သျှမ်းပြည် နမ္မတူမြို့နယ်မှ အမျိုးသား တစ်ဦးကို မူးယစ်ဆေးဝါး သုံးစွဲသည့် စွပ်စွဲချက်ဖြင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တပ်သားများက ဝိုင်းဝန်းရိုက်နှက်ကြောင်း စုံစမ်းသိရသည်။
ပြီးခဲ့သည့် ဇွန်လ ၂၃ ရက် ညနေပိုင်းတွင် နမ္မတူမြို့နယ် အမှတ် (၆) ရပ်ကွက်တွင် နေထိုင်သည့် အမျိုးသား တစ်ဦးကို မူးယစ်ဆေးဝါး သုံးစွဲသည် ဆိုသည့် အကြောင်းပြချက်ဖြင့် TNLA တပ်သား နှစ်ဦးက ဖမ်းဆီးရိုက်နှက်ခြင်း ဖြစ်ကြောင်း သိရသည်။
“သူ့ကို မူးယစ်ဆေးဝါးသုံးတယ်လို့ ပြောပြီး လာဖမ်းကြတာ၊ သူက မူးယစ်ဆေးဝါး မသုံးဘူးဆိုပြီး ငြင်းနေလို့ (TNLA) စစ်သား နှစ်ယောက်က ဖမ်းပြီး ရိုက်စစ်တာပေါ့၊ အမှန်တော့ သူက မူးယစ်ဆေးမသုံးပါဘူး၊ အရက် သောက်ထားတော့ အဲ့လိုတွေ အထင်လွဲပြီး ရိုက်ကြတာ၊ သူ့ကို အချိန်တော်တော်ကြာအောင်ရိုက်တယ်” ဟု ဖြစ်စဥ်ကို သိရှိသည့် ဒေသခံ အမျိုးသား တစ်ဦးက သျှမ်းသံတော်ဆင့် ကိုပြောသည်။
အဆိုပါ ရိုက်နှက်ခံရသည့် အမျိုးသားသည် ကျေးရွာအတွင်း အရက်ဆိုင်မှ ပြန်လာချင်းဖြစ်ပြီး အိမ်မရောက်မှီ လမ်းတစ်ဝက်တွင် TNLA တပ်သားနှစ်ယောက်၏ ဖမ်းဆီး စစ်ဆေးရိုက်နှက်မှုကို ခံရခြင်းဖြစ်သည်။
ရိုက်နှက်ခံရမှုကြောင့် အဆိုပါ အမျိုးသားသည် လည်ပင်း နှင့် ပါး၊ ခြေ၊ လက်တို့၌ ထိခိုက်ဒဏ်ရာများ ရရှိသွား ကြောင်းလည်း သိရသည်။
“နားရင်းအုပ်ပြီးတော့ ခြေထောက်နဲ့ ကန်တာ၊ တရွတ်တိုက် ဆွဲတာလည်း ပါတယ်၊ သူ့ဒဏ်ရာတွေကတော့ ပွန်းပဲ့၊ ညိုမဲဒဏ်ရာတွေ နဲ့ လက် အကြောလွဲသွားတယ်၊ ရိုက်နှက်ပြီး အားလုံးက ဝိုင်းတားတော့မှ သူတို့ (TNLA) အထင် လွဲတာပါ ဆိုပြီး ပြန်သွားတယ်” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
ယင်းကဲ့သို့ အရပ်သားတစ်ဦးကို မှားယွင်းသော စွပ်စွဲချက်ဖြင့် ရိုက်နှက်ခြင်း နှင့် ပတ်သက်ပြီး TNLA တပ်ဖွဲ့၏ ပြောရေးဆိုခွင့်ရှိသူထံသို့ ဖုန်းဖြင့် ဆက်သွယ်သော်လည်း အဆက်အသွယ် မရခဲ့ပေ။
ပြီးခဲ့သည့် ဇွန်လ ၁၆ ရက်နေ့တွင်လည်း သိန္နီမြို့နယ်၊ မိန်းပါးကျေးရွာအုပ်စု၊ ဝမ်မိုင် နမ့်ဟူးပွက် (ဝၢၼ်ႈမႂ်ႇ ၼမ့်ႁူးပွတ်း) ကျေးရွာအုပ်ချုပ်ရေးမှူးကို TNLA တပ်သားက ရိုက်နှက်ပြီး လျော်ကြေးငွေ ၄၆,၀၀၀ ကျပ် ဖြင့် ကြေအေးပေးစေခဲ့သည့် ဖြစ်စဉ် ဖြစ်ပွားခဲ့သည်။
