သျှမ်းပြည် ကွတ်ခိုင်မြို့နယ်၊ နမ့်ဖတ်ကာကျေးရွာအတွင်း အာဏာသိမ်း စစ်ကောင်စီ တပ်ဖွဲ့မှ ပစ်လိုက်သည့် လက်နက်ကြီးကြောင့် နေအိမ်တစ်လုံး မီးလောင်ပျက်စီးရသည့်အပြင် ဒေသခံ ၁ ဦး သေ ၊ ၄ ဦး ဒဏ်ရာရ သွားကြောင်း စုံစမ်းသိရသည်။
ယမန်နေ့ (ဇူလိုင် ၁၈ ) ရက် ညနေပိုင်း ၄ နာရီဝန်းကျင်မှ စတင်ကာ နမ့်ဖတ်ကာအနီး စစ်ကောင်စီ နှင့် ကချင် လွတ်လပ်ရေး တပ်မတော် KIO/KIA တို့က ထိတွေ့တိုက်ပွဲဖြစ်ပြီး စစ်ကောင်စီဘက် လက်နက်ကြီး /ငယ်တို့ဖြင့် ရမ်းသမ်း ပစ်ခတ်ခဲ့ကြောင်း သိရသည်။
အဆိုပါ တိုက်ပွဲသည် ၂ နာရီ နီးပါး ကြာမြင့်ပြီး ည ၆ နာရီဝန်းကျင်တွင် နမ့်ဖတ်ကာ အခြေစိုက် စစ်ကောင်စီ၏ ခလရ (၁၂၃) တပ်မှ လက်နက်ကြီး ရမ်းသမ်းပစ်ခတ်မှုကြောင့် နမ့်ဖတ်ကာကျေးရွာအုပ်စု၊ ခိုမုန်းကျေးရွာ အနီးရှိ ဇွတ်ရာရွာသစ်ကျေးရွာမှ နေအိမ် (၁) လုံး ထိမှန်ပြီး မီးလောင် ပျက်စီးသွားကြောင်း ဒေသခံများက ပြောသည်။
“လက်နက်ကြီးက အရပ်လေးမျက်နှာလုံးကို ပစ်နေကြတာ၊ အိမ်ထဲနေ နေပေမဲ့ အသံတွေက ကြားနေရတော့ အိမ်ပေါ်ပဲ လက်နက်ကြီး ကျမလား၊ တခြား နေရာရှောင်သွားရမလားဆိုတာမျိုးတွေ တွေးမိသေးတယ်။ ရွာသစ် ဘက်မှာတော့ လက်နက်ကြီး ကျလို့ အိမ်တစ်လုံးလည်း မီးလောင်ပျက်စီးရတယ်” ဟု လုံခြုံရေးအရ အမည် မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ထို့အပြင် စစ်ကောင်စီမှ လက်နက်ကြီးများဖြင့် ရမ်းသမ်းပစ်ခတ်မှုကြောင့် နေအိမ်အတွင်း ဝပ်နေကြသည့် ကလေးငယ် တစ်ဦး အပါအဝင် ဒေသခံများ (၄) ဦးလည်း လက်နက်ကြီးစ ထိမှန် ဒဏ်ရာရပြီး တစ်ဦးက သေဆုံးသွားရကြောင်းလည်း သိရသည်။
“အိမ်ထဲမှာ နေနေတာတောင် လက်နက်ကြီးစတွေ ထိမှန်လို့ အသက် (၉) နှစ်အရွယ် ကလေးတစ်ဦးက သေဆုံးသွားရတယ်။ စာရင်းအရ သိရတဲ့ လက်နက်ကြီးကြောင့် ထိခိုက်ဒဏ်ရာ ရသွားတဲ့ သူတွေက (၄) ဦးရှိတယ်၊ တစ်ဦးက ဒဏ်ရာပြင်းလို့ ဆေးရုံမှာပဲ ဆုံးသွားတယ်” ဟု နမ့်ဖတ်ကာမှ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထိခိုက်ဒဏ်ရာရသူများကို လူမှုကူညီရေးအသင်းမှ ဆေးရုံသို့ လာရောက်သယ်ယူ ပို့ဆောင်ပေးခဲ့ ကြောင်းလည်း သိရသည်။
သေဆုံးသူသည် အသက် (၁၇) နှစ်အရွယ်ရှိ မောင်ဖောင်ယမ်နော်ပါ ဖြစ်ပြီး ထိခိုက်ဒဏ်ရာရသူများက ဒေါ်ကဒိုး ခေါ်နန် (၄၇) နှစ်၊ မောင်ဘရန်စစ် (၁၆) နှစ်၊ မောင်ဘရန်ဆန် (၉) နှစ် နှင့် ဆရာမ မေရီဆိုင်းနန် တို့ဖြစ်ကြကြောင်းလည်း သိရသည်။
အဆိုပါ တိုက်ပွဲ အတွင်းတွင် KIO/KIA တပ်ဖွဲ့သည် နမ့်ဖတ်ကာရှိ စစ်ကောင်စီ၏ နယ်မြေ စခန်းတစ်ခုကိုလည်း သိမ်းပိုက်ရမိခဲ့ကြောင်း KIO/KIA ၏ ပြောရေးဆိုခွင့်ရှိသူ ဗိုလ်မှူးကြီး နော်ဘူက သျှမ်းသံတော်ဆင့်ကို အတည်ပြု ပြောဆိုခဲ့သည်။
“မနေ့က ၄ နာရီလောက်ကစပြီး တိုက်ပွဲတွေ ဖြစ်ပွားခဲ့တယ်။ အဲ့ဒီမှာ စစ်ကောင်စီရဲ့ တပ်စခန်း တစ်ခုကို ကျနော်တို့ တပ်ဖွဲ့ က ဝင်ရောက် စီးနင်းနိုင်ခဲ့တယ်။ ကျနော်တို့ တပ်မဟာ ၆ နယ်ထဲက နယ်မြေထိန်းချုပ်ဖို့ ရည်ရွယ်ချက်နဲ့ လာပြီး ထိုင်ထားတဲ့ စခန်းဖြစ်တယ်လို့ သိရပါတယ်။ အဲ့စခန်းက ၃/၄ ယောက်လောက်ပဲ ရှိသေးတယ်လို့လည်း သိရတယ်။” ဟု ဗိုလ်မှူးကြီး နော်ဘူက သျှမ်းသံတော်ဆင့်ကို ပြောသည်။
အာဏာသိမ်း စစ်ကောင်စီ တပ်ဖွဲ့ နှင့် ကချင်လွတ်လပ်ရေး တပ်မတော် KIO/KIA တပ်ဖွဲ့တို့ ထိတွေ့တိုက်ပွဲသည် ပြီးခဲ့သည့် ဇူလိုင်လ ပထမပတ်အတွင်းမှ စတင်ပြီး ပြင်းထန်လာခဲ့ခြင်း ဖြစ်သည်။
