သျှမ်းပြည် တာချီလိတ်မြို့ အထွက်ရှိ ဗျူဟာကုန်း လမ်းအဆင်း လမ်းဘေးတွင် အိမ်ခြေမဲ့နေထိုင်သူ ၃ ဦး ထိုင်နေစဉ် ကားတစ်စီးမှ မတော်တဆ ဝင်တိုက်မိခဲ့ပြီး ၂ ဦး သေဆုံးသွားခဲ့ကြောင်း စုံစမ်းသိရသည်။
ယမန်နေ့ (ဇူလိုင် ၁၉) ရက် ည ၁၀ နာရီဝန်းကျင်တွင် တာချီလိတ်မြို့ အထွက်ရှိ ဗျူဟာကုန်း လမ်းအဆင်းမှ လမ်းဘေးတနေရာတွင် ထိုင်နေသည့် အိမ်ခြေမဲ့ နေထိုင်သူ ၃ ဦးကို ကားတစ်စီးမှ မတော်တဆ ဝင်တိုက်မိပြီး ၂ ဦး သေဆုံးခဲ့ရာ ဝင်တိုက်သည့် ကားက ထွက်ပြေးသွားကြောင်း ၎င်းကို သွားရောက်ကူညီခဲ့သည့် ဦးလှမိုးတာချီလိတ် လူမှုကူညီရေးအသင်းက ပြောသည်။
“သူတို့က ပျံကျနေထိုင်တဲ့သူတွေ၊ ကားက လမ်းကနေလျော်ပြီး အရှိန်လွန် ဝင်တိုက်သွားတာ။ ကားလည်း ထွက်ပြေးတယ်။ အခုယာဉ်ထိန်းတွေက လိုက်နေတာပေါ့၊ မတွေ့သေးဘူး။ သူတို့ ၃ ယောက်ထဲက ၂ ယောက် သေတယ်။ အမျိုးသမီးတစ်ယောက် နဲ့ အမျိုးသားတစ်ယောက် တာချီလိတ် ပြည်သူ့ဆေးရုံကြီးကို ပို့ဆောင်ပေးခဲ့တယ် “ ဟု ၎င်း လူမှုကူညီရေးအသင်းမှ တာဝန်ခံတစ်ဦးက ပြောသည်။
အဆိုပါ မတော်တဆ ယာဉ်တိုက်မှုကြောင့် သေဆုံးသွားခဲ့သည့် အမျိုးသားတစ်ဦး နှင့် အမျိုးသမီးတစ်ဦးသည် မည်သည့် ဒေသမှလာသော ဒေသခံဖြစ်ကြောင်း မသိရသလို နာမည် နှင့် အသက်ကိုလည်း မသိရှိရကြောင်း ၎င်းကဆက်ပြောသည်။
ထို့အပြင် တာချီလိတ်မြို့သည် နယ်စပ်ဒေသ နှင့်နီးစပ်သည့် မြို့ကြီးဖြစ်သောကြောင့် ရွှေ့ပြောင်းအလုပ်သမားများ၊ လူနေထူထပ်မှု များပြားလာရာ ယာဉ်စည်းကမ်း၊ လမ်းစည်းကမ်းများ လိုက်နာဆောင်ရွက်ခြင်း မရှိတော့သဖြင့် မကြာခဏ ယာဉ်တိုက်မှုများ ဖြစ်ပေါ်နေကြောင်း သိရသည်။
“အဓိကတော့ ဆိုင်ကယ်မောင်းတဲ့သူက ဆိုင်ကယ် ဦးထုပ်ဆောင်းရင် အသက်အန္တရာယ်ကတော့ ၉၀ ရာခိုင်နှုန်း မစိုးရိမ်ရဘူး။ သူတို့က ဦးထုပ် မဆောင်းတဲ့အခါ ဖမ်းတုန်းခဏ၊ ပညာပေးတုန်းခဏ ပြီးရင် ပြန်ချွတ်ကြတာ။ တချို့ မော်တော်ပီကယ်မြင်မှ ဦးထုပ်ဆောင်းတယ်။ အဲ့လိုမျိုးဖြစ်နေတော့ မပြောကောင်း၊ မဆိုကောင်း လက်ကျိုးရင် စတီးပြန်ထည့်လို့ရတယ်။ ဦးထုပ်မဆောင်းတဲ့ အခါကြတော့ သတိလှစ်မယ်။ မတော်တဆ အသက်ဆုံးရှုံးမယ် “ ဟု တာချီလိတ်မြို့ ယာဉ်ထိန်းရဲ သမားတစ်ဦးက ပြောသည်။
အလားတူ ယာဉ်တိုက်မှုများ လျော့ပါးသွားစေဖို့ ရဲတပ် နှင့် ယာဉ်ထိန်းရဲတပ်ဖွဲ့များအနေဖြင့် ယာဉ်စည်းကမ်း၊ လမ်းစည်းကမ်း နှင့် ပတ်သက်၍ အသိပညာပေး ဟောပြောပွဲပြုလုပ်ခြင်း၊ လက်ကမ်းစာစောင်ပေးခြင်းဖြင့် မကြာခဏ ပြုလုပ်ပေးစေလိုကြောင်း ဒေသခံ တစ်ဦးက ထပ်လောင်းပြောသည်။
ပြီးခဲ့သည့် ဇူလိုင် ၁ ရက်မှ ယနေ့ (ဇူလိုင် ၂၀ )ရက်အထိ တာချီလိတ်မြို့တွင် မတော်မဆ ယာဉ်တိုက်မှုများ၊ တိမ်းမှောက်မှုများသည် စုစုပေါင်း ၁၁ ကြိမ် ဖြစ်ပွားနေပြီး ၃ ဦးသေဆုံးကာ ၁၂ ဦး ထိခိုက်ဒဏ်ရာရရှိခဲ့သည်။
