မြန်မာ – ထိုင်း နယ်စပ် မျဉ်းတလျှောက် အခြေစိုက်ထားသည့် “ဝ” ပြည်သွေးစည်း ညီညွတ်ရေး တပ်မတော် (UWSA) စခန်း (၅) ခုကို ဆုတ်ခွာပေးရန် ထိုင်း၏ တောင်းဆိုချက်ကို လက်ခံမည် မဟုတ်ကြောင်း UWSA ဘက်မှ တုန့်ပြန်ပြောဆိုထားသည်။

Wa Channel မှ တစ်ဆင့် မြန်မာ – ထိုင်းနယ်စပ် စည်းမျဥ်းပေါ်က တပ်စခန်းတွေကို ဆုတ်ခွာပေးဖို့ ထိုင်းရဲ တောင်းဆိုချက်ကို UWSA မှ လက်ခံမည် မဟုတ်ကြောင်း ထုတ်ပြန်ထားခြင်း ဖြစ်သည်။

“အဆိုပါ တပ်စခန်းတွေဟာ ထိုင်းဘက်ခြမ်း တည်ရှိနေခြင်းမဟုတ်၊ မြန်မာနိုင်ငံ နယ်နမိတ်အတွင်းသာ တည်ရှိနေပါတယ်။ မိမိဒေသကို မိမိကာကွယ်တာ ဖြစ်တယ်” လို့ UWSA က Wa Channel ကို ပြောဆိုထားပါသည်။

ပြီးခဲ့သည့် ဇွန်လ ၁၉ ရက်တွင် တာချီလိတ်မြို့ရှိ 1G1 ဟိုတယ်တွင် ပြုလုပ်ခဲ့သည့် မြန်မာ – ထိုင်း နယ်စပ်ကော်မတီ မြို့နယ်အဆင့် Thai – Myanmar Township Border Committee (TBC) အစည်းအဝေး တွင် ထိုင်းအာဏာပိုင်များ က မြန်မာအာဏပိုင်များထံ “ဝ” တပ်ဖွဲ့ ဆုတ်ခွာရန် တောင်းဆိုခဲ့ခြင်း ဖြစ်သည်။

အထက်ပါ တွေ့ဆုံမှုတွင် ထိုင်းအာဏာပိုင်မှ မြန်မာနိုင်ငံဘက်ရှိ UWSA တပ်စခန်း (၅) ခု ဆုတ်ခွာ ပေးဖို့ ဆွေးနွေး ချက် အပါအဝင် ထိုင်းနိုင်ငံဘက်သို့ တရားမဝင် သွားရောက်နေထိုင်သူ၊ စည်းကမ်း ဖောက်ပျက်ပြီး ထိုင်းနိုင်ငံသို့ တိမ်းရှောင်သူ နှင့် အမှုပြေးများကို ကူညီဖမ်းဆီးပေးရန်လည်း ထိုင်းအာဏာပိုင်များကို မြန်မာအာဏာပိုင်များက တောင်းဆိုသည်။

ယင်းကဲ့သို့ ထိုင်း၏ တောင်းဆိုချက်များ နှင့် ပတ်သက်ပြီး “တပ်စခန်း ဆုတ်ခွာရန် ထိုင်းအနေနဲ့ ဖိအားပေးဖို့ မလိုသလို စစ်ကောင်စီ ဘက်ကလည်း တောင်းဆိုစရာ မရှိဘူး” ဟု UWSA တောင်ပိုင်း ဆက်ဆံရေးရုံးမှ တာဝန်ရှိ သူ တစ်ဉီးကလည်း ပြောဆိုထားသည်။

ယခင်အချိန်တွင်လည်း မြန်မာ – ထိုင်း နယ်စပ်တလျောက်ရှိ “ဝ” ပြည်သွေးစည်းညီညွတ်ရေးတပ်မတော် (UWSA) တပ်စခန်းကို ဆုတ်ခွာပေးရန် အတွက် ထိုင်းဘက်က တောင်းဆိုခဲ့ဖူးသည်။