သျှမ်းပြည် လင်းခေးမြို့နယ်အတွင်း မိုးကြီးရေကြီးမှုကြောင့် တံတားတစ်စင်း ပျက်စီးရကြောင်း စုံစမ်းသိရသည်။

ပြီးခဲ့သည့် ဇူလိုင်လ ၁၉ ရက် နံနက်ပိုင်း ၁ နာရီ ဝန်းကျင်တွင် မိုးသည်းထန်စွာ ရွာသွန်းပြီး၊ ချောင်းရေများ မြင့်တက်လာရာ လင်းခေးမြို့နယ်မှ မက်ကျန်းမွန်းကျေးရွာ နှင့် နမ့်ဆိုင်းကျေးရွာကြားရှိ ပန်နမ့်ဟူးချောင်းကူး တံတား ပျက်စီးရကြောင်း ဒေသခံများက သျှမ်းသံတော်ဆင့်ကို ပြောသည်။

“တံတားကတော့ တော်တော်များများ ပျက်စီးသွားပြီ၊ ဒီချောင်းကလည်း မိုးမရွာရင် ရေက ဟိုတစ်ကွက် ဒီတစ်ကွက် အဲ့လို နည်းနည်းပဲ ရှိကြတယ်၊ မိုးရွာမှ ရေတွေတက်လာပြီး ဟိုဘက်ဒီဘက်ကမ်းကို လျှံထွက်တာ။ ချောင်းကူးတံတား ပျက်သွားတော့ အခု အဲ့လမ်းကနေ ဖြတ်လို့မရသေးဘူး” ဟု လင်းခေးမြို့မှ မဟာဝိဟာရ ကျောင်းတိုက်မှ ကျောင်းထိုင်ဆရာတော် အိန္တောဘာသ ကသျှမ်းသံတော်ဆင့်ကို မိန့်သည်။

ချောင်းကူး တံတားပျက်စီးသည့်အတွက် ဒေသခံများအတွက် သွားရေးလာရေးပိုင်း နှင့် ပတ်သက်ပြီး ထိခိုက်မှု၊ အခက်အခဲများ ရှိလာသည့်အတွက် တာဝန်ရှိသူများ အမြန်ဆုံး ပြင်ဆင် တည်ဆောက်ပေးရန် တောင်းဆို လိုကြောင်းလည်း ဒေသခံများ တောင်းဆိုကြကြောင်း သိရသည်။

“ကျနော်တို့ ရွာသားတွေ နေ့စဥ်နီးပါး သုံးနေတဲ့ လမ်းတစ်ခုဖြစ်နေတယ်ဆိုတော့ အခုလို လမ်းပျက်နေတာ အခက်အခဲတော့ ရှိတာပေါ့နော်။ ဟင်းသီးဟင်းရွက်ရောင်းပြီး ဝမ်းစာဖြေရှင်းနေတဲ့ သူတွေလည်း ဒီလမ်းကိုပဲ သုံးကြတာ။ ဒါကြောင့် အကြာကြီးပျက်ရင် ထိခိုက်မှုက ပိုများမှာ။ ရွာသားတွေချည်းပဲ ပြင်မယ်ဆို အချိန်ကြန့်ကြာမှာဆိုတော့ သက်ဆိုင်ရာ ဝာာဝန်ရှိသူတွေ လာရောက် ကူညီပေးစေချင်တယ်” ဟု လင်းခေးမြို့ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

လက်ရှိ ပျက်စီးသွားသည့် တံတားသည် ပြီးခဲ့သည့် ၂၀၁၂ တွင် ဒေသခံများ နှင့် ဒေသအတွင်းမှ သံဃာတော်များ စုပေါင်းပြီး တည်ဆောက်ထားခဲ့သည့် လင်းခေးမြို့အတွက် အဓိက အရေးပါသည့် တံတား တစ်စင်း ဖြစ်ကြောင်း သိရသည်။

ချောင်းကူးတံတားကို မဖြစ်မနေ ဖြတ်သန်းပြီး သွားလာရသည့် ကျေးရွာများ အနေဖြင့် ကန်နားကျေးရွာ၊ နမ့်ဆိုင်းကျေးရွာ နှင့် တိနျုကျေးရွာတို့မှ ဖြစ်ကြကြောင်းလည်း သိရသည်။