သျှမ်းပြည် ဖယ်ခုံမြို့နယ် ခေါင်းအိကျေးရွာ နှင့် စက်တော်ရွာတွင် ယခု ရက်ပိုင်း၌ စစ်ကောင်စီတပ် နှင့် ပြည်သူ့ကာကွယ်ရေးတပ် PDF ပူးပေါင်းတပ်ဖွဲ့တို့အကြား တိုက်ပွဲပြန်လည် ဖြစ်ပွားနေကြောင်း စုံစမ်းသိရသည်။
ပြီးခဲ့သည့် ဇူလိုင် ၁၈ ရက်မှစ၍ ဖယ်ခုံမြို့နယ် ခေါင်းအိကျေးရွာ နှင့် စက်တော်ရွာတွင် စစ်ကြောင်းထိုးလာသော စစ်ကောင်စီတပ်ဖွဲ့ နှင့် ပြည်သူ့ကာကွယ်ရေးတပ် PDF ပူးပေါင်းတပ်ဖွဲ့တို့အကြား တိုက်ပွဲပြန်လည် ဖြစ်ပွားနေခဲ့ပြီး နေ့ရက်ဆက်တိုက် ပစ်ခတ်သံများ ကြားနေရကြောင်း ဖယ်ခုံမြို့ဒေသခံ တစ်ဦးက သျှမ်းသံတော်ဆင့်ကိုပြောသည်။
“တိုက်ပွဲပြန်ဖြစ်တာ ၂ ရက်လောက် ရှိပြီ။ ဒီတစ်ရက် နှစ်ရက်အတွင်း ခေါင်းအိ နဲ့ စက်တော်ရွာမှာ စစ်တပ်က တပ်စွဲထားတော့ အဲ့မှာလူအင်အားပြန်ဖြည့်တာ တိုက်ပွဲဖြစ်တာ။ သူတို့ တပ်စွဲထားတာတော့ ကြာပြီ ၁ လလောက် ရှိပြီ။ သုံးလေးရက်လောက် ပြန်ငြိမ်ပြီ အခုတိုက်ပွဲပြန်ဖြစ်တာပေါ့။ လက်နက်ငယ်၊ လက်နက်ကြီးတွေ နဲ့ ပစ်ခတ်နေတာတော့ ဒီနှစ်ရက်ဆက်တိုက်တော့ တစ်နေကုန်လောက် ပစ်နေတာပဲ “ ဟု ၎င်းဒေသခံ တစ်ဦးက ပြောသည်။
အဆိုပါ တိုက်ပွဲအတွင်း ဖယ်ခုံမြို့နယ် အခြေစိုက် စစ်ကောင်စီ၏ ခမရ – ၃၃၆ ၊ ခမရ – ၄၂၁ နှင့် စက (၇) တို့လည်း ပါဝင်ပြီး ပစ်ခတ်ခဲ့သဖြင့် ပြည်သူ့ကာကွယ်ရေး PDF ပူးပေါင်းတပ်ဖွဲ့မှ ပြန်လည်ခုခံတိုက်ခိုက်နေကြောင်း သိရသည်။
ယင်းကဲ့သို့ တိုက်ပွဲအတွင်း ထိခိုက်သေဆုံးမှု အသေးစိတ် နှင့် ပတ်သက်ပြီး ဖယ်ခုံပြည်သူ့ကာကွယ်ရေးတပ်ဖွဲ့ PKPDF ထံ ဆက်သွယ်မေးမြန်းရန် ကြိုးစားခဲ့သော်လည်း မြေပြင်ဖုန်းလိုင်း အခက်ခဲကြောင့် ဆက်သွယ်၍ မရခဲ့ပေ။
ထို့အပြင် ဖယ်ခုံမြို့နယ်အတွင်းရှိ ကျေးရွာများ၌ တိုက်ပွဲပြန်လည်ဖြစ်ပွားသောကြောင့် နေရပ်စွန့်ပြီး ထွက်ပြေးတိမ်း ရှောင်သူများက နေအိမ်များ ထပ်မံပျက်စီးသွားမည်ကို စိုးရိမ်နေကြရသလို စိုက်ခင်း ပြန်မလုပ်နိုင်သဖြင့် နှောင်နှစ်အတွက် ပိုခက်ခဲလာမည်ကို စိတ်ပူနေကြောင်း စစ်ဘေးရှောင် တစ်ဦးက ပြောသည်။
“ကျနော်တို့ စိုးရိမ်တာတော့ နေအိမ်တွေ ထပ်ပြီးပျက်စီးမှာကို ကြောက်တာပေါ့။ ပြီးတော့ စစ်ရှောင်ထားတာ လည်းကြာပြီပေါ့။ ရွာသားတွေ အကုန်လုံး နှစ်လသုံးလလောက်ရှိပြီ မြို့ပေါ်ရှောင်တဲ့သူနဲ့ တောကိုရှောင်သွားတဲ့ သူနဲ့ရှောင်နေကြတာ။ စိုးရိမ်တာတော့ စိုက်ပျိုးရေး မလုပ်ရဘူးဆိုတော့ နောက်နှစ် ပိုခက်ခဲမှာပေါ့။ ပြီးတော့ အိမ်ပြန်ရတဲ့အချိန်ဆို အိမ်ကောင်းတစ်လုံးမှ မရှိတော့ဘူး။ မိုးရေစိုပြီး ဆွေးကုန်ပြီ “ ဟု စစ်ရှောင်တစ်ဦးက ပြောသည်။
ကယား (ကရင်နီ) တော်လှန်ရေး တပ်ပေါင်းစု (KRU) ၏ ထုတ်ပြန်ချက်အရ ဇွန်လဆန်းပိုင်းမှစပြီး ဇူလိုင် ဒုတိယပတ်အထိ တစ်လခွဲနီးပါး ဖယ်ခုံမြို့နယ်တိုက်ပွဲတွင် စစ်ကောင်စီဘက်မှ ၁၉ ဦး သေဆုံးပြီး ဖယ်ခုံ PDF ရဲဘော် ၁ ဦး ကျဆုံးကာ ၃ ဦး ထိခိုက်ဒဏ်ရာ ရရှိခဲ့ကြောင်း ဇူလိုင် ၁၄ ရက်စွဲ၏ ထုတ်ပြန်ချက်အရ သိရသည်။
Leave a Comments