သျှမ်းပြည် ကွတ်ခိုင်မြို့နယ်အတွင်း စစ်ကောင်စီတပ်ဖွဲ့မှ လက်နက်ကြီးဖြင့် တစ်ဖက်သတ် ရမ်းသမ်းပစ်ခတ်မှုကြောင့် ပြည်သူ့နေအိမ် တစ်လုံး ပျက်စီးကြောင်း စုံစမ်း သိရသည်။
ပြီးခဲ့သည့် ဇူလိုင်လ ၂၄ ရက် ညပိုင်း ၁၁ နာရီဝန်းကျင်တွင် ကွတ်ခိုင်မြို့ အခြေစိုက် အမှတ် ၁၂၃ အာဏာသိမ်း စစ်ကောင်စီတပ်ဖွဲ့သည် တပ်ကုန်းမှ တစ်ဆင့် နမ့်ဖတ်ကာဘက်သို့ ဦးတည်ပြီး လက်နက်ကြီးများ တစ်ဖက်သတ် ရမ်းသမ်း ပစ်ခဲ့ကြောင်း ဒေသခံများက ပြောသည်။
ယင်းကဲ့သို့ လက်နက်ကြီး ရမ်းသမ်းပစ်ခတ်မှုကြောင့် နမ့်ဖတ်ကာ ကျေးရွာအုပ်စု ၊ မိုင်ဆောင်ကုန်းကျေးရွာမှ နေအိမ်တစ်လုံး ထိမှန်ပြီး အိမ်ရှင်မိသားစု ထိခိုက်မှု မရှိခဲ့ကြောင်း အမည်မဖော်လိုသူ ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“လက်နက်ကြီး နဲ့ အဆက်မပြတ် ရမ်းရမ်းပစ်ခဲ့တာ ည ၁၁ နာရီ ကနေ ၁ နာရီထိ အသံတွေ ကြားရတယ်။ ရွာထဲက အိမ်တစ်လုံးပေါ် လက်နက်ကြီးစ မှန်ပြီး တစ်အိမ်လုံး ရစရာမရှိ ပျက်စီးသွားတယ်၊ အိမ်ရှင်မိသားစု သားအမိ ၃ ဦးကတော့ အသက်ဘေးကတော့ လွတ်သွားတယ်” ဟု လုံခြုံရေးအရ အမည်မဖော်လိုသူ ဒေသခံအမျိုးသမီး တစ်ဦးက သျှမ်းသံတော်ဆင့်ကို ပြောသည်။
လက်ရှိတွင် အဆိုပါ အိမ်ပျက်စီးသွားသည့်အတွက် အိမ်ရှင် သားအမိ ၃ ဦး နေထိုင်ရန်အတွက် ယာယီတဲကို ဒေသခံများက စုပေါင်းလုပ်ပေးထားကြောင်းလည်း သိရသည်။
လက်နက်ကြီး ထိမှန်မှုကြောင့် ပျက်စီးခဲ့ရသည့် အိမ်ရှင်မိသားစုသည် တစ်နေ့လုပ် တစ်နေ့စားများသာ ဖြစ်ကြသည့် အတွက် နေအိမ်ပြန်ဆောက်လုပ်ဖို့ တာဝန်ရှိသူများ လာရောက်ကူညီဆောက်ပေးစေလို ကြောင်းလည်း အထက်ပါ ဒေသခံက သျှမ်းသံတော်ဆင့်ကို ဆက်ပြောသည်။
“အိမ်မှာလည်း သူတို့ သားအမိ ၃ ဦးပဲ ရှိနေတော့ တော်တော်ကို ခက်ခဲတာပေါ့။ ဖြစ်နိုင်ရင်တော့ တာဝန်ရှိသူတွေ လာရောက် ကူညီပေးစေချင်ပါတယ်၊ လက်နက်ကိုင် တပ်ဖွဲ့တွေကလည်း ရွာတွေဘက်ကို လက်နက်မပစ်ကြဖို့၊ ရွာနားမှာ တိုက်ပွဲမဖြစ်ဖို့ တိုက်တွန်းချင်ပါတယ်” ဟု အထက်ပါ အမျိုးသမီးက သျှမ်းသံတော်ဆင့်ကို ဆက်ပြော သည်။
ယမန်နေ့ ဇူလိုင်လ ၂၅ ရက်နေ့ မနက်ပိုင်းအချိန်တွင် မူဆယ်မြို့နယ် ဆိုင်းခေါင်(ဝ်) ကျေးရွာအတွင်းသို့ စစ်ကောင်စီဘက်မှ လေယာဥ်ဖြင့် ဗုံးကြဲတိုက်ခိုက်မှု ပြုလုပ်ခဲ့သည့်အတွက် ဒေသခံ ၂ ဦးသေ၊ ၃ ဦးဒဏ်ရာ ပြင်းထန်စွာ ရရှိသွားကြောင်းလည်း သိရသည်။
ပြီးခဲ့သည့် ဇူလိုင်လ ၂၃ ရက်နေ့မှ စတင်ကာ စစ်ကောင်စီတပ်ဖွဲ့သည် တအာင်း (ပလောင်) အမျိုးသား လွတ်မြောက်ရေး တပ်မတော် TNLA နှင့် ထိတွေ့တိုက်ပွဲ ပြင်းထန်လာခဲ့ပြီး လေကြောင်းဖြင့်ပါ တိုက်ခိုက်မှု အပြင် လက်နက်ကြီး/ငယ်ဖြင့်လည်း တစ်ဖက်သတ် ရမ်းသမ်းမှု ပြုလုပ်လာခဲ့ခြင်းဖြစ်သည်။
Leave a Comments