သျှမ်းပြည် တောင်ကြီးခရိုင် ဖယ်ခုံမြို့နယ်အတွင်း တိုက်ပွဲတွေ ပြန်ပြင်းထန်လာမှာကို ဒေသခံများက စိုးရိမ်နေကြောင်း စုံစမ်း သိရှိရသည်။

ပြီးခဲ့သည့် ဇူလိုင် ၉ ရက်မှစပြီး စစ်ကောင်စီ နှင့် ပြည်သူ့ကာကွယ်ရေးတပ် (PDF) များ တိုက်ပွဲဖြစ်ပွားခဲ့ပြီး ဇူလိုင် ၁၄ ရက်တွင်လည်း စစ်ကောင်စီ၏ ရိက္ခာတင်လာသည့်ကားကို ပြည်သူ့ကာကွယ်ရေးတပ် (PDF) က မိုင်းဆွဲပြီး တိုက်ခိုက်ခဲ့သည့်အတွက်ကြောင့် စစ်ကောင်စီဘက်က အထိနာခဲ့ကြောင်း သိရသည်။

ထိုသို့ စစ်ကောင်စီက အထိနာခဲ့သည့်အတွက်ကြောင့် ဖယ်ခုံမြို့နယ်အတွင်းသို့ စစ်အင်အားပြန်လည် ဖြည့်တင်း လာကြောင်း ဖယ်ခုံမြို့နယ် ဒေသခံ တစ်ဦးက ပြောသည်။

“သူတို့ ဒီလအတွင်းမှာလည်း စစ်ကောင်စီ နဲ့ ပြည်သူ့ကာကွယ်ရေးတပ်တွေက တိုက်ပွဲဖြစ်ကြတယ်လေ။ ပြီးတော့ ဟိုနေ့ကလည်း သူတို့ ရိက္ခာတင်ကားကို PDF တွေက မိုင်းဆွဲ တိုက်ခိုက်တယ်။ စစ်ကောင်စီကလည်း အထိနာတယ်။ အဲ့နေ့မှာ သူတို့ စစ်အင်အားတွေ ပိုဖြည့်တင်းလာတယ်။ ဒီ ရက်ပိုင်းတွေမှာကတော့ တိုက်ပွဲ ပြန်ငြိမ်နေတယ်” ဟု ဖယ်ခုံမြို့ ဒေသခံ အမျိုးသားတစ်ဦးက ပြောသည်။

ပြီးခဲ့သည့် ဇူလိုင် ၁၄ ရက်တွင်လည်း တိုက်ပွဲဖြစ်ပွားမှုမရှိပဲ လွိုင်ပန်ဆုံကျေးရွာကို လက်နက်ကြီး ပစ်ခတ်ခဲ့သည့် အတွက်ကြောင့် စာသင်ကျောင်း ပျက်စီးခဲ့ကြောင်း သိရသည်။

“ဟိုနေ့ကလည်း လွိုင်ပန်ဆုံကျေးရွာကို တိုက်ပွဲမရှိပဲ စစ်ကောင်စီက လက်နက်ကြီး ပစ်ခဲ့တယ်။ အဲ့နားက စာသင်ကျောင်း ပျက်သွားတယ်။ လူထိခိုက်တာတွေတော့ မရှိဘူး။ ကျောင်းပဲ ပျက်သွားတာ။ အခုတိုက်ပွဲ ငြိမ်တာက ပိုကြောက်ဖို့ကောင်းတယ်။ အရင်တွေကလည်း တိုက်ပွဲနည်းနည်းဖြစ်ပြီး ပြန်ငြိမ်သွားရင် နောက်ပိုင်း တိုက်ပွဲတွေ ပိုပြင်းထန်လာတယ်။ အခုလည်း အရင်လိုဖြစ်မှာ ကြောက်နေရတယ်” ဟု ဒေသခံ တစ်ဦးက ပြောသည်။

ဖယ်ခုံမြို့နယ် ခေါင်းအိကျေးရွာ အတွင်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ သည် ဇွန်လ ၁၅ ရက်မှစပြီး တလအတွင်း ၁၄ ကြိမ် ထိတွေ့တိုက်ပွဲဖြစ်ပွားခဲ့ကြောင်း PDF Pekhon ထံမှ သိရသည်။

အလားတူ ဇွန်လအတွင်း တိုက်ပွဲတွင် စစ်ကောင်စီ တပ်သား ၁၉ ဦး သေဆုံးခဲ့ကြောင်း သိရသည်။