သျှမ်းပြည် တောင်ကြီးမြို့တွင် ယခု (ဇူလိုင်) လမှစပြီး အခြားဒေသမှလာသည့် ဒေသခံများ ဧည့်စာရင်း တိုင်ကြားရာ အိမ်ပိုင်ရှင်၏ နာမည်အပါအဝင် နေရပ်လိပ်စာ အတိတကျ နှင့် ရုပ်ပုံအပြည့်ပါသည့် ဓာတ်ပုံထည့်ရန် အကြောင်းကြားခဲ့ကြောင်း စုံစမ်း သိရသည်။
ယခင်က ဧည့်စာရင်းတိုင်ကြားရာတွင် မိမိ နာမည် နှင့် မှတ်ပုံတင်သာပေးပြီး ဧည့်စာရင်းတိုင်ကြားခဲ့ရသော်လည်း ယခု (ဇူလိုင်) မှစပြီး မှတ်ပုံတင် အချက်အလက် အပါအဝင် ငှားရမ်းနေထိုင်သည့် အိမ်ပိုင်ရှင်၏ (နာမည်) မည်သူမည်ဝါဖြစ်ကြောင်း နှင့် အိမ်ခန်းငှားသူ၏ ရုပ်ပုံအပြည့်ပါသည့် ဓာတ်ပုံထည့်ပေးရန် အကြောင်းကြားခဲ့ကြောင်း တောင်ကြီးမြို့ပေါ် အိမ်ငှားရမ်းနေသူ အမျိုးသမီးတစ်ဦးက ပြောသည်။
“ အရင်ကတော့ ဧည့်စာရင်းတိုင်ရင် ကိုယ့်နာမည် နဲ့ မှတ်ပုံတင်လောက်ပဲလေ။ အခုက ကိုယ့်နာမည်ရယ်၊ ဘယ်သူ့အိမ်မှာ လာနေလဲ၊ အိမ်ပိုင်ရှင်က ဘယ်သူလဲဆိုတဲ့ အချက်အလက်တွေကော တောင်းတယ်။ နောက်ပြီး ကိုယ့်မှတ်ပုံတင်တောင်းတယ်။ ကိုယ့်ဓာတ်ပုံတောင်းတယ်။ ဓာတ်ပုံက ရုပ်ပုံအပြည့်ပါတဲ့ ဓာတ်ပုံတောင်းတယ်။ လိုင်စင်ဓာတ်ပုံမရဘူး“ ဟု ၎င်း အမျိုးသမီးတစ်ဦးက ပြောသည်။
အဆိုပါ ဧည့်စာရင်းတိုင်ကြားမှုအတွက် ၃ ဦးလျှင် ကျပ်ငွေ ၁ သောင်း ပေးဆောင်ရပြီး ဇူလိုင်လအတွင်း ဧည့်စာရင်းတိုင်ကြားမှု အပြောင်းအလဲတွင် မည်မျှပေးဆောင်ရမည်ဖြစ်ကြောင်း အသေးစိတ်ကို မသိရသေးပေ။
လက်ရှိမှာ ဧည့်စာရင်းတိုင်ကြားမှု ပိုမိုတင်းကြပ်လာခြင်း နှင့် ပတ်သက်ပြီး စစ်ကောင်စီသည် နိုင်ငံရေးလှုပ်ရှား မှုပါဝင်သူ၊ CDM နှင့် PDF တွေကို အလွယ်တကူရှာပြီး ဖမ်းဆီးနိုင်အောင် လုပ်ဆောင်ခြင်းဖြစ်ကြောင်း တောင်ကြီးမြို့ ဒေသခံအမျိုးသမီးတစ်ဦးက ထပ်လောင်းပြောသည်။
“ထင်တာတော့ သူတို့ ဖမ်းဖို့လိုရင် အလွယ်တကူ ဖမ်းနိုင်အောင်လို့ လုပ်တာပဲ မြင်တယ်။ လူရှာရတာ လွယ်အောင် လုပ်တာလည်း ဖြစ်နိုင်တယ်။ ကိုယ့်အချက်အလက်တွေ၊ ဓာတ်ပုံတွေလည်း တောင်းတယ်ဆိုတော့လေ။ အဲ့လိုပေးရတော့လည်း ကိုယ့်အတွက်တော့ လုံခြုံရေးမရှိဘူး။ လုံခြုံရေး စိုးရိမ်ရတယ် “ ဟု ၎င်းက ပြောသည်။
ထို့အပြင် ၂၀၂၂ အောက်တိုဘာလတွင်လည်း သစ်တောရပ်ကွက်ရှိ နေအိမ်တစ်လုံးထဲတွင် လူငယ်စုံတွဲနှစ်ဦး အတူတူ နေထိုင်ရာ ဧည့်စာရင်း တိုင်ကြားထာခြင်း မရှိသောကြောင့် ရဲများလာရောက် စစ်ဆေးမေးပြီး မှတ်ပုံတင်ကတ်ပြားကို သိမ်းယူကာ ကျပ်ငွေ (၃သောင်း) ဖြင့် ပြန်ရွေးယူခဲ့ရသည်။
