သျှမ်းပြည် ဆီဆိုင်မြို့နယ် ပုံးအင်းဒေသတွင် စပါးရိတ်သိမ်းဖို့အတွက် နေ့စားအလုပ်သမားရှားပါးလာကြောင်း စုံစမ်းသိရသည်။
ယခု ဇူလိုင်လ သီတင်းပတ်မှစ၍ ဆီဆိုင်မြို့နယ် ပုံးအင်းဒေသ နောင်စန့်ရွာရှိ မိုးစပါးများကို စတင်ရိတ်သိမ်းနေရာ နေ့စားလိုက် အလုပ်သမားရှားပါးလာသဖြင့် စပါးရိတ်သိမ်းစက်ကို အားကိုးကာ ရိတ်သိမ်းနေရကြောင်း ပုံးအင်းဒေသခံ အမျိုးသားတစ်ဦးက ပြောသည်။
လက်ရှိ စပါးရိတ်သိမ်းချိန်ကာလတွင် နေ့စားလိုက် အလုပ်သမား လုပ်အားခသည် ၆ နာရီကို ၁သောင်းကျပ် ပေး၍ ခေါ်ယူနေရပြီး စပါးကို စက်ဖြင့် ရိတ်သိမ်းပါက တစ်ဧကကို (၁ သိန်း၂ သောင်း) ကျပ်အထိ ပေးဆောင်နေရ ကြောင်း ၎င်းက ဆက်ပြောသည်။
“ဒီနှစ်ကတော့ လူခေါ်ရတာ နည်းတယ်။ လူလည်း သိပ်မရှိတော့ဘူး။ စက်နဲ့ ရိတ်ရတာများတယ်။ အရင်နှစ်က တစ်ဧကကို ၉ သောင်းပေးရတာ ဒီနှစ်ကတော့ ၁ သိန်းကျော်ပြီ။ လူခေါ်ရင်လည်း တစ်နေ့ကို ၁ သောင်း ပေးရတယ်။ ဒီနှစ်ကတော့ အရင်နှစ်ထက်ကဆိုင်ရင် အစစအရာရာ ဈေးတက်လာတာပေါ့ “ ဟု ၎င်း အမျိုးသားက ပြောသည်။
အဆိုပါ နေ့စားခ၊ စပါးရိတ်ခများ မြင့်တက်လာသောကြောင့် တောင်သူများသည် ရိတ်သိမ်းပြီးချင်း စပါးအစိမ်းများကို တစ်ကြိမ်တည်း ရောင်းချပေးနေပြီး တစ်ပိဿကို ၁၂၀၀ ကျပ် ဈေးနှုန်းရရှိကြောင်း သိရသည်။
ထို့အပြင် ပုံးအင်းဒေသမှ တောင်သူများသည် ကုန်ဈေးနှုန်း၊ လယ်ယာစိုက်ပျိုးရေး စရိတ်နှုန်း မြင့်တက်နေသည့်အချိန်ကာလ၌ ရေရှည်စပါး စိုက်ပျိုးရန်အတွက် မတတ်နိုင်တော့ကာ လယ်ယာအစား ပဲပုတ်စိုက်ပျိုးခြင်း၊ လယ်ဧက လျော့ချပြီး စိုက်ပျိုးခြင်း ပြုလုပ်နေရကြောင်း သိရသည်။
“ တစ်နှစ်ပြီး တစ်နှစ် လယ်ဆက်လုပ်ဖို့က မလွယ်ဘူး။ လယ်ထွန်စရိတ်၊ စိုက်ပျိုးစရိတ်၊ ရိတ်သိမ်းစရိတ်တွေ အကုန်တက်တယ်။ စပါးဈေးက သိပ်မရှိဘူးလေ။ ရှိလာရင်တောင်မှ ကုန်ကျစရိတ်တွေနဲ့ ပြန်တွက်ကြည့်ရင် ဘယ်လောက်မှ မကျန်တော့ဘူး။ တချို့က ပဲပုတ်စိုက်တယ်။ လယ်ဧကကို လျော့ပြီး စိုက်တယ် လုပ်နေတာပဲ “ ဟု ပုံးအင်းတောင်သူ တစ်ဦးက ထပ်လောင်းပြောသည်။
စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတွင် နိုင်ငံရေး အခြေအနေမတည်ငြိမ်မှုကြောင့် စီးပွားရေး၊ ပညာရေး ကျဆင်းနေပြီး ပုံးအင်းဒေသ လူငယ်များသည် တစ်အိမ်လျှင် တစ်ယောက်နှုန်းအဖြစ် အိမ်နီးချင်းနိုင်ငံဖြစ်သည့် ထိုင်း၊ တရုတ် နိုင်ငံတို့ကို အလုံးအရင်း ထွက်ပြေးတိမ်းရှောင်သွားသောကြောင့် အလုပ်သမားရှားပါးမှုအခြေအနေနှင့် ကြုံတွေ့နေရသည်။
