သျှမ်းပြည် ကွတ်ခိုင်မြို့နယ်အတွင်း တစ်နေ့တည်း အာဏာသိမ်း စစ်ကောင်စီတပ်ဖွဲ့ နှင့် ကချင်လွတ်လပ်ရေး တပ်မတော် (KIA) တို့ ထိတွေ့ တိုက်ပွဲ နှစ်ကြိမ် ဖြစ်ပွားခဲ့ကြောင်း သိရသည်။

ယမန်နေ့ (ဇူလိုင် ၉ ) ရက် နံနက်ပိုင်း ၁၁ နာရီဝန်းကျင်တွင် တစ်ကြိမ် ၊ ညနေပိုင်း ၆ နာရီဝန်းကျင်တွင် တစ်ကြိမ် အာဏာသိမ်း စစ်ကောင်စီ နှင့် KIA တပ်ဖွဲ့တို့ ထိတွေ့တိုက်ပွဲ ဖြစ်ပွားခဲ့ကြောင်း ဒေသခံများ ထံမှ သိရသည်။

နံနက်ပိုင်း ထိတွေ့တိုက်ပွဲ ဖြစ်ပွားမှုတွင် စစ်ကောင်စီ၏ ခြေလျင်စစ်ကြောင်း တစ်ခုသည် သိန္နီမြို့မှ မဘိမ်း ကျေးရွာနားအကျော်တွင် KIA တပ်ဖွဲ့ နှင့် ထိတွေ့ပစ်ခတ်မှု ဖြစ်ခဲ့ရခြင်းဖြစ်ကြောင်း အမည်ဖော်လိုသူ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“အင်အား ၁၀၀ ကျော်လောက်ရှိတဲ့ စစ်ကောင်စီ စစ်ကြောင်း တစ်ခုက မဘိမ်းကျော်နားမှာ KIA နဲ့ တွေ့မိပြီးတော့ တိုက်ပွဲတွေ ဖြစ်ကြတာ၊ အဲ့တိုက်ပွဲက တစ်နာရီကျော် လောက်ကြာတယ်၊ စစ်ကောင်စီဘက် ပြန်ဆုတ်သွားလို့ တိုက်ပွဲ ငြိမ်သွားတာ၊ ထိခိုက်ကျဆုံးမှုတော့ မသိရဘူး” ဟု ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ ထိတွေ့တိုက်ပွဲအပြီး ညနေ ၆ နာရီဝန်းကျင်တွင် စစ်ကောင်စီတပ်ဖွဲ့သည် သိန္နီမြို့မှ စစ်ကား အစီး ၁၀ နီးပါးဖြင့် ကွတ်ခိုင်ဘက် ပြန်တက်လာရာ မဘိမ်း – နမ့်ဖက်ကာကြား အရောက်တွင် KIA စစ်ကြောင်း နှင့် ရင်ဆိုင်ရပြီး တိုက်ပွဲ ထပ်မံဖြစ်ပွားကြောင်း သိရသည်။

“ညနေဘက်ဖြစ်တဲ့ တိုက်ပွဲမှာတော့ လက်နက်ကြီး လက်နက်ငယ် အသံတွေ ကြားရတယ်၊ ပြီးတော့ ရွာတွေ ဘက်လည်း နီးသွားတယ်၊ အဲ့ညနေ ထိခိုက်ကျဆုံးမှု ရှိပေမဲ့ အတိအကျတော့ မသိရဘူး” ဟု အထက်ပါ ဒေသခံက သျှမ်းသံတော်ဆင့်ကို ဆက်ပြောသည်။

ညအချိန်တွင် ဖြစ်ပွားသည့် တိုက်ပွဲတွင် လူနေကျေးရွာ နှင့် နီးစပ်လာသည့်အတွက် ကျေးရွာအနီး ပတ်ဝန်းကျင် သို့ လက်နက်ကြီး ကျရောက်ပေါက်ကွဲမှုလည်း ရှိလာကြောင်း သိရသည်။

အာဏာသိမ်း စစ်ကောင်စီ တပ်ဖွဲ့ နှင့် ကချင်လွတ်လပ်ရေး တပ်မတော် KIA တပ်ဖွဲ့သည် ပြီးခဲ့သည့် ဇူလိုင်လ ၃ ရက်နေ့မှ စတင်ပြီး KIO/KIA ဌာနချုပ်ရှိရာ လိုင်ဇာဒေသအနီးမှာလည်း ထိတွေ့တိုက်ပွဲ ဖြစ်ပွားခဲ့သည်။

စစ်ကောင်စီတပ်ဖွဲ့သည် တစ်နှစ်ကြာ အပစ်ရပ်ထားကြောင်း ထုတ်ပြန်ကြေညာထားသော်လည်း လက်ရှိ အချိန်ထိ တိုင်းရင်းသား လက်နက်ကိုင်တပ်ဖွဲ့များကို ထိုးစစ်ဆင် တိုက်ခိုက်မှု ရှိနေဆဲ ဖြစ်သည်။