၂၂ ခုနှစ်က အမည်မသိ လူတစ်စုက အိမ်ထိလာရောက်ခေါ်ဆောင်သွားပြီး သတ်ဖြတ်ခဲ့သည့် ဖြစ်စဥ်လည်း ရှိခဲ့ဖူးသည်