သျှမ်းပြည် လောက်ကိုင်မြို့ အတွင်းတွင် လက်နက်ကိုင်တပ်ဖွဲ့ အချင်းချင်း ပစ်ခတ်မှု ဖြစ်ပွားပြီး ထိခိုက်သေဆုံးမှုများ ရှိနေကြောင်း စုံစမ်း သိရသည်။
ယမန်နေ့ ဇွန်လ ၂၃ ရက်နေ့ ည ၁၀ နာရီဝန်းကျင်တွင် လောက်ကိုင်မြို့လယ် ကျင်ဟိုင်ဟိုတယ် အနီး၌ ပစ်ခတ်မှု ဖြစ်ပွားခဲ့ခြင်းဖြစ်ပြီး အမျိုးသား တစ်ဦးက သေနတ်ထိမှန်ပြီး နေရာတွင်ပင် ပွဲချင်းပြီး သေဆုံးသွားကြောင်း စုံစမ်းသိရသည်။
“ဘာကြောင့် ပစ်ခတ်မှုဖြစ်တာလဲတော့ မသိဘူး၊ တစ်ဖွဲ့နဲ့ တစ်ဖွဲ့ သေနတ်တွေနဲ့ အပြိုင်ပစ်ကြတာ၊ ဗုံး အသံတွေ လည်း ကြားရတယ်၊ သေနတ်တွေကတော့ အတိုရော အရှည်ရောပဲ၊ အမျိုးသားတစ်ဦးကတော့ ခါးနားမှာ သေနတ်မှန်တယ်၊ ကျောဘက်မှန်တယ်၊ သေသွားပြီတဲ့” ဟု ပစ်ခတ်မှု အနီးပတ်ဝန်းကျင် နေထိုင်သူ အမျိုးသား တစ်ဦးက သျှမ်းသံတော်ဆင့်ကို ပြောသည်။
ထို့အပြင် အဆိုပါ ပစ်ခတ်မှုကြောင့် အနီးပတ်ဝန်းကျင်တွင် ရပ်ထားသည့် ကားများ၊ ဆိုင်ခန်းများ နှင့် ဆိုင်ခန်း အုတ်နံရံများကိုလည်း ကျည်ဆန် သေနတ်ထိမှန်ကြောင်းလည်း သိရသည်။
အဆိုပါ ပစ်ခတ်မှု ဖြစ်ပွားသည့် နေရာသည် လူစည်ကားသည့်နေရာ ဖြစ်သည့်အတွက် ထိခိုက်မှုများပြားကြောင်း နှင့် ထိခိုက်သေဆုံးသူလည်း တစ်ဦးထက်မက ရှိနိုင်ကြောင်း အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။
“လူစည်ကားတဲ့နေရာမှာ ရုတ်တရက်ကြီး ထဖြစ်တော့ အားလုံးလည်း ရုတ်ရုတ်သဲသဲဖြစ်ကုန်တယ်၊ သေဆုံးသူ အတိအကျတော့ မသိရသေးဘူး၊ ဒီတစ်ခေါက် ပစ်ခတ်မှုက တော်တော်ကြမ်းတာပဲ” ဟု အထက်ပါ အမျိုးသားက ဆက်ပြောသည်။
အလားတူ ယမန်နေ့ ည အတွင်းမှာပင် သျှမ်းပြည် လားရှိုးမြို့၊ မူဆယ်မြို့တို့မှာလည်း ပစ်ခတ်သံများ ထွက်ပေါ်လာကြောင်း စုံစမ်းသိရသည်။
ယင်းကဲ့သို့ မူဆယ်မြို့၊ လားရှိုးမြို့တို့မှ ပစ်ခတ်မှုများသည် မည်သည့်အဖွဲ့အစည်း၊ မည်သည့်နေရာများတွင် ဖြစ်ပွားကြောင်းကို သျှမ်းသံဝောာ်ဆင့်မှ ဆက်လက်စုံစမ်းနေဆဲ ဖြစ်သည်။
လောက်ကိုင်မြို့၊ လားရှိုးမြို့ နှင့် မူဆယ်မြို့တို့သည် စစ်ကောင်စီ တပ်ဖွဲ့ အပြင် လက်နက်ကိုင်တပ်ဖွဲ့များစွာ သွားလာ လှုပ်ရှားသည့်အတွက် ပစ်ခတ်မှုများ မကြာခဏ ဖြစ်ပွားလေ့ရှိသည်။
စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် တစ်နိုင်ငံလုံး နီးပါး နိုင်ငံရေး မငြိမ်မသက်မှု ဖြစ်ပေါ်လာပြီး ပစ်ခတ် သတ်ဖြတ်မှုများ၊ ခိုးဆိုးလုယက်မှုများ ပေါများလာကြသည်။
