သျှမ်းပြည် မူဆယ်ခရိုင် ကွတ်ခိုင်မြို့နယ် ခိုမုန်းကျေးရွာသို့ ရောက်ရှိလာသည့် စစ်ဘေးရှောင် ၂၀၀ ကျော်သည် နေရပ်ပြန်ချင်သော်လည်း ဒေသအတွင်း စစ်ရေးတင်းမာမှု ရှိနေသေးသည့်အတွက် နေရပ် မပြန်နိုင်သေးကြောင်း စုံစမ်းသိရသည်။

ပြီးခဲ့သည့် ဇူလိုင် ၁၈ ရက်တွင် ကွတ်ခိုင်မြို့နယ် ဆူပရာရွာ နှင့် ကောင်ရာရွာ အနီး ကချင်လွတ်လပ်ရေးတပ်မတော် (KIO/KIA) နှင့် အာဏာသိမ်း စစ်ကောင်စီတို့ တိုက်ပွဲ ဖြစ်ပွားမှုကြောင့် ဒေသခံများက ခိုမုန်းကျေးရွာသို့ စစ်ရှောင်ထွက်ပြေး လာရခြင်း ဖြစ်သည်။

လက်ရှိတွင် စစ်ရှောင်ထွက်ပြေးလာခဲ့ရသည်မှာ ၃ ရက်မြောက် ရှိလာပြီး ကျန်ခဲ့သည့် စစ်ရှောင်များ၏ နေအိမ်များကို သူခိုးတို့ ဖောက်ထွင်းမှု ရှိနေသည့် သတင်းကြားမိသည့်အတွက် နေရပ်ပြန်လိုကြောင်း စစ်ရှောင် ကူညီ ပေးနေသူ အသက် ၄၀ ဝန်းကျင် အမျိုးသားက သျှမ်းသံတော်ဆင့်ကို ပြောသည်။

“စစ်ရှောင်ဦးရေ စုစုပေါင်း ၂၂၀ ဦးပါ၊ အိမ်ခြေက ၅၃ အိမ်ဖြစ်ပါတယ်။ ရွာနှစ်ရွာ စလုံးက ရွာလုံးကျွတ်ထွက်ပြေး လာကြတာ၊ အခုက သူတို့အိမ်ကို သူခိုးတွေက ဝင်ဖောက်နေကြတာတွေလည်း သိရတော့ ပိုပြီး အိမ်ပြန်ချင်ကြ တာ။ ဒါပေမဲ့ မြေပြင်မှာ စစ်ရေးတင်းမှာနေတုန်းမို့ မပြန်နိုင်သေးဘူး” ဟု ခိုမုန်းရောက် စစ်ရှောင်ကို ကူညီပေး နေသည့် အမျိုးသားက သျှမ်းသံဝောာ်ဆင့်ကို ပြောသည်။

လက်ရှိတွင် စစ်ဘေးရှောင်များသည် ခိုမုန်းကျေးရွာရှိ ဘုရားကျောင်း နှင့် ဘုန်းကြီးကျောင်းတို့တွင် ခိုလှုံနေထိုင် ကြရပြီး စားသောက်ရေးအတွက်ကို အသင်းတော် နှင့် ဒေသအတွင်း လူမှုကူညီရေး ပရဟိတသမားများက ကူညီပေးနေကြောင်း သိရသည်။

ပြီးခဲ့သည့် ဇူလိုင်လ ၁၉ ရက်တွင်လည်း ကောင်လာရွာတွင်း တပ်စွဲထားသည့် စစ်ကောင်စီတပ်ဖွဲ့သည် ကောင်းလာရွာ ဒေသခံ အမျိုးသား ၂ ဦးကို ဖမ်းဆီးရိုက်နှက်မှု ရှိကြောင်း ဒေသခံများက ပြောသည်။

“တိုက်ပွဲက ငြိမ်သွားပေမယ့် စစ်တပ်က ရွာထဲ တပ်စွဲထားနေတုန်းပဲ၊ အဲ့ဒါကြောင့် ရွာသားတွေက နေရပ်ပြန်ဖို့ ကြောက်ရတယ်။ ရွာအနီးမှာလည်း KIA တပ်က သွားလာ လှုပ်ရှားမှုတွေ ရှိနေတယ်လေ” ဟု အထက်ပါ စစ်ရှောင် ကူညီပေးနေသူက သျှမ်းသံတော်ဆင့်ကို ဆက်ပြောသည်။

ပြီးခဲ့သည့် ဇူလိုင်လ ပထမပတ်မှ စတင်ကာ ကွတ်ခိုင်မြို့နယ်အတွင်း အာဏာသိမ်း စစ်ကောင်စီ နှင့် ကချင်လွတ်လပ်ရေး တပ်ဖွဲ့ KIA တို့အကြား တိုက်ပွဲကြောင့် အရပ်သား ၂ ဦး လက်နက်ကြီးထိ သေဆုံးရသည့် အပြင် တခြားဒေသခံ ၅ ဦး ထက်မနည်း လက်နက်ကြီးထိမှန် ဒဏ်ရာရသွားကြောင်း စုံစမ်းသိရသည်။