သျှမ်းပြည် နှင့် ကယားပြည် (ကရင်နီပြည်) နယ်စပ်ဒေသရှိ တောတွင်းတစ်နေရာသို့ ရောက်ရှိနေသည့် စစ်ရှောင် လူဦးရေ ၇၀၀ နီးပါးသည် တုပ်ကွေးရောဂါ ကူးစက်ခံစားနေရပြီး ရိက္ခာအကူအညီများ လိုအပ်နေကြောင်း စုံစမ်းသိရသည်။

အဆိုပါ စစ်ဘေးရှောင်များသည် သျှမ်းပြည် ဖယ်ခုံမြို့နယ်၊ မိုးဗြဲမြို့နယ် နှင့် ကရင်နီပြည်မှ ဒီးမော့ဆိုမြို့နယ်တို့ အပြင် အနီးပတ်ဝန်းကျင်မှ ဒေသခံရွာသားများ စစ်ရှောင်ထွက်ပြေး လာရခြင်းဖြစ်ကြောင်းလည်း သိရသည်။

“တစ်နေရာတည်း စုနေတာမျိုးတော့ မဟုတ်ပါဘူး၊ ဟိုနေရာတစ်စု ဒီနေရာ တစ်စုနဲ့ ဒီတောထဲမှာ ရှိနေတာ တစ်နှစ် လောက်ရှိနေပြီ၊ အခုက မိုးတွေရွာလာပြီဆိုရင် အမိုးအကာတွေ မလောက်မငှနဲ့ တော်တော်ကို ခက်ခဲတယ်၊ ပြီးတော့ ကလေးငယ်တွေ အားလုံးနီးပါးက တုပ်ကွေးဖြစ်တယ်၊ လူကြီးတွေကလည်း အဖျားပိုးတွေ ဝင်နေကြ တယ်” ဟု စစ်ရှောင်ကို ကူညီပေးနေသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

ထို့အပြင် ပြီးခဲ့သည့် ဇူလိုင်လ ၄ ရက်နေ့ ဒီးမော့ဆိုမြို့နယ် ဒီးမော့ဆိုအနောက်ခြမ်း စစ်ရှောင်စခန်း တစ်နေရာကို စစ်ကောင်စီ တပ်ဖွဲ့မှ ဗုံးကြဲတိုက်ခိုက်မှုကြောင့် ထပ်မံထွက်ပြေးလာရသည့် စစ်ရှောင်များ အပါအဝင် လက်ရှိ စစ်ရှောင်များသည် ၇၀၀ ကျော် ရှိနေခြင်း ဖြစ်ကြောင်း သိရသည်။

အဆိုပါ စစ်ရှောင်များအနက် အများစုသည် အမျိုးသမီး နှင့် ကလေးသူငယ်များ ဖြစ်ကြပြီး သက်ကြီးရွယ်အိုများ လည်း ပါဝင်ကြကြောင်း စစ်ရှောင်ကူညီထောက်ပံ့ပေးသူများက ဆက်ပြောသည်။

လက်ရှိတွင် စစ်ရှောင်များအတွက် လေးရက်စာအတွက်သာ ရိက္ခာများ ကျန်ရှိနေပြီး ကူညီထောက်ပံ့မှု အချိန်မှီ မရနိုင်ပါက စစ်ရှောင်များ ရိက္ခာပြတ်တောက်နိုင်ကြောင်းလည်း စစ်ရှောင်ကူညီပေးသူ အထက်ပါ အမျိုးသားက သျှမ်းသံတော်ဆင့်ကို ပြောသည်။

“လောလောဆယ်တော့ ရှိထားတဲ့ ရိက္ခာက ၄ ရက်စာ အတွက်ပဲ လုံလောက်နိုင်တော့မယ်။ ဒါတောင် ချွေတာရေး နည်းလမ်းနဲ့ တွက်ထားတာ။ အရင်ကတော့ အလှူရှင်တွေ PDF တွေကနေ လာထောက်ပံ့ပေးတာ ရှိပေမဲ့ အခု ရက်ပိုင်းအတွင်း စစ်ကောင်စီက စစ်ရှောင်စခန်းတွေကို ဦးတည်တိုက်ခိုက်တာတွေ လုပ်လာတော့ အားလုံးက အခက်ခဲတွေ ဖြစ်ရကုန်တာ၊ ဖြစ်နိုင်တော့ အလှူရှင်တွေ အချိန်မှီ ရချင်တာပေါ့” ဟု စစ်ရှောင်ကူညီပေးနေသူက ဆက်ပြောသည်။

စစ်ကောင်စီ တပ်ဖွဲ့သည် မြေပြင်တွင် အရေးနိမ့်ပြီး အပြစ်မဲ့ပြည်သူများရှိရာ စစ်ရှောင်စခန်းကို ရည်ရွယ်ချက်ရှိရှိ လက်နက်ကြီးဖြင့် ထုခြင်း၊ ဝေဟင်မှ ဗုံးကြဲတိုက်ခိုက်ခြင်းများ မကြာခဏ ပြုလုပ်လျက်ရှိကြောင်း ဒီးမော့ဆို PDFက ထုတ်ပြန်ထားသည်၊၊

ပြီးခဲ့သည့် ဇူလိုင်လ ၄ ရက်နေ့ ဒီးမော့ဆိုအနောက်ခြမ်း စစ်ရှောင်စခန်းတစ်နေရာကို စစ်ကောင်စီ ဗုံးကြဲ တိုက်ခိုက်မှုကြောင့် ကလေးငယ် တစ်ဦး အပါအဝင် ၃ ဦး ဒဏ်ရာရရှိခဲ့ကြောင်းလည်း သိရသည်။

ပြီးခဲ့သည့် ဇွန်လ ၅ ရက်နေ့မှစ၍ မိုးဗြဲမြို့အတွင်း စစ်ကြောင်းထိုးလာသော စစ်ကောင်စီတပ် နှင့် တော်လှန်ရေး တပ်ပေါင်းစုတို့အကြား တိုက်ပွဲဖြစ်ပွားခဲ့ရာ တစ်လအတွင်း ကလေးငယ်တစ်ဦး အပါအဝင် အမျိုးသား ၂၀ ဦး၊ အမျိုးသမီး ၃ ဦးကို စစ်ကောင်စီ တပ်ဖွဲ့က အကြောင်းမဲ့ ပစ်ခတ်သတ်ဖြတ်ကြောင်း KNDF B09 က ဇူလိုင်လ ၅ ရက်၌ ထုတ်ပြန်ထားသည်။