စစ်အာဏာသိမ်းပြီးနောက်ပိုင်း အင်းလေးဒေသမှ ပြည်သူများသည် လူ့အခွင့်အရေးဆိုင်ရာ အမျိုးမျိုး ချိုးဖောက်ခံရပြီး ထိရောက်သည့် အရေးယူမှုအတွက် သုတေသနဆိုင်သည့် သတင်းစာ ရှင်းလင်းပွဲတစ်ရပ် ကျင်းပခဲ့ကြောင်း သိရသည်။

အဆိုပါ သတင်းစာရှင်းလင်းပွဲကို ယနေ့ (ဇူလိုင် ၂၆) ရက်တွင် ထိုင်းနိုင်ငံ ချင်းမိုင်မြို့ရှိ ချင်းမိုင်တက္ကသိုလ် (CMU) ကျောင်း၌ အင်းလေးဒေသမှ အဖွဲ့အစည်းဖြစ်သည့် (Justice Movement For Community- Innlay) မှ ဦးဆောင်ပြီး ကျင်းပခဲ့သည်။

စစ်တပ် အာဏာသိမ်းခြင်း အပေါ် နိုင်ငံတကာ၏ ထိရောက်သော အရေးယူမှုအတွက် ခိုင်မာသည့် သက်သေအထောက်အထားတစ်ခု ရရှိနိုင်ရန်၊ အင်းလေးဒေသရှိ လူမှုဘဝအပေါ် အကျိုးသက်ရောက်မှုများကို သိရှိရန် နှင့် လူ့အခွင့်အရေး ချိုးဖောက်ခံရသူများ၏ စကားသံများကို မှတ်တမ်းတင်ရန် ရည်ရွယ်ပြီး ပြုလုပ်ကြောင်း Justice Movement For Community – Innlay မှ ဒါရိုက်တာ မယုလှိုင်သင်းက ပြောသည်။

“စစ်အာဏာသိမ်းပြီးနောက်ပိုင်းမှာ ကျမတို့ အင်းလေးဒေသရှိတဲ့ ပြည်သူလူထုတွေ လူ့အခွင့်အရေး ချိုးဖောက်ခံရမှုအခြေအနေတွေကို မီဒီယာကနေတစ်ဆင့် ပြည်တွင်း၊ ပြည်ပမှာရှိတဲ့ သက်ဆိုင်ရာ အဖွဲ့အစည်းအကုန်လုံးကို ကျမတို့က သိစေချင်တယ်။ စစ်ကောင်စီရဲ့ အကြမ်းဖက် လုပ်ရက်တွေက နောင်တစ်ချိန်မှာ အရေးယူမယ်ဆိုရင် ကျမတို့ အင်းလေးဒေသက ထွက်လာတဲ့ သုတေသန အချက်အလက်တွေအရ တိတိကျကျ ပြန်ပေးဖို့အတွက် ရည်ရွယ်ပါတယ် “ ဟု မယုလှိုင်သင်းက ဆိုသည်။

စစ်အာဏာမသိမ်းခင် နှင့် အာဏာသိမ်းပြီးနောက်ပိုင်း ကွဲပြားခြားနားသွားသည့် အင်းလေးဒေသအတွင်း ပညာရေး၊ စီးပွားရေး၊ လူမှုရေး၊ ကျန်မာရေး နှင့် လုံခြုံရေး စသည့် ခေါင်းစဉ် နှင့် ဆွေးနွေးတင်ပြသွားခဲ့သည်။

စစ်အာဏာသိမ်းပြီးနောက်ပိုင်း အင်းလေးဒေသအတွင်းရှိ ပညာရေး၊ စီးပွားရေး၊ လူမှုရေး၊ ကျန်းမာရေး နှင့် လုံခြုံရေး အခြေအနေများသည် ဆုတ်ယုတ် ပျက်စီးလာနှုန်း ၇၀ ရာခိုင်နှုန်း ရှိကြောင်း သိရသည်။

ထို့ကြောင့် အာဏာသိမ်း စစ်ကောင်စီကို နိုင်ငံတကာ ရာဇဝတ်ခုံရုံး International Criminal Court (ICC) မှ တရားစွဲတင်ရန် နှင့် အင်းလေးဒေသခံ ပြည်သူများ အပါအဝင် မြန်မာပြည်သူများ၏ သဘောထား ထင်မြင်ယူဆချက်များကို အလေးပေး နားထောင်ပေးရန် နှင့် ၎င်းတို့၏ အသံများကို ဆုံးဖြတ်ချက် ချမှတ်သည့် လုပ်ငန်းစဉ်များတွင် ထည့်သွင်းစဉ်းစားပေးရန် တောင်းဆိုခဲ့သည်။

အလားတူ စစ်အာဏာသိမ်းပြီးနောက် စစ်ကောင်စီ၏ အချိန်အကန့်အသတ် အပြင်ထွက်မှုကြောင့် ပရဟိတ လူမှုကူညီရေးအသင်းများလည်း အခက်အခဲများစွာ ရင်ဆိုင်နေရကြောင်း ပရဟိတအသင်းတစ်ခုမှ တာဝန်ရှိသူ တစ်ဦးက ပြောသည်။

“ကျနော်တို့တွေ စစ်အာဏာသိမ်းပြီး ည ၁၀ နာရီထိုးရင် ကားမောင်းခွင့် မပေးတော့ဘူး။ လူနာလည်း တင်လို့မရ။ ညရေးညတာ အရေးပေါ်ဆိုရင်လည်း ပေးမသွားဘူး။ ညကားမောင်းလို့ဆိုပြီး ပရဟိတ တယောက်ကို သေနတ်နဲ့ထုတာ သေသွားတဲ့ ဖြစ်စဥ်ကလည်းရှိတယ်” ဟု ၎င်းကဆိုသည်။

အင်းလေးဒေသ၌ စစ်ကောင်စီ အပါအဝင် ပအိုဝ်းပြည်သူ့စစ် PNO၊ ဗျူစောထီးများက ဒေသခံများအပေါ် လူ့အခွင့်အရေးဆိုင်ရာ ချိုးဖောက်မှု အမျိုးမျိုး ချိုးဖောက်နေပြီး ဒေသခံများကို ဖမ်းဆီးရိုက်နှိက်မှု၊ သတ်ဖြတ်မှု စသည့် ပြစ်မှုများလည်း ကျူးလွန်နေကြောင်းလည်း သိရသည်။