Saturday, July 13, 2024

ဗုံးကြဲတိုက်ခိုက်မှုကြောင့် သေသွားသည့် အမျိုးသား အလောင်းကို စစ်ကောင်စီမှ လာရောက်လုယူသွား

Must read

သျှမ်းပြည် မူဆယ်ခရိုင်၊ နမ့်အွမ်ကျေးရွာ အနီး ဆိုင်းခေါင်(ဝ်) ကျေးရွာသို့ စစ်ကောင်စီ ဗုံးကြဲ တိုက်ခိုက်မှုကြောင့် သေဆုံးသွားရသည့် အမျိုးသား၏ ရုပ်အလောင်းကို စစ်ကောင်စီမှ လာရောက် လုယူသွားကြောင်း စုံစမ်း သိရသည်။

နေအိမ်ဗုံးကြဲတိုက်ခိုက်ခံရ

ယမန်နေ့ ဇူလိုင်လ ၂၅ ရက်နေ့ မနက်ပိုင်း ၁၁ နာရီဝန်းကျင်အချိန်တွင် အာဏာသိမ်း စစ်ကောင်စီသည် TNLA တပ်ဖွဲ့ကို လေကြောင်းလိုင်းဖြင့် ထိုးစစ်ဆင်တိုက်ခိုက်ရာမှ ဆိုင်းခေါင်(ဝ်) ကျေးရွာအတွင်းသို့ ဗုံးကြဲတိုက်ခိုက်ခဲ့ခြင်း ဖြစ်သည်။

အဆိုပါ ဗုံးကြဲတိုက်ခိုက်မှုကြောင့် ဆိုင်းခေါင်(ဝ်) ကျေးရွာမှ လူနေအိမ် ၃ လုံးထက်မနည်း ထိခိုက်ပျက်စီးပြီး အိမ်ရှင် အမျိုးသား တစ်ဦး နှင့် အမျိုးသမီးတစ်ဦး၊ ထိခိုက်ဒဏ်ရာရသူ ၃ ဦး ထက်မနည်း ရှိနေရာ သေဆုံးသူ အိမ်ရှင် လုံးစိုင်းလ၏ ရုပ်အလောင်းကို စစ်ကောင်စီက လာရောက်လုယူခြင်းဖြစ်ကြောင်း လုံခြုံရေးအရ အမည်မဖော်လိုသူက သျှမ်းသံတော်ဆင့်ကို ပြောသည်။

ဗုံးကြဲခံထိထားသည့် အိမ်

“သူတို့ အိမ်ပေါ်တည့်တည့်ကို လက်နက်ကြီးကျတော့ သူ့ခေါင်းနောက်ဘက်ကို မှန်သွားတယ်။ အဲ့ဒဏ်ရာနဲ့ ပွဲချင်းပြီး သေသွားတာ၊ သူ့အမျိုးသမီးလည်း ဒဏ်ရာပြင်းပြင်းထန်ထန် ထိသွားလို့ ဆေးရုံတင်ထားရတယ်။ လုံးစိုင်းလရဲ့ အလောင်းကိုတော့ စကစတွေ ဒီနေ့မနက် အိမ်မှာပဲ လာလုသွားတယ်” ဟု လုံခြုံရေးအရ အမည်မဖော်လိုသူက သျှမ်းသံတော်ဆင့်ကို ပြောသည်။

သေဆုံးသူ လုံးစိုင်းလသည် အသက် (၄၀) ကျော်ဝန်းကျင်ရှိနေပြီး ရုပ်အလောင်းကို အဖေဖြစ်သူက စောင့်နေစဥ် စစ်ကောင်စီတပ်သားများက လာရောက် လုယူသွားခြင်း ဖြစ်ကြောင်း သိရသည်။

ထို့အပြင် အလောင်းကိုလာလုယူသည့် စစ်ကောင်စီ တပ်သားများသည် အလောင်း စောင့်နေသည့် အဖေဖြစ်သူ ကိုလည်း ရိုက်နှက်ပြီး အိမ်တွင်းပစ္စည်းများကိုလည်း ဖျက်စီးသွားကြောင်း အထက်ပါ ပုဂ္ဂိုလ်က သျှမ်းသံတော်ဆင့်ကို ဆက်ပြောသည်။

နေအိမ်ဗုံးကြဲတိုက်ခိုက်ခံရ

“သူ့အဖေကလည်း ဗမာစကား သိပ်မကျွမ်းတော့ တတ်သလောက်နဲ့ သူ့သားအလောင်းကို ဘယ်သယ်သွားမလို့ လဲလို့ မေးတာတဲ့၊ ဒူးထောက်ပြီး တောင်းတောင်းပန်ပန် နဲ့ ပြောဆိုတာတောင် မျက်နှာကို ကြိုးနဲ့ဖြတ် ရိုက်ပြီး၊ အလောင်းကို လုသွားတယ်။ ရင်နာဖို့ ကောင်းလိုက်တာလေ” ဟု ၎င်းကဆက်ပြောသည်။

အဆိုပါ လုံးစိုင်းလ၏ ရုပ်အလောင်းကို မည်သည့်နေရာသို့ ခေါ်ဆောင်သွားသည်ကို မသိရကြောင်း အဆိုပါ စစ်ကြောင်း ထွက်ပြီး ခဏအကြာတွင် စစ်ကောင်စီ၏ စစ်ကြောင်း တစ်ခုသည် ဆိုင်းခေါင်(ဝ်) ကျေးရွာအနီးရှိ တောင်ကုန်းတွင် လာရောက်နေရာယူထားကြောင်းလည်း သိရသည်။

ယနေ့ လက်ရှိအချိန်အထိ ပစ်ခတ်သံများ မထွက်လာသေးသော်လည်း အာဏာသိမ်း စစ်ကောင်စီ နှင့် TNLA တပ်ဖွဲ့တို့၏ စစ်ရေးတင်းမာမှုများက ရှိနေဆဲဖြစ်သည့်အတွက် တိုက်ပွဲထပ်မံဖြစ်ပွားမည်ကို စိုးရိမ်ကြောင်း လည်း ဒေသခံများက ပြောဆိုနေကြသည်။

Leave a Comments

- Advertisement -spot_img

Latest article