စစ်တပ်က အာဏာသိမ်းပြီးနောက်ပိုင်း သျှမ်းပြည်တွင် မူးယစ်ဆေးဝါးသုံးစွဲပြီး အိမ်ခြေမဲ့အဖြစ် နေထိုင်သူများပြားလာရာမှ တစ်လကို အနည်းဆုံး ၃ ဦးနှုန်း သေဆုံးနေပြီး အိမ်ခြေမဲ့ နေထိုင်သူကို ပြန်လည်နေရာ ချထားရေး ပြုလုပ်ရန် လိုအပ်နေကြောင်း ဒေသခံများ၏ပြောဆိုချက်အရ သိရသည်။
ပြီးခဲ့သည့် ဇူလိုင် ၁၄ ရက် နှင့် ဇူလိုင် ၁၆ ရက်တွင် လားရှိုးမြို့နယ် လွိုင်လွမ့်ကျေးရွာရှိ ဘောလုံးကွင်း နှင့် လားရှိုးမြို့ ရေကန်တောင် အမှတ် (၄) နှင့် (၅) ကြား၌ ပိုင်ရှင်မဲ့ အမျိုးသား အလောင်း ၂ လောင်း တွေ့ရှိခဲ့ခြင်း ဖြစ်သည်။
အလားတူ ဇူလိုင် ၁၈ ရက်တွင် သိန္နီမြို့ အမှတ် ၃ ရပ်ကွက် ပိန်းအွယ်ကုန်းရှိ လူမနေသည့် နေအိမ်တစ်လုံးထဲ၌ အမည် နှင့် နေရပ်လိပ်စာ မသိရှိရသည့် ပိုင်ရှင်မဲ့ အမျိုးသားတစ်ဦး၏ အလောင်းကို ထပ်တွေ့ရှိခဲ့ကြောင်း ၎င်းကိုသွားရောက် ကူညီခဲ့သည့် အနှိုင်းမဲ့ကုသိုလ် လူမှုကူညီရေးအသင်းထံမှ သိရသည်။
လက်ရှိ ၂၀၂၃ ခုနှစ်အတွင်း သိန္နီမြို့နယ်တွင် ပိုင်ရှင်မဲ့ အလောင်း ၁၀ ဦးခန့် တွေ့ရှိရပြီး သေဆုံးသူ အများစုသည် မူးယစ်ဆေးဝါးကြောင့် သေဆုံးရခြင်း ဖြစ်ကြောင်း သိရသည်။
“သိန္နီမှာတော့ အိမ်ခြေရာမဲ့ များတယ်။ ပြီးခဲ့တဲ့ အရင်လတွေကလည်း သေတယ်။ ဒီနှစ်ထဲမှာဆိုရင် ၈ ယောက်၊ ၉ ယောက်လောက် ရှိနေပြီ။ အဲ့လို အိမ်ခြေမဲ့ နေထိုင်သူတွေကလည်း တစ်မြို့နယ်လုံးမှာ ၁၀၀ ဝန်းကျင်လောက် ရှိတယ်။ ကားလမ်းဘေးမှာရှိတဲ့ လူမနေအိမ်တို့၊ လူလွတ်တဲ့ နေအိမ်တို့မှာ နေကြတာများတယ် “ ဟု ၎င်း လူမှုကူညီရေးအသင်းမှ တာဝန်ခံတစ်ဦးက ပြောသည်။
အဆိုပါ မူးယစ်ဆေးဝါးကြောင့် အိမ်ခြေမဲ့အဖြစ် နေထိုင်သူ များပြားလာပြီး မကြာခဏ သေဆုံးခြင်း နှင့် ပတ်သက်၍ မည်သည့် အဖွဲ့အစည်းမှ တာဝန်ယူပြီး ထိထိရောက်ရောက် ဆောင်ရွက်ပေးခြင်း မရှိကြောင်း သိရသည်။
ထို့အပြင် မူးယစ်ဆေးဝါးသုံးစွဲမှုများ၊ အိမ်ခြေမဲ့ နေထိုင်သူများကို ပြန်လည်နေရာချထားရေး ပြုလုပ်စေလိုကြောင်း ဒေသခံတစ်ဦးက ထပ်လောင်းပြောသည်။
“မူးယစ်ဆေးဝါးသုံးစွဲတဲ့သူတွေ၊ အိမ်ခြေမဲ့ နေထိုင်တဲ့ သူတွေကို ထိန်းပြီး ပြန်လည်နေရာချထားရေး၊ ပြုပြင်ရေး စခန်းတို့ လုပ်ပေးရင်တော့ ပိုကောင်းတာပေါ့။ ဟိုမှာတစ်လောင်းတွေ့တယ်၊ ဒီမှာတစ်လောင်းတွေ့တယ် မဖြစ်တော့ဘူး။ ပြီးတော့ ပြည်သူတွေအနေနဲ့လည်း သွားလာတဲ့အခါကြရင် ပိုပြီးစိတ်ချရတော့ရမယ်။ သူတို့ကတော့ ဘာမှမလုပ်ပါဘူး။ မူးယစ်ဆေးဝါးသုံးတဲ့သူတွေဆိုတော့ ကြောက်တယ်လေ “ ဟု ၎င်းဒေသခံ တစ်ဦးက ဆက်ပြောသည်။
ပြီးခဲ့သည့် ဇွန်လအတွင်း လားရှိုးမြို့နယ်အတွင်း ယာဉ်တိုက်မှုများ၊ ဓားခုတ်မှုများ နှင့် မူးယစ်ဆေးဝါး သုံးစွဲမှုများကြောင့် လူ ၅ ဦး သေဆုံးပြီး ၁၄ ဦး ထိခိုက်ဒဏ်ရာ ရရှိခဲ့ကြောင်း သိရသည်။
