မြန်မာနိုင်ငံ စစ်ပဋိပက္ခနယ်မြေ မြင့်တက်နေသည့် တိုင်း နှင့် ပြည်နယ် (၈) ခုကို ခရီးမသွား ဗြိတိန် နိုင်ငံခြားရေး ၊ ဓနဿဟာရ နှင့် ဖွံ့ဖြိုးရေး ဌာန (FCDO) က ထုတ်ပြန်ပြောဆိုလိုက်သည်။
မြန်မာနိုင်ငံ၏ လုံခြုံရေးသည် ကြိုတင်ခန့်မှန်းမှု မပြုလုပ်နိုင်သည့် အခြေအနေဖြစ်နေပြီး လေကြောင်း တိုက်ခိုက်မှုများ၊ လက်နက်ကြီး ပစ်ခတ်မှုများ၊ မြေမြှုပ်မိုင်း နှင့် လက်နက်ကိုင်တိုက်ပွဲများ ဆက်လက် ဖြစ်ပွားနေသည့်အတွက် ဗြိတိန်နိုင်ငံသားများအနေဖြင့် တိုင်း နှင့် ပြည်နယ် (၈) ခုကို လုံးဝမသွားရန် တားမြစ်လိုက်သည်။
ထိုတိုင်း နှင့် ပြည်နယ် (၈) ခုမှာ မွန်၊ ကချင်၊ ချင်း၊ ကရင်နီ(ကယား)၊ ကရင်၊ စစ်ကိုင်း၊ မကွေး နှင့် ရခိုင်ပြည်နယ်မြောက်ပိုင်း တို့ ဖြစ်သည်။
ထို့အပြင် သျှမ်းပြည်၊ မန္တလေး နှင့် တနင်္သာရီတိုင်း၊ ရခိုင်ပြည်နယ် အလယ်ပိုင်းတို့ ခရီးသွားလာမှု တားမြစ်သော်လည်း မဖြစ်မနေ သွားလာရန်ရှိပါက သွားလာနိုင်သည့် ဒေသများကြောင်း ဗြိတိန် အစိုးရ က သတ်မှတ်ထားသည်။
“နိုင်ငံခြားသားတွေအဖို့ မတရားဖမ်းဆီးချုပ်နှောင်ခံရနိုင်ခြေ အန္တရာယ်နည်းပေမယ့် သတင်းသမားတွေနဲ့ တက်ကြွလှုပ်ရှားသူတွေဆိုရင်တော့ အဖမ်းခံရနိုင်ပြီး အထူးသဖြင့် မြန်မာအာဏာသိမ်းစစ်ကောင်စီဟာ လွတ်လပ်တဲ့ သတင်းတင်ဆင်မှု နဲ့ သတင်းမီဒီယာစာနယ်ဇင်းပုံစံအားလုံးကို အထူးစောင့်ကြည့်နေတဲ့အတွက် သတိပြုကြဖို့” ဗြိတိန် ၏ လမ်းညွှန်ချက်ထဲတွင် ဖော်ပြထားပါသည်။
မြန်မာနိုင်ငံ၏ မြို့ပြအများစုသည် ပုံမှန်နေ့စဥ်ဘဝ ပြန်လည် သွားလာလှုပ်ရှားမှုများတွေ့ရသော်လည်း အထူးသဖြင့် နိုင်ငံရေး တင်းမာမှုများ တိုးလာချိန်တွင် ပစ်ခတ်မှုများ၊ ပေါက်ကွဲမှုများ ဖြစ်လေ့ရှိကြောင်းလည်း ဗြိတိန်က အသိပေးထားသည်။
လက်ရှိ တိုက်ခိုက်မှုများသည် ရန်ကုန်မြို့ နှင့် နေပြည်တော်ပါမကျန် ဖြစ်ပွားနေပြီး အဓိကအားဖြင့် အစိုးရ အဆောက်အဦးများ၊ ရဲစခန်းများ၊ ရပ်ကွက်အုပ်ချုပ်ရေးမှူးရုံး၊ လမ်းပေါ်ရှိ ယာဥ်ထိန်းရဲရုံး၊ စစ်ဆေးရေးဂိတ်၊ စစ်တပ်ပိုင်နေရာ နှင့် စစ်တပ်ပိုင်လုပ်ငန်းများကို ပစ်မှတ်ထားတွေ့ရှိရကြောင်း ဗြိတိန် အစိုးရက သတိပေးထားသည်။
နိုင်ငံခြားသားများ ပုံမှန်မကြာခဏ သွားရောက်လေ့ရှိသည့် ဟိုတယ်များ၊ စားသောက်ဆိုင်များ၊ စျေးဝယ်စင်တာများလည်း တိုက်ခိုက်မှုများရှိနိုင်ကြောင်း ဗြိတိန်က အသိပေးလိုက်သည်။