သျှမ်းပြည် လွိုင်လင်ခရိုင် ပင်လုံမြို့အတွင်း စည်ပင်သာယာရေးက လစဥ် အမှိုက်ခွန်ကို ကောက်ယူနေပြီး မြို့တွင်း နှင့် မြို့ပြင်ရှိ အမှိုက်ကို ရှင်လင်းပေးခြင်းမရှိကြောင်း သတင်းရရှိသည်။
ထိုအပြင် စည်ပင်သာယာရေးကလည်း ပုံမှန် အမှိုက်လာကောက်ယူမှုမရှိပဲ အခွန်ကောက်ယူမှုရှိကြောင်း သိရသည်။
“ပင်လုံမှာ အရင်တုန်းက တစ်မြို့လုံး စွန့်ပစ်လို့ရတဲ့ အမှိုက်ကျင်းရှိတယ်။ အခုက မရှိတော့ဘူး။ မြို့ကပစ်ဖို့ နေရာမရှိတော့ စည်ပင်ကားတွေက လွိုင်လင်မြို့မှာ သွားပစ်ရတယ်။ အဲ့လိုဖြစ်တော့ စည်ပင်က အမှိုက်ကို နိုင်နိုင်နင်းနင်းမသိမ်းပေးနိုင်ဘူး။ အမှိုက်ကျတော့ သူတို့ကောက်တယ်။ ပိုက်ဆံရှိတဲ့ သူကလည်း ပုဂ္ဂိုလ်ကားသမားတွေနဲ့ငှားပြီးတော့ ပေးရတာ” ဟု ပင်လုံမြို့ ဒေသခံ အမျိုးသားတစ်ဦးက ပြောသည်။
ထိုကြောင့် ပြည်သူများက မြို့ဝင် ၊ မြို့ထွက် နေရာတွင် အမှိုက်သွားပစ်ကြပြီး အနံ့သက်ဆိုးများ ထွက်ပေါ် နေကြောင်း သိရသည်။
“ကျနော်တို့ကတော့ ဘယ်နားမှ မပစ်ဘူး။ အိမ်မှာပဲ မီးရှို့ပစ်တာ။ တစ်ချို့ကျတော့လည်း မြို့ဝင်မြို့ထွက်တွေ နားသွားပစ်ထားတယ်။ မြောင်းတွေမှာ သွားပစ်တယ်။ အဲ့နားသွားပစ်တော့ အနံ့ဆိုးတွေ ရတယ်။ မြို့ဝင်လာတာနဲ့ အမှိုက်နံ့တွေ အရင်ရတာ။ ပြီးတော့ တစ်ချို့က တိရစ္ဆာန်တွေ သေရင်လည်း အဲ့နားမှာသွားပစ်ကြတာလေ။ မြို့ကတော့ ညစ်ပတ်နေပြီ” ဟု အသက် ၂၆ နှစ်အရွယ် ဒေသခံ တစ်ဦးက ပြောသည်။
ထိုကြောင့် ဒေသခံများက ပင်လုံမြို့အတွင်း အမှိုက်စွန့်ပစ်နိုင်မည့်နေရာကို ပြန်လုပ်ဆောင်ပေးရန်အတွက် ထွေအုပ်များ နှင့် စည်ပင်သာယာရေးကို တောင်းဆိုလိုက်သည်။
“ ဒီလို အမှိုက်ကျင်းတွေရှိဖို့ကလည်း မြို့နယ်အုပ်ချုပ်ရေးမှူးတို့၊ ထွေအုပ်၊ စည်ပင်တွေမှာ တာဝန်ရှိတယ်လေ။ မြေပြင်မှာ ဒီလိုဖြစ်နေတာ အထက်ကတော့ သိလားမသိဘူး။ အမှိုက်သိမ်းတဲ့ အလုပ်ကိုလည်း စည်ပင်အနေ နဲ့ ပိုင်ပိုင်နိုင်နိုင် လုပ်စေချင်တယ်။ အမှိုက်ကျင်းတွေ ပြန်ရှိစေချင်တယ်” ဟု အထက်ပါ ဒေသခံ အမျိုးသားတစ်ဦးက ပြောသည်။
သျှမ်းပြည်အတွင်း မြို့အတော်တော်များများသည် မြို့အထွက်/အဝင်မှာ အမှိုက်ပုံများ ရှိတတ်ကြသည်။
Leave a Comments