သျှမ်းပြည် တာချီလိတ်မြို့နယ် အတွင်း တုပ်ကွေး အဖြစ်များနေသည့်အတွက် ဆေးရုံ/ ဆေးခန်း များတွင် လူနာများပြည့်နေပြီး ကုသရေး၊ ကျန်းမာရေး စောင့်ရှောက်မှုအတွက် အခက်အခဲ ရှိနေကြောင်း စုံစမ်း သိရသည်။

ပြီးခဲ့သည့် ဇွန်လ အတွင်းမှ စတင်ကာ တာချီလိတ်မြို့နယ် နှင့် ကျေးလက်ဒေသများအတွင်း သက်ကြီးရွယ်အို များသည် ရာသီတုပ်ကွေး အဖြစ်များပြီး ကျောင်းသား/သူများ နှင့် ကလေးသူငယ်များက သွေးလွန်တုပ်ကွေး အဖြစ်များနေကြကြောင်း ဒေသခံများက သျှမ်းသံတော်ဆင့်ကိုပြောသည်။

“ကျနော်တို့ ရွာကတော့ တစ်ရွာလုံးနီးပါး ဖြစ်ကြပါတယ်။ တစ်အိမ်မှာ တစ်ယောက်ဖြစ်ပြီး ပျောက်ရင် နောက် တစ်ယောက်က ပြန်ဖြစ်တာ၊ ကူးတဲ့ သဘောမျိုးပေါ့၊ ပြီးတော့ လူကြီးက ရာသီတုပ်ကွေးဖြစ်တယ်၊ ကျောင်းနေ အရွယ် ကလေးတွေကျတော့ သွေးလွန်တုပ်ကွေးဖြစ်ကြတာ” ဟု တာချီလိတ်မြို့မှ အမည်မဖော်လိုသူ ကျေးရွာနေ ဒေသခံအမျိုးသား တစ်ဦးက သျှမ်းသံတော်ဆင့်ကိုပြောသည်။

တုပ်ကွေးရောဂါသည် တစ်ခါဖြစ်ပါက တစ်ပတ်မှ ၁၀ ရက်ကျော်အထိ ကြာမြင့်ကြောင်း နှင့် ဆေးရုံ/ ဆေးခန်း များမှာလည်း လူနာများဖြင့် ပြည့်နှက်နေမှုကြောင့် ကျန်းမာရေးအတွက် စောင့်ရှောက်ကုသမှုများ အခက်အခဲများ ရှိနေကြောင်း သိရသည်။

ယင်းကဲ့သို့ တုပ်ကွေးရောဂါ အဖြစ်များမှုကြောင့် ကျန်းမာရေးဆိုင်ရာ တာဝန်ရှိသူများမှ ခြင် နှိမ်နှင်းရေး နှင့် တုပ်ကွေးရောဂါ ကာကွယ်ကုသရေးအတွက် ကူညီဆောင်ရွက်မှုများ ရှိစေလိုကြောင်းလည်း ဒေသခံများက တောင်းဆိုနေကြသည်။

“ခြင်နှိမ်နှင်းရေးအတွက် လူမှုကူညီရေး အသင်းတွေကတော့ ကျေးရွာတွေထဲ၊ စာသင်ကျောင်းတွေ၊ ရပ်ကွက်တွေမှာ ခြင်ဆေးလာဖြန်းပေးတာ ရှိပါတယ်၊ အခက်အခဲကတော့ ဆေးရုံ/ဆေးခန်းတွေမှာ လူနာတွေလည်း ပြည့်နေတော့ အချိန်အကြာကြီး သွားစောင့်ရတာတွေ၊ ပြီးတော့ တချို့က ဆေးခန်းနဲ့ ဝေးတာတွေက ပုံမှန် ဆေးမကုနိုင်ဘူးပေါ့” ဟု အထက်ပါ ဒေသခံ အမျိုးသားက သျှမ်းသံတော်ဆင့်ကို ပြောသည်။

လက်ရှိ မိုးရာသီသည် တုပ်ကွေး ဖြစ်များသည့် ရာသီဖြစ်သည့်အတွက် ဒေသခံများ အနေဖြင့် ရေနုတ်မြောင်း၊ ခြုံများ နှင့် ခြင်များ ပေါများနိုင်သည့် နေရာများ ရှင်းလင်းသင့်ကြောင်းလည်း ရွှေမယ်ယန်း လူမှုကူညီရေး အသင်းက သျှမ်းသံတော်ဆင့် ကိုပြောသည်။

“တုပ်ကွေးဆိုတာက မိုးရာသီတွေမှာ အဖြစ်များပါတယ်။ ဒါကြောင့်လည်း ခြင်တွေ ခိုအောင်းနိုင်တဲ့ ရေနုတ်မြောင်းတွေ၊ ပြီးတော့ ရေအိုးရေခွက်တွေကို လှဲလည်ပေးသင့်တယ်၊ ဒါမှ ခြင်တွေမရှိမှာ၊ တုပ်ကွေးရောဂါဆိုတာကလည်း ခြင်တွေကနေ ကူးတာများတော့ သတိထားသင့်ပါတယ်” ဟု ရွှေမယ်ယန်း လူမှုကူညီရေး အသင်းက သျှမ်းသံတော်ဆင့်ကိုပြောသည်။

မိုးရာသီအချိန်သည် တုပ်ကွေးရောဂါများ အပြင် ကူးစက်လွယ် ရောဂါများ ဖြစ်ကြသည့် နှာစေး၊ ချောင်းဆိုး၊ ဖျားနှာသည့် ရောဂါများလည်း အဖြစ်များကြကြောင်း သိရသည်။

ယင်းကဲ့သို့ ရောဂါကူးစက် ဖြစ်ပွားမှုများကို အချိန်မှီ ကုသမှု မရှိနိုင်ပါက နှလုံးရောဂါ၊ အဆုပ်ရောဂါ နှင့် ခန္ဓာကိုယ်တွင်း ရေဓာတ်ခမ်းခြောက်ခြင်းများ ဖြစ်စေနိုင်ကြောင်းလည်း ကျန်းမာရေးဆိုင်ရာ ဝပ်ဆိုဒ်ဖြစ်သည့် MynaCare က ထုတ်ပြန်ထားသည်။