သျှမ်းပြည် ကျောက်မဲခရိုင် ၊ နောင်ချိုမြို့ ဒု – မြို့နယ် အုပ်ချုပ်ရေးမှူးသည် CDM လုပ်ပြီးနောက်ပိုင်း ဖမ်းဆီးခံရပြီး စစ်ကြောရေးတွင် စစ်ဆေးမှုကြောင့် သေဆုံးသွားခဲ့ကြောင်း စုံစမ်းသိရှိရသည်။

ပြီးခဲ့သည့် ၂၀၂၂ ခုနှစ် မတ်လအတွင်း နောင်ချိုမြို့နယ် အုပ်ချုပ်ရေးမှူး ဦးဌေးလင်းအောင်သည် ကျောက်မဲမြို့ စစ်ဆေးရေးဂိတ်တွင် ဖမ်းဆီးခံလိုက်ရပြီး ပျောက်ကွယ်သွားခဲ့ကြောင်း သိရသည်။

အဆိုပါ ပျောက်ကွယ်သွားသည့်နေမှစပြီး မည်သည့် သတင်းတစ်စုံတစ်ရာမှ မရရှိဘဲ မိသားစုဝင်များနှင့်လည်း လုံဝ အဆက်အသွယ် ပျက်သွားခဲ့ကြောင်း သိရသည်။

စစ်ကြောရေးအတွင်း ဦးဌေးလင်းအောင် သေဆုံးခဲ့သည်ကို ၎င်းမိသားစုဝင်များက ယခုနှစ် ဇူလိုင်လပိုင်းတွင် ကြားသိခဲ့ရသည်။

“သူအရင်နှစ်ကတည်းက ပျောက်သွားတာ။ သူပျောက်သွားကတည်းက ဘာသတင်းမှ မရတော့ဘူး။ အဆက်သွယ်လည်း မရတော့ဘူး။ သူက ကျောက်မဲဘက်ကို လုပ်စရာရှိတယ်ပြောပြီး ထွက်သွားခဲ့တာ။ အဲ့နေ့ ကနေ ပြန်မလာတော့ဘူး။ နောက်မှသိလိုက်တာက သူ့ကို ကျောက်မဲ စစ်ဆေးရေးဂိတ်မှာ ဖမ်းဆီးခံရတာတဲ့။ အဲ့တာနဲ့ စစ်ကြောရေးမှာ ဟိုဘက်က လက်လွန်ပြီးတော့ ဆုံးသွားပြီတဲ့။ ကျနော်တို့လည်း အခုမှ သိရတာ” ဟု နီးစပ်သူက ပြောသည်။

အဆိုပါ ဦးဌေးလင်းအောင် ပျောက်သွားသည့်နေ့မှစပြီး ၎င်း၏ မိသားစုဝင်များက ထောင်အသီးသီး နှင့် စစ်ကြောရေးတွင် လိုက်ရှာခဲ့သော်လည်း မည်သည့် သတင်းမှ မရရှိခဲ့ပေ။

ထို့နောက် ဦးဌေးလင်းအောင် ၏ မိသားစုဝင်များက အပြည်ပြည်ဆိုင်ရာ ကြက်ခြေနီ ကော်မတီ ( ICRC) အကူညီတောင်းပြီ လိုက်လံရှာဖွေခဲ့သော်လည်း မတွေ့ရှိခဲ့ကြောင်း မိသားစုဝင်များထံမှ သိရသည်။

“ သူပျောက်သွားတာတော့ အကုန်လိုက်စုံစမ်းတယ်။ တစ်ချို့ အဖွဲ့စည်းတွေနား အကူညီတောင်းပြီးတော့လည်း ရှာတယ်။ ကမ္ဘ့ာကြက်ခြေနီအသင်းတို့ ၊ နိုင်ငံရေး အကျဉ်းသားများကို စောင့်ရှောက်တဲ့ အဖွဲ့တွေကနေ စုံစမ်းခိုင်းတယ်။ သူ့နာမည်နဲ့က လုံးဝ မတွေ့ဘူးတဲ့။ တစ်နှစ်ကျော် ရှာမတွေ့ဘူး။ အခုချိန်ထိလည်း သူသေသွားပြီလို့ ကြားသိရတယ်။ ဒါမဲ့ သူ့ ရုပ်အလောင်းကိုတော့ ပြန်မတွေ့ရသေးဘူး” ဟု မိသားစုဝင်က ပြောသည်။

လက်ရှိမှာ ဦးဌေးလင်းအောင်၏ မိသားစုဝင်များသည် ၎င်းနှင့် ပြန်လည်တွေ့ဆုံနိုင်ရန်အတွက် မျှော်လင့်နေကြဆဲဟုဆိုသည်။

စစ်တပ်အာဏာသိမ်းပြီးနောက်ပိုင်း အရပ်သား (၃,၇၄၄) ဦး သေဆုံးသွားခဲ့ပြီး ၊ (၁၉,၃၁၂) က ဖမ်းဆီးခံရဆဲဖြစ်ကြောင်း နိုင်ငံရေး အကျဉ်းသားများကို ကူညီစောင့်ရှောက်ရေးအသင်း AAPP ၏ ဇူလိုင် ၃ ရက်နေ့ ထုတ်ပြန်ချက်အရ သိရသည်