ကရင်နီ (ကယား) ပြည် လွိုင်လင်လေးမြို့နယ်တွင် စစ်ကောင်စီ နှင့် ပြည်သူ့ကာကွယ်ရေး PDF တို့အကြား တိုက်ပွဲကြောင့် နေအိမ် ထိခိုက်ပျက်စီးမှုရှိပြီး ပြည်သူများထပ်မံ ထွက်ပြေးတိမ်းရှောင်နေရကြောင်း စုံစမ်းသိရသည်။
ပြီးခဲ့သည့် ဇူလိုင် ၂ ရက် နံနက်ပိုင်းတွင် လွိုင်လင်လေးမြို့ အခြေစိုက် ခလရ (၅၃၀) တပ်ကို ပြည်သူ့ကာကွယ်ရေး PDF ပူးပေါင်းတပ်ဖွဲ့တို့က ဝင်ရောက်တိုက်ခိုက်ခဲ့၍ နှစ်ဖက်တပ်ဖွဲ့ အပြန်အလှန် ပစ်ခတ်မှု တိုက်ပွဲဖြစ်ပွားခဲ့ကြောင်း KNDF မှ ထုတ်ပြန်ထားသည်။
လက်ရှိ တိုက်ပွဲသည် ငြိမ်နေသေးသော်လည်း စစ်ရေးတင်းမာမှု၊ လက်နက်ကြီး ပစ်ခတ်မှုများကြောင့် ကျေးရွာအတွင်းရှိ ပြည်သူများအချို့က ဆက်လက်နေထိုင်ရန် စိုးရိမ်ကြောက်လန့်နေရပြီး နေရပ်စွန့်ခွာ ထပ်မံ ထွက်ပြေးတိမ်းရှောင်နေရကြောင်း ဒေသခံတစ်ဦးက ပြောသည်။
“အဲ့နေ့က မနက်စောစော PDF တွေဝင်ပစ်တာ၊ စစ်တပ်က ဘေးပတ်လည်ကို လက်နက်ကြီး လှမ်းထုတာ။ အလုံး ၃၀ ကျော်လောက် ထုတယ်။ အခုအိမ်မှာ မနေရဲတော့ဘူး။ ကျနော်တို့ အိမ်ဘေးမှာတင် လက်နက်ကြီးတွေ ကျတာ “ ဟု ၎င်း ဒေသခံတစ်ဦးက ပြောသည်။
အဆိုပါ စစ်ကောင်စီ၏ ခလရ (၅၃၀) တပ်မှ လက်နက်ကြီးဖြင့် ပစ်ခတ်ခဲ့၍ လွိုင်လင်လေးမြို့နယ် လင်ဖုံးကြီးကျေးရွာ၊ နမ့်ဟူးကျေးရွာအတွင်း ကျရောက်ပေါက်ကွဲကာ လူနေအိမ် ထိခိုက်ပျက်စီးမှုရှိခဲ့ကြောင်း ထုတ်ပြန်ချက်၌ ရေးသားဖော်ပြထားသည်။
ထို့အပြင် တိုက်ပွဲကြောင့် ဆီဆိုင်မြို့နယ် ရေဖြူကျေးရွာနှင့် ကယန်းလေးကျေးရွာရှိ စစ်ဘေးရှောင်စခန်းတွင် စစ်ရှောင်ဦးရေ ၄၀၀ ဝန်းကျင် ထပ်မံရောက်ရှိလာနေသဖြင့် စားနပ်ရိက္ခာ အကူညီလိုအပ်နေကြောင်း စစ်ရှောင်ကော်မတီ တစ်ဦးက သျှမ်းသံတော်ဆင့်ကို ပြောသည်။
“ အခု ရေဖြူ နဲ့ ကယန်းလေးမှာ စစ်ရှောင်အသစ်တွေ ထပ်ရောက်လာတာ ရှိတယ်။ လူဦးရေကတော့ ၃၀၀ နဲ့ ၄၀၀ ကြားလောက်မှာရှိတယ်။ တချို့လည်း ဆွေမျိုးရှိရင် သူတို့ဆွေမျိုးတွေနဲ့ သွားနေကြတာရှိတယ်။ စစ်ရှောင်တွေက ထပ်ရောက်လာတာ စားနပ်ရိက္ခာက မရှိဘူး။ အလှူရှင်လည်း မရှိဘူး “ ဟု ၎င်းစစ်ရှောင် ကော်မတီတစ်ဦးက ပြောသည်။
သျှမ်း – ကရင်နီ (ကယား) ပြည် နယ်စပ်တိုက်ပွဲ အပါအဝင် ကရင်နီ (ကယား) ပြည်အတွင်း စစ်ကောင်စီ လေကြောင်းတိုက်ခိုက်မှု၊ လက်နက်ကြီး ပစ်ခတ်မှု တိုက်ပွဲကြောင့် အရပ်သား ၃၃ ဦး သေဆုံးခဲ့ရကြောင်း KNDF B09 က ဇူလိုင် ၅ ရက်၌ ထုတ်ပြန်ထားသည်။
Leave a Comments