မြန်မာ – တရုတ် နယ်စပ်ဂိတ်တွင် ဘာသာပြန်လုပ်နေသည့် သျှမ်းပြည် မူဆယ်မြို့ ဒေသခံများသည် (၃) လကျော်ကြာထိ လစာမရရှိသေးကြောင်း စုံစမ်းသိရသည်။
အဆိုပါ ဘာသာပြန်လုပ်နေသည့် မူဆယ်မြို့ ဒေသခံများကို တရုတ်အစိုးရက ခန့်အပ်ထားပြီး ကုန်တင်ပို့သူများကို ရုံးတွင်း ဖောင်ဖြည့်ရန်အတွက် ကူညီရန်ဖြစ်သည်။
“နယ်စပ်ဂိတ်တွေမှာ ဘာသာပြန်လုပ်နေတဲ့ သူတွေက လစာမရကြဘူး။ နယ်စပ်တံခါး ဖွင့်ကတည်းက ၃ လကျော်လောက်ရှိနေပြီ။ သူတို့ လစာမရကြဘူး။ သူတို့တွေက ဖောင်ဖြည့်ပေးရတာ။ တရုတ်ဘာသာစကား မတတ်တဲ့သူတွေကို တရုတ်နိုင်ငံထဲ ဝင်ဖို့အတွက် ရုံးကလိုတဲ့ စာတွေ ဖြည့်ပေးရတာ” ဟု မူဆယ်မြို့ဒေသခံက ပြောသည်။
အဆိုပါ မူဆယ်မြို့ ရွှေနန်းတော်ဂိတ် ၊ မန့်ဝိန်းဂိတ်၊ ဆင်ဖြူတော်ဂိတ် နှင့် ကျင်ဆန်ကျော့ဂိတ် တို့တွင် ဘာသာပြန်လုပ်နေသူ အားလုံးက လစာ မရရှိကြောင်း သိရသည်။
လစာရရှိရန်အတွက် အလုပ်သမားများကလည်း တောင်းဆိုခဲ့သော်လည်း ယနေ့ထိတိုင် မရရှိသေးပေ။ ထိုသို့ လစာမရရှိသည့်အတွက်ကြောင့် ဘာသာပြန်လုပ်ပေးနေသူများက စားဝတ်နေရေးအတွက် ခက်ခဲနေကြသည်။
“သူတို့ပြောတာတော့ ၃ လ ပြီးရင် ပေးမယ်တဲ့။ အခုက ၃ လကျော်လာပြီ လစာ မရကြသေးဘူး။ မူဆယ်မှာရှိတဲ့ နယ်စပ်ဂိတ် ၄ ဂိတ်လုံးက လစာမရကြဘူး။ ကျနော်အိမ်က တူလေး ၂ ယောက် သွားလုပ်ကြတာ။ တစ်ယောက်မှလည်း လစာမရကြဘူး။ တောင်းလည်း မရသေးဘူးတဲ့။ လစာမရတော့ သူတို့အတွက် လိုချင်တာတွေ စားချင်တာတွေ ဝယ်လို့မရဘူးပေါ့။ အလုပ်လုပ်ပြီး ပိုက်ဆံမရတာတော့ မဟုတ်သေးဘူး” ဟု ဒေသခံတစ်ဦးက ပြောသည်။
မြန်မာ – တရုတ် နယ်စပ်ဂိတ်တွင် ဘာသာပြန်လုပ်နေသည့်သူများကို တရုတ်အစိုးရက တစ်လကို ယွမ် ၃ ထောင် (မြန်မာကျပ်ငွေ ကာလပေါက်စျေး ၁၂ သိန်းခွဲ ဝန်းကျင်) ဖြင့် ခန့်ထားကြောင်း ဘာသာပြန်လုပ်နေသည့်သူများ ထံမှသိရသည်။
မြန်မာ – တရုတ် နယ်စပ်ဂိတ်ကို ဇန်နဝါရီလမှစပြီး တရုတ်အစိုးရဘက်မှ စတင်ဖွင့်လှစ်ပေးခဲ့သည်။
