သျှမ်းပြည် ညောင်ရွှေမြို့နယ် အင်းစံကား အနောက်ခြမ်းရှိ ကျေးရွာမှ မူးယစ်ဆေးဝါး သုံးစွဲသူ လူ ၃ ဦးကို ပြည်သူ့စစ်တပ်ဖွဲ့ PNO မှ ဖမ်းဆီးရိုက်နှိက် ငွေတောင်းယူခဲ့ပြီး တစ်ရက်အတွင်း ပြန်လွတ်ပေးခဲ့ကြောင်း သတင်း သိရသည်။

လက်ရှိ ဇူလိုင် ပထမပတ်အတွင်း ညောင်ရွှေမြို့နယ် အင်းစံကား အနောက်ခြမ်းရှိ ကျေးရွာတွင် နေထိုင်သည့် အမျိုးသား ၃ ဦးကို မူးယစ်ဆေးဝါး သုံးစွဲသည်ဟုဆိုပြီး ဖမ်းဆီးရိုက်နှိက်ခဲ့ကာ တစ်ဦးကို ကျပ်သိန်း ၄၀ တောင်းခံခဲ့ကြောင်း အမည်မဖော်လိုသူ ဒေသခံတစ်ဦးက သျှမ်းသံတော်ဆင့်ကို ပြောသည်။

“မူးယစ်ဆေးဝါး သုံးတယ်ဆိုပြီး ဖမ်းတာပဲ။ ဖမ်းပြီးရိုက်နှိက်တယ်၊ ပြီးတော့ တစ်ယောက်ကို ကျပ်သိန်း ၄၀ တောင်းတယ်။ မပေးနိုင်ရင် ရှေ့တန်းပို့မယ် ဘာညာ ခြိမ်းခြောက်တယ်။ ရဲလက်ထဲ အပ်မယ်ဆိုလည်း မရဘူး။ သူတို့က ပိုက်ဆံရချင်လို့ လုပ်စားနေတာ။ မရမက ရသလောက်တောင်းတယ် “ ဟု ၎င်းက ပြောသည်။

အဆိုပါ မူးယစ်ဆေးဝါးသုံးစွဲသူသည် အသက် ၃၅ နှစ် နှင့် ၄၀ နှစ်ကြား အမျိုးသား ၃ ဦးဖြစ်ပြီး ပိုက်ဆံပေးဆောင်ရပြီးနောက် တစ်ရက်အတွင်း ပြန်လည်လွတ်မြောက် လာခဲ့ကြောင်း သိရသည်။

ထို့အပြင် စစ်ကောင်စီ လက်ခံအောက် ပြည်သူ့စစ်တပ်ဖွဲ့ PNO သည် အကြောင်းပြချက် အမျိုးမျိုးဖြင့် ၎င်းတို့ထိန်းချုပ်ရာ နယ်မြေဒေသရှိ ကျေးရွာများတွင် ပိုက်ဆံ တောင်းခံနေလျက်ရှိကာ တပ်သားအသစ် စုဆောင်းမှုလည်းရှိနေပြီး မပေးနိုင်ပါက ခြိမ်းခြောက်ပြောဆိုနေလျက် ရှိကြောင်း သိရသည်။

“တကယ်တော့ သူတို့ အချင်းချင်းတွေထဲကဘဲ လုပ်စားနေကြတာ။ အကြောင်းပြချက် အမျိုးမျိုးယူပြီး ငွေတောင်းနေတာပေါ့။ မူးယစ်ဆေးဝါးသုံးတဲ့သူတွေသာ လိုက်ဖမ်းတယ်။ ငွေတောင်းလို့ရရင် ပြန်လွတ်ပေးတယ်။ ဒါက သူတို့ငွေရှာစားနေတာပဲ “ ဟု အင်းစံကားဒေသမှ ဒေသခံတစ်ဦးက ထပ်လောင်း ပြောသည်။

အလားတူ ပြည်သူ့စစ်တပ်ဖွဲ့ PNO ထိန်းချုပ်ရာနယ်မြေ ဒေသဖြစ်သည့် ဆီဆိုင်မြို့နယ်တွင်လည်း ပြီးခဲ့သည့် ဇူလိုင် ပထမအပတ်၌ ကျေးရွာဒေသခံများထံ သေနတ်ဝယ်ယူရန်ဟုဆိုပြီး တစ်အိမ်လျှင် ကျပ်ငွေ ၃ သောင်းမှ ၅ သောင်းအထိ ကောက်ခံခဲ့သည်။