စစ်ရှောင်များနေထိုင်သည့် ဆီဆိုင်မြို့နယ် နောင်ကျောကျေးရွာအုပ်စု ရေဖြူကျေးရွာအတွင်း စစ်ကောင်စီတပ်ဖွဲ့မှ လာရောက်ပြီး တပ်စွဲနေထိုင်သဖြင့် တိုက်ပွဲဖြစ်ပွားမည်ကို စိုးရိမ်နေကြောင်း စုံစမ်းသိရသည်။
ပြီးခဲ့သည့် ဇွန်လ ၂၈ ရက် ညနေပိုင်းတွင် ကရင်နီ (ကယား) ပြည်အတွင်း စစ်အင်အား ဖြည့်တင်းရန်လာသည့် စစ်ကောင်စီတပ်ဖွဲ့ သည် စစ်အင်အား ကား ၄ စီးဖြင့် စစ်ရှောင်များနေထိုင်သည့် ရေဖြူကျေးရွာတွင် လာရောက်နေထိုင်ခဲ့ကြောင်း အမည်မဖော်လိုသူ ဒေသခံ တစ်ဦးက ပြောသည်။
အဆိုပါ စစ်ကောင်စီတပ်ဖွဲ့သည် စစ်အင်အား ကား ၄ စီးထဲမှ စစ်သား ၄၀ ခန့်သည် ရေဖြူကျေးရွာ၏ ဘုန်းကြီးကျောင်းဝိုင်းထဲ၌ တပ်စွဲနေထိုင်လျက်ရှိကြောင်း သိရသည်။
“ကျနော်တို့ ရွာမှာစစ်တပ် ကား ၄ စီး ရောက်လာတယ်ဗျ။ ရွာရဲ့ အလယ်မှာ အပြည့်ပဲ။ စစ်သား အင်အားက ဘယ်လောက်ရှိလဲ အတိအကျ မရှိဘူး။ အင်အားကတော့ တော်တော်များတယ်။ အခုထိ ရှိသေးတယ်။ အယောက် ၄၀ လောက်ရှိသေးတယ်။ ဘုန်းကြီးကျောင်းမှာ နေနေတာ“ ဟု ၎င်း ဒေသခံ တစ်ဦးက ပြောသည်။
လက်ရှိ ရေဖြူကျေးရွာအတွင်း တပ်စွဲနေထိုင်သည့် စစ်ကောင်စီတပ်သည် မည်သည့် တပ်ရင်းမှ ဖြစ်ကြောင်း အသေးစိတ်ကိုတော့ မသိရသေးပေ။
ထို့အပြင် စစ်ကောင်စီတပ်ဖွဲ့ နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲပြင်းထန်နေသည့် သျှမ်း – ကရင်နီ (ကယား) ပြည်နယ်စပ်ဒေသ၌ စစ်ကောင်စီသည် ကျေးရွာအတွင်းသို့ လာရောက်တပ်စွဲနေထိုင်ခြင်းကြောင့် တိုက်ပွဲဖြစ်ပွားမည်ကို စိုးရိမ်နေကြောင်း ၎င်း ဒေသခံတစ်ဦးက ဆက်ပြောသည်။
“အခု နယ်စပ်ဒေသမှာ တိုက်ပွဲပြင်းထန်နေတယ်။ ကျနော်တို့ စစ်ရှောင်အများဆုံး နေထိုင်တာကလည်း ရေဖြူမှာပဲ။ အခုလို လာနေတာက ကြောက်ရတာပေါ့။ ဘယ်ချိန်မှာ ပစ်မယ် မသိဘူး “ ဟု ၎င်းဒေသခံ တစ်ဦးက ထပ်လောင်းပြောသည်။
သျှမ်း – ကရင်နီ (ကယား) ပြည်နယ်စပ်ဒေသတိုက်ပွဲကြောင့် နေရပ်စွန့်ပြီး ဆီဆိုင်မြို့သို့ ထွက်ပြေးတိမ်းရှောင် လာရသည့် စစ်ရှောင်များသည် စုစုပေါင်း လူဦးရေ ၈ ထောင်ကျော် ရှိကြောင်း သိရသည်။
Leave a Comments