မြန်မာ – ထိုင်းနယ်စပ် သျှမ်းပြည် တာချီလိတ်မြို့ရှိ တာချီလိတ် – မယ်ဆိုင် အမှတ် (၂) တံတားမှာ ယမန်နေ့ ဇူလိုင် (၁၄) ရက်ညပိုင်းတွင် မိုင်းဖုန်းဆရာတော်ကို အရေးပေါ် ချင်းရိုင်းဆေးရုံသို့ ပင့်ဆောင်ကာ ဆေးကုသမှု ပြုလုပ်ခဲ့ရကြောင်း စုံစမ်းသိရှိသည်။
ယမန်နေ့ (ဇူလိုင် ၁၄)ရက် ည (၁၀) နာရီဝန်းကျင်တွင် နှစ်နိုင်ငံ ချစ်ကြည်ရေးတံတားကို ဖြတ်သန်းပြီး ချင်းရိုင်းမြို့ရှိ ဘန်ကောက်ဆေးရုံသို့ ပို့ဆောင် ကုသမှု ပြုခဲ့ကြောင်း သိရှိရသည်။
“မိုင်းဖုန်းကျောင်းမှာရှိတဲ့ မိုင်းဖုန်းဆရာတော် ရဲ့ အနီးကပ်ဆရာတော် မိန့်ကြားအရကတော့ မနေ့က ညနေ ၅ နာရီ ၆ နာရီလောက်မှာ မိုင်းဖုန်းဆရာတော် က အသက်ရှုကြပ်လာတဲ့အတွက် ဆရာတော်ကို ချင်းရိုင်းဆေးရုံကို ပင့်ဖို့အတွက် ညတွင်းချင်း ပြင်ဆင်ခဲ့ရတယ်လို့ သိရပါတယ်” ဟု သျှမ်းပြည်အရှေ့ပိုင်း သံဃာနာယက ဥက္ကဌ ဉီးဉာဏသီရိ မှ သျှမ်းသံတော်ဆင့်ကို မိန့်ကြားသည်။
ပြီးခဲ့သည့် ဇူလိုင် (၂) ရက်မှ စတင်ပြီး မိုင်းဖုန်းဆရာတော်သည် မိုင်းလားအထူးဒေသ (၄) ရှိ မိုင်းခန်ဖဝတ်ဂူမှာ အဓိဌာန်ဝင်ခဲ့ခြင်းဖြစ်ပြီး၊ အဓိဌာန်မဝင်ခင် မနက်ပိုင်းတွင် မှိုဆွမ်းဟင်းဘုဥ်းမိခဲ့ရာမှ ဂူအောင်း အဓိဌာန်ဝင်သွားပေမယ့် မူးဝေအော့အန်သည့် ဝေဒနာ ခံစားခဲ့ရကြောင်း သိရှိသည်။
ဇူလိုင် (၈) ရက်တွင်လည်း တာချီလိတ် – မယ်ဆိုင် ချစ်ကြည်ရေးတံတားကို ဖြတ်ပြီး မိုင်းဖုန်းဆရာတော်အား ထိုင်းနိုင်ငံ ချင်းရိုင်းမြို့ရှိ Bangkok Hospital သို့ ပို့ဆောင်ကုသခဲ့ပြီး ပြန်လည်ကျန်းမာလာကာ ဆေးရုံမှ ဆင်းပြီး ဒီနေ့ ဇူလိုင် (၁၀) ရက် နေ့လည် ၂ နာရီခွဲ၌ မိုင်းဖုန်းသို့ ပြန်လည် ကြွရောက်ခဲ့ခြင်းဖြစ်သည်။
ဇူလိုင် (၁၁) ရက်တွင် မိုင်းဖုန်းဆရာတော်သည် မိုင်းဖုန်းကျေးရွာအုပ်စုရှိ စမ်းပူးဂူ မှာ အဓိဌာန် ပြန်လည် ဝင်ရောက်ခဲ့ပါသည်။
မိုင်းဖုန်းဆရာတော်သည် မိုင်းကျက်ဂူတွင် ၂၀၂၂ ခုနှစ် ဇူလိုင် (၃၁) ရက်၌ (၃) နှစ် (၃) လ (၃) ရက် အဓိဌာန်ဝင် ဂူအောင်း တရားဘာဝနာ ကျင့်ကြံမှု အောင်မြင်ပြီးနောက် ဂူမှ ထွက်လာပြီး သြဂုတ် (၁) ရက်မှ စတင်ပြီး (၆) ရက်ဆက်တိုက် တရားနာပရိသတ်များကို တရားဟောခဲ့သည်။
ဂူအောင်းအဓိဌာန် အောင်မြင်ပြီးနောက် ၂၀၂၂ ခုနှစ် သြဂုတ် ၁၀ ရက်မှ ၁၈ ရက်ထိ ထိုင်းနိုင်ငံ ဘန်ကောက်မြို့ရှိ ဘန်ကောက်ဆေးရုံသို့ ဆေးကုသမှု ခံယူခဲ့ရသည်။
Leave a Comments