ထိုင်းနိုင်ငံ၏ ဒုတိယဝန်ကြီးချုပ် နှင့် နိုင်ငံခြားရေးဝန်ကြီး Mr. Don Pramudwinai တို့သည် ဇူလိုင် ၉ ရက်တွင် ဒေါ်အောင်ဆန်းစုကြည် နှင့် တနာရီခွဲနီးပါး တွေ့ဆုံခဲ့ကြောင်း စစ်ကောင်စီ သတင်းပြန်ကြားရေး ဗိုလ်ချုပ်ဇော်မင်းထွန်း က ပြောဆိုလိုက်သည်။

“ထိုင်းနိုင်ငံ ရဲ့ ဒု – ဝန်ကြီးချုပ် နဲ့ နိုင်ငံခြားရေးဝန်ကြီး တို့ ဒေါ်အောင်ဆန်းစုကြည် နဲ့တွေ့ဆုံခဲ့တာရှိပါတယ်။ တွေ့ဆုံချိန်ကတော့ တနာရီခွဲ နီးပါးပါ။ နှစ်ယောက်ချင်း လွတ်လွတ်လပ်လပ် တွေ့ဆုံတာဖြစ်တဲ့အတွက် ကျနော်တို့ အသေးစိတ် မသိရှိပါဘူး” လို့ ဗိုလ်ချုပ်ဇော်မင်းထွန်းက ဆိုသည်။

အဆိုပါ ပြောကြားချက်ကို စစ်ကောင်စီ၏ သတင်းစာဖြစ်သည့် မြန်မာ့အလင်းတွင် ရေးသားထားသည်။

ထိုတွေ့ဆုံချိန်တွင်လည်း ဒေါ်ဆောင်ဆန်းစုကြည်သည် ကျန်းမာရေး ကောင်းမွန်နေကြောင်း တိုင်းပြည်၏ အကျပ်အတည်းကို ဖြေရှင်းရန် တွေ့ဆုံဆွေးနွေးမှုကို အားပေးကြောင်း Mr. Don Pramudwinai က ဇူလိုင် ၁၁ ရက် အင်ဒိုနီးရှားနိုင်ငံ ဂျာကာတာတွင် ကျင်းပသည့် အာဆီယံနိုင်ငံခြားရေး ဝန်ကြီးများ အစည်းအဝေးတွင် ပြောကြားခဲ့သည်။

ဒေါ်အောင်ဆန်းစုကြည် ဦးဆောင်သည့် အမျိုးသားဒီမိုကရေစီ အဖွဲ့ချုပ် (NLD) အစိုးရသည် ၂၀၂၀ အထွေထွေ ရွေးကောက်ပွဲတွင် အနိုင်ရရှိခဲ့ပြီး ရွေးကောက်ပွဲ မဲစာရင်း အငြင်းပွားမှု ကို မဖြေရှင်းဘဲ အစိုးရ ဖွဲ့စည်းရေး ကြိုးပမ်းခဲ့သည့်အတွက် မြန်မာ့စစ်တပ်မှ ၂၀၂၁ ခုနစ် ဖေဖော်ဝါရီ ၁ ရက်တွင် စစ်အာဏသိမ်းပြီး အရေးပေါ် အခြေအနေ ကြေညာခဲ့သည်။

ထို့စစ်အာဏာသိမ်းမှုကို မြန်မာလူထုများက ကန့်ကွက်ကာ အရပ်သား အစိုးရကို ပြန်အပ်နှံရန် ဆန္ဒပြတောင်းဆိုရာမှ လက်ရှိမှာ မြန်မာပြည်ရဲ့ နိုင်ငံရေး အခြေအနေ တရက်တခြား ပိုမိုးဆိုးရွားလာပြီး စစ်ရေး ပဋိပက္ခဖြစ်ပွားသည့်အထိ ဖြစ်လာခဲ့သည်။

ထို စစ်အာဏာသိမ်းပြီး နိုင်ငံရေး ရှုပ်ထွေးနေချိန် စစ်ကောင်စီ ခေါင်းဆောင်းမှ ဖမ်းဆီးထားသည့် ဒေါ်အောင်ဆန်းစုကြည် နှင့် ထိုင်းနိုင်ငံ၏ ဒုတိယဝန်ကြီးချုပ်နှင့် နိုင်ငံခြားရေးဝန်ကြီး Mr. Don Pramudwinai တို့နှင့် ပေးတွေ့သည်မှာ ပထမဆုံး အကြိမ်ဖြစ်သည်။