သျှမ်းပြည် မောက်မယ်မြို့နယ် ကဒူးကြီးဒေသရှိ နမ့်ပါတက်ကျေးရွာတွင် အမျိုးသားတစ်ဦး တောင်ယာ သွားနေစဉ် မိုင်းနင်းမိပြီး သေဆုံးသွားခဲ့ကြောင်း စုံစမ်းသိရသည်။
ဖြစ်စဉ်မှာ ဇူလိုင် ၂၃ ရက် နေ့လယ်ပိုင်း ၁၂ နာရီတွင် မောက်မယ်မြို့နယ် ကဒူးကြီးဒေသ နမ့်ပါတက်ကျေးရွာ၏ အနောက်ဘက်ရှိ တောင်ယာသို့ အသက် ၃၂ နှစ်အရွယ် ခွန်မောင်သန်း သွားနေစဉ် လမ်း၌ မိုင်းနင်းမိခဲ့သည်။
အဆိုပါ မိုင်းနင်းမိပြီးနောက် အိမ်ကို ပြန်မလာနိုင်သောကြောင့် ဇူလိုင် ၂၄ ရက် နံနက်ပိုင်း၌ ကျေးရွာမှ ဒေသခံများ သွားရောက်ရှာဖွေနေစဉ် သေဆုံးနေလျက်ရှိသည့် အလောင်းကို ပြန်တွေ့ရှိခဲ့ကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“အဲ့နေ့ ရွာရဲ့အနောက်ဘက်မှာ မိုင်းကွဲသံ ကြားရတယ်။ နောက်ရက် မနက် ၇ နာရီအချိန် ကျော်ကျော်လောက်မှ ဒေသခံတွေက အဲ့ဖက်ကို သွားတယ်။ မိုင်းနင်းမိတဲ့ ခွန်မောင်သန်းက ပြန်မရောက်လာလို့ သွားရှာကြတာ။ သူတို့ သွားရှာတဲ့ အခါကျတော့ မိုင်းနင်းမိပြီး သေဆုံးနေတဲ့ ခွန်မောင်သန်း အလောင်းကို တွေ့ရတယ် “ ဟု ၎င်း ဒေသခံ တစ်ဦးက ပြောသည်။
အဆိုပါ အလောင်းကို တွေ့ခဲ့စဉ်က ခြေထောက်၊ ပေါင် နှင့် မျက်စိတစ်ဖက်တွင် ပြင်းထန်စွာ ထိခိုက်ဒဏ်ရာ ရထားသည့် ဒဏ်ရာများရှိပြီး အချိန်မှီ ဆေးဝါး မကုသလိုက်ရသည့်အတွက်ကြောင့် ပြင်းထန်သည့် ဒဏ်ရာကြောင့် သေဆုံးသွားခဲ့ကြောင်း ဒေသခံများက ယူဆထားသည်။
ထို့အပြင် ကဒူးကြီးဒေသအတွင်း ပအိုဝ်းအမျိုးသား လွတ်မြောက်ရေး အဖွဲ့ချုပ် PNLO နှင့် သျှမ်းပြည်ပြန်လည် ထူထောင်ရေးကောင်စီ (RCSS) တပ်ဖွဲ့တို့အား တိုက်ပွဲဖြစ်ပွားသည့် နယ်မြေဖြစ်၍ တိုက်ပွဲဖြစ်ပွားစဉ်အတွင်း မြှုပ်ထားသည့် မိုင်းများဖြစ်ကြောင်း သိရသည်။
“ အဲ့လိုမိုင်းတွေ လျှောက်ထောင်ထားတော့ ကျန်တဲ့ ဒေသခံတွေကပါ တောင်ယာသွားလာရင် ဘယ်လိုမျိုး သွားကြတော့မလဲ။ ကိုယ့်ခြံ၊ ကိုယ့်နေရာ သွားတောင်မှ အသက်ဆုံးရှုံးရမယ့် အခြေအနေ ဖြစ်လာနေပြီ။ လူထုတွေ ထိခိုက်နစ်နာတာပေါ့ “ ဟု ကဒူးကြီးကျေးရွာမှ ဒေသခံတစ်ဦးက ထပ်လောင်းပြောသည်။
ယင်းကဲ့သို့ မိုင်းနင်းမိခြင်းကြောင့် သေဆုံးသွားခဲ့ရသည့် ခွန်မောင်သန်းတွင် ဇနီး နှင့် သားသမီး ၄ ဦး ကျန်ရစ်ခဲ့ပြီး အဆိုပါ အမျိုးသားသေဆုံးသွားခဲ့၍ မိသားစု စားဝတ်နေရေး အပါအဝင် ကလေးငယ်များ၏ ပညာရေးအတွက် ခက်ခဲသွားနိုင်ကြောင်း ၎င်းနှင့်နီးစပ်သူ ဒေသခံများက ပြောသည်။
ပြီးခဲ့သည့် ၂၀၂၃ ခုနှစ် ဧပြီလ ၁၈ ရက်တွင်လည်း ကဒူးကြီးဒေသအတွင်း တောထဲ ဟင်းရှာထွက်သွားသည့် ၈ နှစ်အရွယ် ကလေးငယ်တစ်ဦး နှင့် အမျိုးသမီး ၂ ဦး မိုင်းနင်းမိခဲ့ပြီး ထိခိုက်ဒဏ်ရာ ရရှိခဲ့ကြောင်း သိရသည်။
