ခရမ်းချဉ်သီး၊ အသားတုလုံး၊ ကြာဇံ စတဲ့ စားစရာ အာဟာရတွေပါတဲ့ စားနပ်ရိက္ခာတွေကို ဝေစုခွဲထားလိုက်ပြီး တန်းစီပြီး စောင့်နေတဲ့ စစ်ရှောင်တွေကို လူတစ်ယောက်က ပေးကမ်းနေတာ မြင်တွေ့နေရပါတယ်။
အဲ့ စစ်ရှောင်တွေဟာ ဖယ်ခုံမြို့ အနောက်ဖက် တစ်နေရာမှာနေထိုင်ကြပြီး စစ်ရှောင်တွေဟာ စစ်ကောင်စီတပ်နဲ့ ပြည်သူ့ကာကွယ်ရေးတပ် PDF တို့ တိုက်ပွဲကြောင့် ဖေဖော်ဝါရီ ၂၅ ရက်က စတင်ထွက်ပြေးလာကြသူတွေ ဖြစ်ပါတယ်။
တောင်စလုံး၊ မြောက်စလုံး၊ ဘောရန်ပေါ်၊ ဘောရန်အောက် စုစုပေါင်း ကျေးရွာ ၄ ရွာမှ အိမ်ခြေ ၆၆၀ ရှိပြီး အလှူရှင်တွေထံက စားနပ်ရိက္ခာတွေကို အားကိုးနေရတယ်လို့ စစ်ရှောင်ကော်မတီ (အမည်လွဲ) ခွန်ထွန်းက ပြောပါတယ်။
“စစ်ဘေးရှောင် ပြည်သူတွေအတွက် အိမ်ခြေ ၁၀၀ စာအတွက် အလှူမှတ်တမ်းပါ။ စစ်ရှောင်တွေက အိမ်ခြေ စုစုပေါင်း ၆၆၀ ရှိပါတယ်။ အခု အိမ်ခြေ ၁၀၀ စာအတွက်သာ ရတယ်။ ကျန်တဲ့ အိမ်ခြေအတွက် နောက်အလှူရှင် လှူန်ဒါန်းတဲ့အပေါ် မူတည်ပြီး ကျနော်တို့ ပြန်ပေးရပါတယ် “ ဟု ၎င်းက ပြောပါတယ်။
လက်ရှိ အလှူရှင်တွေထံကရတဲ့ စားနပ်ရိက္ခာတွေထဲဟာ ခရမ်းချဉ်သီး၊ အသားတုလုံး၊ ကြာဇံ၊ ဆား စတဲ့ စားစရာအာဟာရတွေပါရှိပြီး ဒီစားနပ်ရိက္ခာတွေဟာ စစ်ဘေးရှောင်အတွက်တော့ တစ်ပတ်သာ လုံလောက်တယ်လို့ ဆိုပါတယ်။
“တစ်ပတ်စာလောက်တော့ ရပါတယ်။ အဲ့တစ်ပတ်စာ ကုန်သွားရင် အလှူရှင်ထပ်ရှာရတာ။ အလှူရှင်ကတော့ တန်းပြီးမရပါဘူး။ စောင့်ရတာပါပဲလေ။ အလှူရှင် မရှိတဲ့လဆိုရင် စစ်ရှောင်ပြည်သူတွေက သူ့နည်းသူ့ဟန် ကြံဖန်ရှာကြရတယ်။ ဟင်းသီးဟင်းရွက်ကြတော့ တောတောင်ထဲ ရှာကြရတယ်။ ခြံလုပ်မရတော့ တောထဲရှာရတာ“ ဟု ၎င်းက ဆက်ပြောပါတယ်။
စစ်ရှောင်တွေဟာ အလှူရှင်တွေထံက ပုံမှန် စားနပ်ရိက္ခာထောက်ပံ့မှုမရကြတဲ့အတွက် ရေရှည်မှာ စစ်ရှောင်တွေအတွက် စားနပ်ရိက္ခာပြတ်လပ်မှု အခြေအနေ ကြုံတွေ့နိုင်တယ်လို့ ၎င်းက ထပ်လောင်း ပြောပါတယ်။
ဒါ့အပြင် သျှမ်း – ကရင်နီ (ကယား) နယ်စပ်ဒေသရှိ ဖယ်ခုံ၊ မိုးဗြဲမြို့တွင် တိုက်ပွဲထပ်မံ ဖြစ်ပွားလာခဲ့သဖြင့် ဖယ်ခုံမြို့ပေါ်တွင် လွယ်လုံ၊ စက်တော်၊ ကောင်းအိ၊ ကောင်ထူရွာမှ စစ်ရှောင်တွေက ထပ်တိုးလာနေကြောင်း သိရပါတယ်။
စစ်အာဏာသိမ်းပြီးနောက်ပိုင်း သျှမ်း – ကရင်နယ်စပ် တလျောက်တွင် စစ်ရှောင် ၇ ထောင်ကျော်ရှိပြီး လက်ရှိမှာ အလှူရှင်များလာရောက် ကူညီထောက်ပံ့မှု မရှိသလောက်နည်းပါးကာ စားနပ်ရိက္ခာအတွက် စိုးရိမ်ပူပန်နေရပါတယ်။
