သျှမ်းပြည် ဆီဆိုင်မြို့နယ် နောင်ကျောအုပ်စု တခေါ့ခွန်ရွာတွင် မိုးသည်းထန်စွာ ရွာသွန်းမှုကြောင့် တောင်သူများ စိုက်ပျိုးထားသည့် ပြောင်းစိုက်ခင်းအချို့ ပျက်စီးသွားကြောင်း စုံစမ်းသိရသည်။
ယမန်နေ့ (ဇူလိုင် ၃) ရက် ညနေပိုင်းအချိန်တွင် မိုးသည်းထန်စွာရွာသွန်းမှုကြောင့် နောင်ကျောအုပ်စု တခေါ့ခွန်ရွာရှိ တောင်သူ ပြောင်းစိုက်ခင်းသည် ရေကြီးရေလျှံကြောင့် ပျက်စီးသွားခဲ့ရပြီး လမ်းပေါ် ရေလျှံမှုကြောင့် ရွှံ့၊ နှုံးများ ကျန်ရစ်ပြီး သွားလာရန် ခက်ခဲနေကြောင်း ကျေးရွာဒေသခံ တစ်ဦးက သျှမ်းသံတော်ဆင့်ကို ပြောသည်။
“ မနေ့ည စမှောင်ခါစ မိုးရွာတာ မိုးကြီးတယ်။ မိုးကြီးတော့ မြောင်းတွေလည်း ပိတ်တယ်။ မြောင်းရေလျှံတာ ကြောင့် စိုက်ခင်းထဲ ရေဝင်ကုန်တာ။ လက်ရှိ ကျနော့်ပြောင်းခင်းက ၁ ဧက လောက်ပဲ ပျက်စီးတယ် “ ဟု ၎င်းဒေသခံတစ်ဦးက ပြောသည်။
အဆိုပါ ရေကြီးရေလျှံမှုကြောင့် တောင်သူများ စိုက်ပျိုးထားသည့် ပြောင်းစိုက်ခင်း ဧကပေါင်း ပျက်စီးမှု သိနိုင်အောင် နောင်ကျောကျေးရွာအုပ်ချုပ်ရေးမှူးကို ဖုန်းဆက်သွယ်မေးမြန်းသော်လည်း စာရင်းကောက်ယူခြင်း မရှိသေးကြောင်း ပြောသည်။
“ သူတို့က အကြောင်းမကြားလာတော့ ကျနော်လည်း မသိရဘူး။ အကြောင်းကြားလာပြီး ကွင်းဆင်း ပေးပါဆိုလည်း ကျနော်က ဆင်းလို့ရတယ်လေ။ သူတို့လည်း မဆက်သွယ်လာတော့ အကုန်လုံး မသိရသေးဘူး “ ဟု နောင်ကျောကျေးရွာ အုပ်ချုပ်ရေးမှူးက ပြောသည်။
ထို့အပြင် နောင်ကျောကျေးရွာအုပ်စုရှိ ပြောင်းစိုက်ခင်းများသည် နှစ်စဉ်နှစ်တိုင်း သဘာဝဘေးအန္တရာယ်ကြောင့် ရေကြီးရေလျှံဖြစ်ပြီး ပျက်စီးဆုံးရှုံးသွားသည့် ဧကများအတွက် ထောက်ပံ့ငွေ မရရှိကြောင်း သိရသည်။
“ အခုက မြေသြဇာလည်း ဈေးကြီးတယ်။ တောင်သူတွေက တစ်နှစ်တစ်နှစ် ပြောင်းစိုက်ပျိုးဖို့ဆိုတာ မလွယ်ဘူး။ အဲ့ဒီအထဲ မိုးကြီးရင် ပြောင်းခင်းပျက်တယ်။ အဲ့လိုတွေက နှစ်တိုင်းကြုံရတာ။ ဒါပေမယ့် ပျက်စီးမှုအတွက် ထောက်ပံ့ငွေက မရဘူး။ ဒီဘက်မှာက လယ်စပါးတွေ အတွက်သာ ထောက်ပံ့တယ်။ ပြောင်းတွေအတွက် ထောက်ပံ့ပေးမှု မရှိဘူး “ ဟု နောင်ကျောကျေးရွာ ဒေသခံ အမျိုးသားတစ်ဦးက ထပ်လောင်းပြောသည်။
ယင်းကဲ့သို့ နှစ်စဉ်နှစ်တိုင်း ရေကြီးရေလျှံမှုကြောင့် ဆီဆိုင်မြို့နယ်အတွင်းရှိ ပြောင်းစိုက်ခင်းများအပြင် ပုံးအင်းဒေသမှ လယ်ယာဧကပေါင်း ၂ သောင်း ဝန်းကျင်သည် ပျက်စီးဆုံးရှုံးသွားခဲ့ရကြောင်း သိရသည်။
Leave a Comments